Yesaya 26
26
Ondae i Ue bente anu moroso
26:1-6
1I tempo atuu penani andio ta pinenaniako i wita Yehuda,
”Ndi ontae hinao kota anu moroso,
tekaduduiato
Dopasaomo i Ue rere watu ka bente.
2Ungkahiomo luwuno pewowa langkai,
ka ipewinso tongku anu mentee,
anu kongko metenunu!
3Anu moroso aroano
Omiu dumagaiakono rodoa,
sintuwu manangai, hangano ndi Omiumo ipompe'ala-ala.
4Pe'ala-ala Iramo mpiha i Ue,
hangano Ondae Ue Ala onaemo torukuno watu anu nahina tampulaano.
5Hangano Dopokompetuundu
iramo anu mpo'ia a mantandeano;
kota anu kontasi-tasi
Dopotiiomo,
Dopotiio hawe a wita
ka Doweweuo merete hawe ka ipowoo pampawu.
6Karudo mia memarasai,
pele ngkarudo mia molema
ta lumolandao.”
Ondae i Ue moweeako ira tuwua bawaa-Do
26:7-19
7Pesalaado mia mentee onaemo moleo,
hangano Omiu anu pu'uakono sala moleo.
8A nsala moleoa-Miu mbo'u,
kimensisikori Komiu, oo Ue.
Anu inehemami onaemo
moboio nee-Miu ka rumambe Komiu.
9Sumangaku tekewoi ndi Omiu i tempono wongi,
oo, i tempono mo'oru aroaku umungke Komiumo;
hangano tewala hawe Komiu bitarao tolino,
palilino wawontolino ira mpepaguru hapa anu mentee.
10Ande-andeno mia mosa'o gauno pinehohawa,
onae nahi ta mepaguru hapa anu mentee;
onae ta moweweu molengku a wita po'iangano songka pinolempa,
ka nahi ta kumitao maramba-Do i Ue.
11 #
Ibr. 10:27
Oo Ue, kae-Miu tetande,
sine nahi domengkitao.
Moikoano ka domengkitao po'ehe-Miu a bawaa-Miu ka domemokoko'ii!
Po'ineeomo api anu rumopu ira anu umewai Komiu sumongko ira!
12Oo Ue, Omiu anu mompatindaakami rodoa,
hangano luwuakoano anu inanggamami, Omiumo anu weweuakami.
13Oo Ue, Ue Alamami,
pe'uea susua hori ira mempabawai kami,
sine butu nee-Miu kimempaleleo.
14Ondae memate iramo, nahi ira mentuwu mbo'u,
megagi iramo onitu, nahi ira mpewangu mbo'u;
menteeano, Ihuku iramo ka rumopu ira,
ka tumadio luwuno pinewowolo ndi ondae.
15Iweweuomo tongku andio kotetia-tiangino, oo Ue,
Iweweuomo tongku andio kotetia-tiangino.
Mohawe Komiumo marambaa;
tedoaomo Ipokomaluao witado.
16Oo Ue, a laro ma'isoa dome'ungke Komiu;
tempono pohuku-Miu umalu ira, mpe'anaiki ira a laro mpekakai.
17Kana beine mentia
anu temponomo ta me'ana,
memoluki mahaki, meraipi hangano mahaki me'ana,
kanatuumo hieno teweweumami i aro-Miu, oo Ue:
18Omami mentia, omami mpemoluki mahaki,
sine kana kami mpe'anaako angi;
omami nahi kimempolio mpotulungi i tolino,
ka nahina anu pine'anaako ka ipo'iangario wawontolino.
19Oo, Ue, mia-Miu anu memate ira mentuwu mbo'u,
wata ngkoroido ta mewangu mbo'u.
Hei mia anu mengkinaburu iramo a laro wita
impewangumo ka imengkokora-koramo!
Hangano tontoru-Do i Ue onaemo tontoru mewine,
ka tolino ta wali me'anaako onitu,
Ondae i Ue mentade bitarao tolino
26:20-21
20Aiwamo tongkuku, pewinsomo a laro bolongkomu,
tondoomo tondo i bungkumu,
pewunimo tesarai koa,
hawe ka imorini tekuda atuu.
21Hangano menteeano, Ondae i Ue Ira ronga meluarako inso a mpo'ianga-Do
Ira humukuo palilino tolino hangano salado,
ka tolino mosabao rea anu te'uwu i wawono,
nahi wunio mbo'u mia anu mempinepate i ra'ai.
Currently Selected:
Yesaya 26: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
