Yesaya 24
24
LAMORO 24–27
PINAU ANU TA GAGI MONGKONA TAMPULAANO WAWONTOLINO
Tolino pinokotampula
24:1-13
1Menteeano, Ondae i Ue Ira rumoahio morina tolino
ka mo'ineeo,
Ira waliteo,
ka sumiarawoo palilino.
2Ka kana anu gagi a mpalili kanatuumo a nsando mpesomba,
kana a ata tama kanatuumo a mpe'ueano tama,
kana a ata beine kanatuumo a mpe'ueano beine,
kana a mia mo'oli kanatuumo a mia mo'asa,
kana a mia monsabo kanatuumo a mia mompesaboako,
kana a mia anu mepasua kanatuumo a mia anu mompowee pasua.
3Tolino ta rinoahi morina ntu'u,
ka pinomuru ranta pingko ntu'u,
hangano Ondaemo i Ue anu pauo pau andio.
4Tolino tengkuru ka moleu,
oo, wawontolino me'i'isei ka moleu,
langi ka tolino meronga me'i'isei.
5Tolino mokoburu hangano palilino,
hangano ondae mpolingei songka, mpolimpa'i pompakosi
ka mehapuo pedandia nahina tampulaano.
6Onaemo pu'uno, pontotonaa ta kumaano tolino,
ka palilino ta mohawe pohuku;
onaemo pu'uno, palilino tolino ta makura,
ka mia anu da tuwu tedeimo koa.
7Uwoi anggoro mo'are,
keu anggoro me'i'isei,
ka luwuno anu ineheno mo'inu anggoro mpompemasusa.
8Maroano unino rabana menaa-naaomo,
maroano mia anu memawongko tampulaomo,
ka maroano unino katapi menaa-naaomo.
9Nahina mbo'u mo'inu anggoro tinondaako penani,
ara gagi mopa'ino mia uminuo.
10Terawo-rawoomo kota anu maroa magaga,
sompo raha tinondoomo, nahi pinokompewinsoki mbo'u.
11Teronge peraali a nsala hangano nahina anggoro;
luwuno po'unde menaa-naaomo,
mawongkono tolino tampulaomo.
12Anu da tebinta a laro ngkota butu howuno anu terawo,
pewowa langkai rinawo-rawoomo.
13Hangano kanandiomo ta gagi i wawontolino,
i olodo tongku,
kana i tempono mia monsodoli wua saitu,
kana i tempono po'opua lembuino,
tewala po'opua wua anggoro umariomo.
Po'unde-unde inso a bawaa anu da mentuwu
24:14-16a
14Saru suara meroku kokora-kora,
hangano maramba-Do i Ue, ondae mpohio inso i sumooano oleo,
15”Onaemo pu'uno, pelangkai Iramo i Ue a luwuno wita i sabaano oleo,
nee-Do i Ue, Ue Alado to Isaraeli, a luwuno wita i wiwi ntahi!”
16aInso i tompano tolino kimerongeo penani po'unde-unde,
”Maramba tia-Do Anu Tedoa Moleo!”
Urasa'o a mpalilino tolino
24:16b-23
16bSine mebooli aku, ”Tampula akumo,
tampula akumo! Masola akumo!
Luwuno anu nahi petenunu, nahi hori metenunu! Moweweu mpiha nahi petenunu!
Luwuno anu nahi petenunu mpoweweu mpiha nahi petenunu!”
17Doitoa, kineke pompete'umalaa ka oho,
sumikoriko, hei palilino tolino!
18Ka anu molai hangano uni anu mongkokodoito
ta tedonta a laro kineke,
ka anu mewuatako inso a laro kineke
ta kona oho.
Hangano pentangoa i langi ira nte'ungkahi
ka empehino tolino ta melelu.
19Tolino tepuro-puro,
tolino terawo-rawo
tolino telelu mokora ntu'u.
20Tolino mobangku-bangku kana mia molangu
melelu kana laika mensoe-soe;
hala pe'ewano tedoa mokomobeao,
onae tebangku ka nahi ta mewangu mbo'u.
21A oleo atuu Ondae i Ue Ira humukuo
sorodadu langi i langi
ka luwuno mokole ntolino i wawontolino.
22Ondae ira mepinumpu mperonga-ronga,
kana mia tinaha wininso a laro ngkeke;
ondae ira mewininso a laro torungku
ka ta hinuku umarino tempo anu tehine.
23Wulantii ta tekoko'ii,
ka oleo mokula ntu'u ta mohawe mokoko'ii,
hangano Ondae Ueno luwuakoano Ira meparenta
i Torukuno Sioni ka i Yerusale,
ka Ira mopokitao maramba-Do
i arodo mia pinemota'udo bawaa-Do.
Currently Selected:
Yesaya 24: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
