Yesaya 17
17
Pohuku-Do anu pabawa tiano Damasi ka Eparai
17:1-11
1Pau-Do anu pabawa a nto Damasi.
Menteeano, Damasi nahi ta gagi mpiha kota,
sine kogagi howuno anu terawo;#Yer. 49:23-27; Amo. 1:3-5; Sak. 9:1
2luwuno kota kodeino ta bininta mpiha
ka gagi po'iangado bawaano pinotuwu,
anu mpepombole nahina monsosanggoli maupo isema.
3Luwuno bente pekorahakoa ta tetadi inso ndi Eparai
ka pabawa poparentaa ta tampula inso i Damasi,
to Arami anu da mentuwu luwuno ta tampula
mengkena kana marambado to Isaraeli,
kanatuumo pau-Do Ueno luwuakoano.
4I tempo atuu
marambano i Yako ta makura,
ka manangaino ta tenono;
5teweweuno kana tempono mia sumowi mokungku keuno gandu
ka kaeno mo'opui tonggino;
kana tonggino anu bininido mia
a lembodo to Repaimi.
6Sine ta hina anu tebinta tiado anu mponsowi lembuino
kana i tempono mia mposodoli wua saitu,
butu orua ke otolu laba wua anu tebinta a ntonggino
ka opaa ke olima a sampa-sampano anu mewua,
kanatuumo pau-Do i Ue, Ue Alado to Isaraeli.
7I tempo atuu mia ta mengkita ndi Ondae anu mokogagio, ka matano ta mengkita ndi Ondae Anu Tedoa Mempori, Ue Alado to Isaraeli; 8onae nahi ta mengkita mbo'u a meda pontunua pesomba wineweuno kaeno onaeno, ka nahi ta mengkita mbo'u a inanggano wunga ngkaeno, a ngkaruno pelahumoaa ka luwuno meda pontunua dupa.
9I tempo atuu luwuno kotamu ta bininta gagi boni-boni, kana i ndi'ipua kotado to Hewi ka to Amori bininta hangano to Isaraeli.
10Hangano ukolupe Iramo Ue Ala anu kumaduduiko,
ka nahi upewowoloo torukuno watu rosomu.
Onaemo pu'uno, maupo upoweweu lere anu tekosi
ka mompahoakono pinopaho anu inso a wita susua,
11maupo upetu'uio walao a oleo upahoo,
ka tisomono poliomo wineweu ka imensisi,
sine kanandio, konsowia ta ronga tampula a oleo masusaa
tempono pompemarasaimu nahi tepomule.
Pohuku tiano Asuri
17:12-14
12Masola ntu'u, rurunduno hadio tongku,
rurundu kana rurunduno bombano ntahi!
U'urudo suku tongku,
umu'uru kana u'uruno uwoi anu mongkokongiri!
13Ondae me'u'uru kana u'uruno uwoi anu langkai,
sine Ondae anu wurarai ira ranta ka dompolai olai,
linulu kana kulino pae a ntorukuno iluluo pepuurino angi
ka kana ota iluluo lompiu.
14Tamo ngkiniwia, gagiomo mongkokongiria!
Napi mo'oru, nahi domekongko mbo'u!
Onaemo atuu tiado mia anu pomuru kita,
ka onaemo atuu anu tinantui tiado mia anu merontu kita.
Currently Selected:
Yesaya 17: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
