Yesaya 16

1Oliwiomo ana bimba,

hei poparenta i wita,

inso i Sela molalo pada one

lumako i torukuno ana beine Sioni.

2Kana manu-manu anu menee mepaso'ulu,

sinaari inso a nsenono,

kanatuumo ana beineno Moabi

a luwuno pesakia a ngkoro Aranoni.

3”Pepatudumo,

alaomo pomputusi,

gagimo pe'engoa anu me'engo

tekonai ntonga oleo;

wuni iramo mia mentinadi,

siimo popo'oo ira mia mpolai!

4Po'inee iramo mia mentinadi inso i Moabi

mperato ndi omue,

gagimo po'iangado mpewuniakono

anu mompepate!

Tewala tampulaomo anu mompokonsii

mateomo anu moropu

ka mia lambaha pingkoomo inso a wita,

5asa kadera poparentaa ta tineahako a laro mpetenunu mompehohawa

ka i wawono, a laro ngkemano i Daudi ta wela mentoro

asa puu mpobitara anu tumeahakono moleoa,

ka anu ronga moweweu menteea.”

6Kimerongeomo mongkona pompelangka-langkaino Moabi,

onae tedoa mompelangka-langkai,

mongkona pompelangka-langkaino anu tedoa lansara,

mongkona laba mpauno anu mooa.

7Onaemo pu'uno, po'ineeomo to Moabi domposabangi,

po'ineeomo domposabangi luwu hangano Moabi.

Rumambeo kukisi kisimisino Kiri-Hareseti

po'ineeomo impebula ka imetampula mpiha!

8Hangano luwuno lereno Hesiboni merurungku,

kanatuu koa mbo'u keu anggorono i Sibima,

wua anggorono anu moiko ntu'u mokomolangu

iramo anu mempabawa a luwuno tongku,

keu anggoro atuu i ndi'ipua malua po'iangano hawe i Yaeseri,

lumele hawe i pada one,

luwuno sampano tewero

hawe i asa towano tahi.

9Onaemo pu'uno, metonda aku mengese saru Yaeseri

hangano keu anggorono i Sibima;

aku bahoakomu uwoi mataku,

hei Hesiboni ka Eleale,

hangano tompaanomo maroa mpebooliako

a po'opua wua mpinopaho ka ponsowia gandumu.

10Tampulaomo mawongkoa ka maroa mpebooli

inso a lere wua mpinopaho;

tetadiomo inso a luwuno lere anggoro

maroano pohio ka maroano pebooli,

nahina ponsesaa anggoro a pompuro'iano,

pohiodo menaa-naaaomo.

11Onaemo pu'uno, kana merokuno unino katapi kanatuumo aroaku mondidi-ndidi hangano Moabi,

kanatuu koa mbo'u aroaku hangano Kire-Heresi.

12Maupo Moabi lumako mesomba

ka me'isei a wawo pongku pesombaa

ka mewinso mekakai a mpo'ianga memporino,

nahi mohawe maupo hapa.

13Onaemo atuu pau anu pinau-Do i Ue mongkona Moabi mompu'u i ndi'ipua. 14Sine kanandio-andio Ondae i Ue mepau, ”I larono otolu nta'u, mengkena kana tempo po'anggado sorodadu mentinambo, marambano Moabi, saru luwuno maroano anu langkai, ta gagi pompokongkodei, ka mia anu tebinta tamo koa ntu'u tedei ka nahina rosodo.”

Currently Selected:

Yesaya 16: XMZ

Highlight

Copy

Compare