Yesaya 14
14
Pasinggiri mongkona mokole Babeli
14:1-23
1Tempono Ondae i Ue mehohawao i Yako ka binikio Isaraeli pohona mbo'u saru mo'inee ira mpo'ia i witado, mia mehawe ira mpe'asaako ira ka mpesaloako inuleno i Yako. 2Luwuno tongku susua mewawa ira to Isaraeli mpekule a mpo'iangado, ka i'amba to Isaraeli ira mpe'ue tongku atuu i wita-Do i Ue gagi ata tama ka beine. Kanatuumo domentawa ira mia anu tumawa ira ka pabawaio luwuno anu mokonsii ira. 3A oleo Ondae i Ue mokompenaa-naao pompemahaki ka danggaramu saru mpo'angga mobea dinadai anu pinopotembiako ndi omue, 4omue komoporongeo pasinggiri andio mongkona mokole Babeli,
”Bee, tompaanomo anu mompokonsii,
tompaanomo pompokonsiia!
5Dopuduomo i Ue tukono mia mosa'o gauno
ka tarasulu anu pabawa,
6anu tumunduhiako ira bamburu luwuno tongku,
saru petunduhi anu nahina otu-otuno;
anu lumolandaako ira tekuda luwuno tongku,
lumulu ira nahina penaa-naano.
7Asa wawontolino gagi rodo;
luwuno memawongko saru maroa mpebooli.
8Luwuno mbo'u keu sinobari, maupo keu arasi i Libano
mpo'undeakomu, dompotae:
’Mompu'u utebangku,
nahina mbo'u anu aiwa tumuehi kami!’
9Tolinodo mia mate i totono mondidi-ndidi
tumotowoo hawemu,
onitudo mia mate iwangu ira ka domentotowoko;
luwuno petewawa i tolino anu memate iramo;
luwuno mokoledo tongku anu memate iramo
iweweu ira mpentade inso a ngkadera poparentaado.
10Luwudo mpompu'u mpepau ndi omue, dompotae:
’Omue mbo'u gagikomo molema kana omami,
gagiomo mengkena saru omami!’
11A ntolinodo mia mate pinotiiomo marambamu
ka unido gambusumu;
ule-ule gagi pe'empehimu moturi,
ka wingo gagi hawumu.”
12 #
Meng. 8:10; 9:1 ”Bee, tedontakomo inso i langi,
hei Anano wula i Sabaano Oleo, Ana ntamano Towea,
umarikomo pinepasiako a wita,
hei poponangi a luwuno tongku!
13Omue anu hieno motae i laro aroamu:
Aku mewuatako i langi,
aku montadeo kadera poparentaaku
mewawoio anano wula-Do Ue Ala,
ka aku mentoro a wawo ntorukuno pobitaraa-Do anu pabawa,
a punsuno torukuno Saponi.#Mat. 11:23; Luk. 10:15
14Aku mewuatako lumaloio mantandedo seru,
ka mengkenaako Ira Anu Tedoa Mantande!
15Mengkaano, a laro tolinodo mia mate upinotii,
a mpo'ianga ondaloano ntu'u wingke matea.
16Mia anu mengkitako
ira mpekokoongakono ka mpenootio, dompotae:
Onaemoke andio anu weweuo tolino mondidi-ndidi,
ka weweu ira poparentaa ntelelu?
17Onaemoke andio anu weweuo wawontolino kana pada one,
anu rumawo-rawoo kotano,
ka nahi potola ira mia mentinawano mpekule a rahado?
18Luwuno mokoledo tongku anu memate iramo
mpepombole a laro marambaa,
singge mia a laro ngkaburuno.
19Sine omue tetadiako olai inso a ngkaburu,
kana tumba anu moboo;
mehawuako wata ngkoroido mia anu mentinoboako ponai
ka tedonta tepasiako a laro watu wingke matea,
kana wata ngkoroino kondehora anu linolanda.
20Omue nahi komohawe pekaburua kana teweweudo mokole atuudo,
hangano urawo-rawoomo witamu
ka mepate ira palilimu.
Po'ineeomo ana'uedo mia anu mpoweweu mosa'o
nahi pinopau ranta nahina tampulaano.
21Patindaako iramo anano po'ianga ponsumbelea,
hangano salado uempu'udo,
ka si dompewangu mpetorokio wawontolino
saru mebuketio wawontolino saru luwuno kota.”
22”Aku mentade umewai ira,” kanandiomo pau-Do Ueno luwuakoano, ”Aku mokotampulao neeno Babeli ka inuleno anu da mentuwu, ana'ue ka ana'ue ntukono,” kanandiomo pau-Do i Ue. 23Aku weweuo Babeli gagi po'ingaado manu-manu koa i pada one ka gagi uwoi epe. Kota atuu Aku rumoahio morina hawe ka itampula, kanandiomo pau-Do Ueno luwuakoano.
Pohuku-Do anu pabawa tiano Asiuri
14:24-27
24Ondae Ueno luwuakoano mesumpa Iramo kanandio,
”Menteeano kana anu Kupewowoloo, kanatuumo ta gagi,
ka kana anu tinoo-Ku, kanatuumo ta wineweu:
25 #
Yes. 10:12; Nah. 1:1; Sep. 2:13 Aku mepate ira to Asiuri a laro wita-Ku
ka lumolanda ira a wawo ntorukuno-Ku;
pasanga anu ninaado a bawaa-Ku ta tinadi
kanatuu koa mbo'u tinembi anu dopopotembiako ira a oweado.”
26Onaemo atuu tinoo anu wineweuomo
mongkona asa wawontolino,
ka onaemo atuu kae anu tinande
a luwuno tongku.
27Ondae Ueno luwuakoano montoo Iramo,
isemake anu polio umonsoio?
Kae-Do tinandeomo,
isemake anu polio weweuo ka iwali pinadii?
Pohuku-Do anu pabawa tiano Pilisitea
14:28-32
28A nta'u mateano mokole Ahasi haweomo pau-Do anu pabawa andio:#2Mok. 16:20
29Siimo impo'unde, hei luwuno to Pilisitea,
lano tarasulu mia anu tumunduhiko tepuduomo,
sine inso a inuleno ule ta meluarako ule me'ipo,
ka anano ta gagi ule mepani.#Yer. 47:1-7; Yeh. 25:15-17; Yoe. 3:4-8; Amo. 1:6-8; Sep. 2:4-7; Sak. 9:5-7
30Anu kodei tuwuno inso a ana aka-Ku ta mohawe kaanga
ka mia memongkokolaro ira mpepombole rodo,
sine inulemu Aku mepateako ira mokoninggo,
ka anu da mentuwu Aku mepate ira.
31Ponsabangimo, hei pewowa langkai! Peboolimo, hei kota!
Impondidi-ndidimo, hei luwuno to Pilisitea!
Hangano inso i utara membomboomo ahu mpeteaa,
nahina anu mosuka inso a baresino.
32Sangki hapake anu ira mewineeako a mia mentinenado tongku atuu?
”Doponaakonomo i Ue empehino Sioni,
ka i ra'aimo mia memarasai inso a bawaa-Ku dompohawe pekaduduia.”
Currently Selected:
Yesaya 14: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
