Yesaya 13
13
LAMORO 13–23
POHUKU TIADO LUWUNO TONGKU
Pohuku tiano Babeli
13:1-22
1 #
Yes. 47:1; Yer. 50:1 Pau-Do anu pabawa a nto Babeli anu tinarimano i Yesaya anano i Amosi a laro pongkita.
2Wuatako iramo bandera a wawo ntorukuno anu londa,
peboolimo ndi ondae temeroku;
pekaweakonomo kaemu
ka dompewinsokio pewowa langkaido ulea mokole!
3Kuparenta iramo mia anu Kupokomemporio,
Kupoboi ira mia-Ku anu moroso
anu mo'unde a mpoponangi-Ku,
ka motiio tekuda-Ku.
4Rongeo! Hinao maroaa a wawo ntorukuno,
kana suarado hadio mia anu ntepumpu!
Rongeo! Hinao maroaa inso a luwuno poparentaa,
inso a luwuno tongku anu mpepumpu!
Ondae i Ueno luwuakoano tekonai momparesa
baresi mpetea.
5Ondae me'aiwa inso a wita olai,
oo inso i tompano langi:
Ondae i Ue saru parewa ntekuda-Do
Ira rumawo-rawoo asa wawontolino.
6 #
Yoe. 1:15
Ponsabangimo, hangano oleo-Do i Ue umpedaomo,
haweno gagi pabawa pe'iwalia inso ndi Ondae Anu Tedoa Pabawa.
7Onaemo pu'uno, sompo kae ta gagi molema,
aroano sompo mia ta gagi tengkuru,
8ka ira ntededengke.
I'ali ira mekiki kompo ka haki me'ana,
ira pompemahaki kana beine ta me'ana.
Ira mambekikita saru pompemokokongiri,
rupado motaha kana i'alu ira haki mokula.
9Mentee ntu'u, oleo-Do i Ue hawe nahina pompehohawa,
saru bamburu ka saru tekuda-Do anu tensila
ka Doweweuo tolino boni-boni,
tempono Doropu ira mia ntehala inso i wawono.
10 #
Yeh. 32:7; Mat. 24:29; Mrk. 13:24-25; Luk. 21:25; Meng. 6:12-13; 8:12 Hangano anano wula ka luwuno pehowudo i langi
nahi ta mopansari wantano;
mata oleo ta gagi wongi-wongi tempono isaba,
ka wula nahi ta mopansari wantano.
11A wawontolino Aku sumuloakono wineweuno anu mosa'o,
ka a mia mosa'o gauno Aku sumuloakono salado;
pompelangka-langkaino mia anu mompelangka-langkai Aku mokompenaa-naao,
ka pompelangka-langkaino mia lambaha Aku puduo.
12Aku weweuo mia molaaopo sekono wulaa mpena,
ka mia motungkoopo ungkeano sekonopo wulaa Opiri.
13Onaemo pu'uno, Aku weweuo langi mondidi-ndidi,
ka tolino mbo'u telelu tola inso a mpo'iangano,
hangano tekuda-Do Ueno luwuakoano,
a oleo tekuda-Do anu tensila.
14Kana lagiwa anu linulu
ka kana bimba anu nahi pinakambi,
kanatuumo ondae ira mpewolili, singge mia a tongkuno,
ka molai, singge mia lumako i witano.
15Sompo mia anu kona rako ta tinobo,
ka sompo mia anu tinawa ta tebangku mateako ponai.
16Nana'ote kodeido ira mempinirego
i arono matado,
luwuno rahado ta merinontu
ka kombiado ira mempinewowaliako.
17Kitao, ndi ondae Aku tumena ira to Madai,
mia anu nahi domperioo salaka
ka nahi inehedo wulaa.
18Luwuno panado ta sumiarawo ira mia mongura;
ondae nahi ira mpehohawao anadalo,
matado mongkita nana'ote nahina pompehohawa.
19Babeli, mewanta luwuno poparentaano,
peramba-rambado to Kasidimi anu tekosi,
ta mengkena kana Sodomo ka Gumora i tempono Dowowangunsuleo.#Teg. 19:24
20Onae nahi ta hori mbo'u pino'iangario,
nahi ta pino'iangari mbo'u hawe a luwuno inule;
to Ara nahi ira mpekema i ra'ai,
puu mpopakambi nahi ira mpowawa pinotuwudo mpepombole i ra'ai.
21Sine kondehora i pada one anu ira mpepombole i ra'ai,
ka rahado ta bukeako manu-manu koa;
manu-manu unta ira mpo'ia i ra'ai,
ka onitu ira mpo'ense-ense i ra'ai;#Meng. 18:2
22dahu mo'ila ira mpohopa a laro benteno,
ka serigala a laro langkanae pinesanaa.
Tempono ta ronga hawe,
ka tinuwuno nahi ta pinokomelai.
Currently Selected:
Yesaya 13: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
