Hosea 2
2
To Isaraeli nahi tinarima ka pinomule
2:1-22
1”Tuntuomo inemu, tuntuomo,
hangano onae komba beine-Ku,
ka Ongkue komba tamano.
Asalakono pebelesuno ipoko'olaio inso i arono,
ka ponsosabono inso i olono wua radano,
2kasi mansa Kulohuo sangkano ranta kai kolambe-lambe,
ka mo'ineeo kana a oleo ipine'anaako,
weweuo kana pada one,
weweuo kana wita mokari,
ka mo'ineeo kai mate mokoranga.
3Luwuno anano nahi Aku mehohawa ira,
hangano ondae onaemo nana'ote belesu.
4Mentee ntu'u inedo gagiomo belesu;
beine anu mentiaako ira moweweuomo mokoko'iia.
Hangano ipotae: Aku tumonda ira mia ineheku ntu'u,
anu mowee aku roti ka uwoi inuaku,
wulu bimba ka sawu lenaku, lana ka inuaku.
5Onaemo pu'uno, menteeano Aku umolotiakono ewo rui salano,
ka mompontade rere watu umukoo,
ranta nahi pokompohawe salano.
6Onae ta lumulu ira pinehohawano,
sine nahi ta humawe ira;
onae ta umungke ira,
sine nahi ta tepohaweako ira.
Ka onae ta motae: Aku mekule
mepokule a ntamaku anu amba-ambano,
hangano tempo atuu sanaa akupo sekono kanandio-andio.
7Sine nahi to'orio
nine Ongkuemo anu moweeakono
gandu, anggoro, ka lana,
ka anu mokohadioakono salaka
ka wulaa anu domeweweuo tinaha Baala.
8Onaemo pu'uno Aku wali umalao
gandu-Ku i tempono
ka anggoro-Ku i tempono,
Aku wali sumintakio sawu wulu bimba ka sawu lena-Ku
anu tumutuwio anuno.
9Ka kanandio-andio, Aku sumungkeo anuno
i arodo mia pinehohawano,
ka maupo te'asa mia nahi ta motolao inso a ngkae-Ku.
10Aku mokompenaa-naao luwuno pinemawongkono,
oleo langkaino, wula wo'ohuno ka oleo Sabano
ka luwuno porame-rameno.
11Aku rumopuo keu anggorono ka keu arano,
mongkona teweweu atuu ipotae,
’Luwuno andio tamboku,
anu domeweeakune mia pinehohawaku!’
Aku weweuo gagi tobu, ka luwuno kondehora i tonga mpada ta kumaano.
12Aku humukuo hangano luwuno oleo pesombaano a Baala
tempono ipontunuako ira pesomba,
ka meramba-rambaako tole-toleno saru enuno.
Itonda ira mia pinehohawano
ka kumolupe Aku,” kanandiomo pau-Do i Ue.
13”Onaemo pu'uno, menteeano Aku popandeio
ka wawao i pada one,
ka i'amba mepau mokorodoo aroano.
14 #
Yos. 7:24-26
Inso i ra'ai Aku weakono lere anggorono,
ka Kuweweuo lembono Akoro gagi pewowa pomperorohia.
I ra'aimo onae ta meweengakono koroino kana tempono imongura,
kana tempono ipelungka meluarako inso i wita Masiri.
15Ia oleo atuu, kanandiomo pau-Do i Ue,
Omue komoboi Aku: Tamaku,
ka nami poboi Aku mbo'u: Baalaku!
16Ka Ku'amba metadiakono needo Baala inso a ngangamu,
ka needo nami ta pinau mbo'u.
17Aku mowutu pedandia ndi omue i tempo atuu
saru luwuno kondehora i tongampada, saru luwuno manu-manu i laro meene,
ka luwuno kondehora melele a wawo wita;
Aku umoninio wo'eno pana, ponai ka parewa mpetea inso i witamu,
Aku weweuko rodo mepombole.
18Aku mokogagiko beine-Ku ranta nahina tampulaano
ka Aku kumombiako a laro menteea ka moleoa,
a laro mpetenunu ka pompehohawa.
19Aku mokogagiko beine-Ku a laro mpetenunu,
ranta kau to'ori Ira i Ue.
20Ia oleo atuu Aku merorongeakono, kanandiomo pau-Do i Ue,
Aku merorongeakono langi,
ka langi ta merorongeakono tolino.
21Tolino ta merorongeakono gandu,
anggoro ka lana, ka ondae andio ira mperorongeakono i Yisire'eli.
22 #
Rom. 9:25; 1Pet. 2:10 Onae Aku merawoakono tia-Ku i tolino,
ka mehohawao i Lo-Ruhama
ka Aku mepau ndi Lo-Ami: omuemo bawaa-Ku!
Ka onae ta motae: Ue Alaku!”
Currently Selected:
Hosea 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
