Hosea 1

Pu'u Mpau

1:1

1 # 2Mok. 14:23–15:7; 15:32–16:20; 18:1–20:21; 2Taw. 26:1–32:33 Pau-Do i Ue anu hawe ndi Hosea anano i Be'eri a tempono i Usia, i Yotami, i Ahasi ka i Hisikia, luwuno mokole i Yehuda, ka tempono i Yerobea anano i Yoasi, mokole i Isaraeli.

Somborino i Hosea gambarano Isaraeli anu nahi petenunu

1:2-9

2Tempono Ondae i Ue mompu'u mepau molalo i Hosea, mepau Iramo ndi Hosea, ”Lakomo, kombiaomo asa beine belesu ka pe'ue iramo ana belesu, hangano wita andio inehedo mpebelesu saru mpebungkui Ira i Ue.” 3Onaemo ka ilako kumombiao i Gomeri ana beineno i Dibilaimi. Beine atuu mentia ka ipe'anaakono asa ana ntama. 4#2Mok. 10:11Ka Do'amba i Ue mepau ndi Hosea, ”Poponeeakonomo i Yisire'eli nana'ote atuu, nde nahi tehine mbo'u Aku humukuo somborino i Yehu hangano po'uwua rea i Yisire'eli ka Aku tumompaakono poparentano suku Isaraeli. 5I tempo atuu Aku puduo wo'eno panano Isaraeli i lembono Yisire'eli.”

6Ka i'amba beine atuu mentia mbo'u ka me'anaako asa ana beine. Mepau Iramo i Ue ndi Hosea, ”Poponeeakonomo i Lo-Ruhama nana'ote atuu, hangano nahi Aku mehohawao mbo'u suku Isaraeli, ka nahi Aku umoniniako ira ntu'u halado. 7Sine Aku mehohawao suku Yehuda ka kumadudui ira a nee-Do i Ue, Ue Alado. Aku kumadudui ira komba mompake pana ke ponai, parewa mpetea ke ngara ka sorodadu mpengara.” 8Umarino motoeo i Lo-Ruhama, beine atuu mentia mbo'u ka me'anaako asa ana ntama. 9Ka Do'amba mepau, ”Poponeeomo i Lo-Ami nana'ote atuu, hangano omiu komba bawaa-Ku ka Ongkue andio komba Ue Alamiu.”

Dandi mongkona tekaduduia

1:10-12

10 # Rom. 9:26 Sine lembuino, hadiodo to Isaraeli ta kana oneno tahi, anu nahi pinokosa'u ka nahi pinokodoa. A mpo'ianga ba isua domempinauako, ”Omiu komba bawaa-Ku,” i tu'ai ira mempinauako, ”Luwuno ana-Do Ue Ala anu tuwu.” 11To Yehuda ka to Isaraeli ira ntepumpu mperonga ka pompotoro asa petewawado. Ira mpetorokio wita andio. Mentee ntu'u, tedoa langkai oleo Yisire'eli atuu! 12Potaemo a luwuno pepaekompomu tama, ”Ami!” ka a mpepaekompomu beine, ”Ruhama!”

Currently Selected:

Hosea 1: XMZ

Highlight

Compare

Copy