IBARANI 9
9
Po'ianga mempori i tolino ka i suruga
9:1-10
1Lano pedandia anu amba-ambano hinao koa mbo'u luwuno atora a mpesombaa ka a mpo'ianga mempori wineweuno kaeno mia. 2#Pel. 25:23–26:33 Hangano hinao pinatinda aasa kema, onaemo anu i arono ntu'u ka i tu'ai hinao karuno hulu ka meda saru roti pesomba kaanga. Po'ianga andio nineeako po'ianga anu mempori. 3I bungkuno pelingo anu ko'orua hinao mbo'u aasa kema anu nineeako po'ianga anu tedoa mempori. 4#Pel. 16:33; 25:10-16; 30:1-6; Pod. 17:8-10; Win. 10:3-5 I tu'ai hinao meda pontunua pesomba pontunua dupa inso a wulaa, ka burua pedandia, anu luwuno inapiiako wulaa; i larono burua pedandia atuu ninaa pido-pido wulaa me'ihi manna, tukono i Haruni anu horio mentumba ka watu anu meburiako pedandia, 5#Pel. 25:18-22 ka i wawono orua kerubi marambaa anu umengoio ulono pedandia. Sine mongkona andio nahi kita mpokopauo nte'o'asa kanandio-andio.
6 #
Pod. 18:2-6
Kanandiomo weweuano po'ianga mempori atuu i inatora. Ka luwuno sando pesomba wela mpewinso i larono kema anu i arono ntu'u ka domeweweuo pesombado, 7#Ima. 16:2-34 sine i larono kema anu ko'orua butu koa Sando Mpesomba Langkai anu mewinso pohona i larono asa nta'u, ka asalakono saru rea anu ipesombaakono hangano koroino onaeno ka hangano luwuno polimpaia, anu wineweudo bawaano nahi dompokonto'orio. 8Saru andio Dopokomengkaao Penaa Mempori, nine sala lumako a mpo'ianga anu mempori atuu napi te'ungkahi, tewala kema anu amba-ambano atuu da kongkoo. 9Onaemo atuu potundaano tempo kanandio-andio. Menunu saru atuu pinesombaako pesomba ka pesomba anu nahi pokosompo ira anu mpesombaakono montonda ihino aroado anu tedoa ondalo, 10hangano luwuno atuu, umarino kaanga, inua ka mperupa-rupa powo'ohia, butu koa luwuno atora mentuwu tolino, anu butu tinonda ranta haweno tempo pompokowo'ohua.
Ondae i Kerisituu ondaemo Pomposombu inso a mpedandia anu wo'ohu
9:11-28
11Sine Ondae i Kerisituu hawe Iramo gagi Sando Mpesomba Langkai tiano luwuno anu moiko anu ta hawe: Dotelaloiomo kema anu lalu langkai ka anu lalu soompo, anu komba wineweuno kaeno mia, – pengkonaano anu nahi tewinso pinokogagi andio, – 12ka mewinso Iramo pohona a laro po'ianga mempori ranta nahina tampulaano komba saru mowawa reano bimba lakino ka reano ana nsapi, sine saru mowawa rea-Do Ondae-Do. Ka saru atuu mohawe Iramo tepotolaa anu nahina tampulaano. 13#Ima. 16:15-16; Pod. 19:9, 17-19 Hangano, tewala reano bimba lakino ka reano sapi lakino ka petawisino awuno sapi mongura mokomempori ira anu mokoburu, ranta ka domempinokomempori montonda koroi, 14lalua ntu'u rea-Do i Kerisituu, anu hangano Penaa anu nahina tampulaano Dopesombaakonomo koroi-Do Ondae-Do ndi Ondae Ue Ala gagi pesomba anu nahina tataano, Ira mokomeporio laro aroato inso a luwuno wineweu anu nahina tuduno, ka tompokompesomba ndi Ondae Ue Ala anu tuwu.
15Onaemo pu'uno Ondaemo peposombu inso a aasa pedandia anu wo'ohu, ka dompokotarimao ondae anu mempinoboi iramo tia anu nahina tampulaano anu dinandi, hangano mate Iramo tumolosio luwuno polimpaia anu wineweuomo i larono pedandia anu amba-ambano. 16Hangano isua hinao pe'oliwi pokotompa, i tu'ai asalakono pinau mongkona mateano anu mompau pe'oliwi pokotompa atuu. 17Hangano aasa pe'oliwi pokotompa ka i'amba pinementee, tewala anu me'oliwi atuu mateomo, hangano tewala da tuuwu anu me'oliwi atuu, nahi tinonda pe'oliwino. 18Onaemo pu'uno, pedandia anu amba-ambano nahi pinokomoroso hangano nahina rea. 19#Pel. 24:6-8 Hangano umarino pauo i Musa luwuno petenano songka Taura a luwuno bawaa, i'alao reano ana nsapi ka reano bimba lakino saru uwoi, ka wulu motaha ka hisopi, ka i'amba tumawisio wunta atuu ka luwuno bawaa, 20saru mepau, ”Ndiomo rea pedandia anu Dopakosiakomiu Ue Ala.” 21#Ima. 8:15 Ka kema mbo'u ka luwuno parewa mpesomba itawisiakono rea kanatuu. 22#Ima. 17:11 Ka mingki luwuakoano pinokomemporiako rea montonda songka Taura, ka ba nahina po'uwua rea nahina po'ampunia.
23Gaagi luwuakoano anu metondoniako hapa anu kongko i suruga asalakono pinokomempori kanandio, sine luwuno parewa suruga pinokomemporiako luwuno pesomba anu lalu moiko sekonopo atuu. 24Hangano Ondae i Kerisituu komba mewinso Ira a mpo'ianga mempori wineweuno kaeno mia anu butu koa gambarano inso anu menteeano, sine i laro nsuruga isa'a Dotepo'aroako Ira Ue Ala hangano ontae. 25Ka Ondae komba mewinso temararu Dopesombaakono koroi-Do isa'a, kana Sando Mpesomba Langkai sompo ta'u dompewinso a mpo'ianga mempori saru rea anu komba reado ondaedo. 26Hangano tewala kanandio asalakono mararu Dotebobarasai mompu'u ipinokogagi wawontolino andio. Sine kanandio-andio butu koa pohona Dopokomengkaao koroi-Do, a tempo pokotompa ka Do'oninio hala a pompesombaako-Do koroi-Do. 27Ka mengkena kana mia pinakosi ka Domate butu koa pohona, ka umarino atuu binitara, 28#Yes. 53:12 kanandio koa mbo'u Ondae i Kerisituu butu koa pohona Dopesombaakono koroi-Do tumembio halano hadio mia. Umarino atuu pohona mbo'u Ira mokomengkaao koroi-Do komba montembi hala sine moweeako ira tekaduduia, anu sumikori Ira.
Currently Selected:
IBARANI 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
