IBARANI 3
3
Ondae i Yesu mantande Irapo sekono i Musa
3:1-6
1Onaemo pu'uno, hei luwuno pepaekompo anu mempori, anu mpohawe tia a mpepoboi suruga, imengkita iramo Tinena ka Sando Mpesomba Langkai anu pine'ala-alato, onaemo Ondae i Yesu, 2#Pod. 12:7 anu metenunu ndi Ondae anu pakosi Iramo, kana i Musa koa mbo'u metenunu a asa laro raha-Do. 3Hangano Ondae kinita tekona mohawe marambaa langkaiopo sekono i Musa, mengkena kana anu pande mowangu pinelangkaiopo sekono raha anu winanguno. 4Hangano sompo raha iwanguo asa mia anu pande mowangu, sine anu pande mowangu luwuakoano onaemo Ondae Ue Ala. 5Ka i Musa lano metenunu a asa laro raha-Do Ue Ala gagi puu pompekakaako sumakosiio mongkona hapa anu ta pinalele lembuino, 6sine Ondae i Kerisituu metenunu gagi Ana anu metewawa a raha-Do; ka raha-Do onaemo ontae, tewala mehawe kita a pokotompaano mpe'ini moroso a pompe'ala-ala ka pomperorohia anu pinemawongkoto.
Mate hangano humapu Ira i Ue
3:7-19
7 #
Pud. 95:7-11
Onaemo pu'uno, kana anu pinau-Do Penaa Mempori,
”A oleo andio, tewala imerongeo suara-Do,
8si mpokomoteao aroamiu kana a laro bamburu
i tempono po'ara-arahakoa i pada one,
9I ra'ai uempu'umiu me'ara-arahakoa-Kune po'arahako,
maupo domengkitao luwuno wineweu-Ku, pato pulu nta'u tehineno.
10Onaemo pu'uno ka Kutekuda a anu mentuwu asa api atuu, ka Kupepau:
Wela tesosaelo aroado,
ka nahi domento'orio pesalaa-Ku,
11onaemo ka Kupesumpa a laro ntekuda-Ku:
Nahi ira mpewinso a mpo'ianga penaa-naaa-Ku.”
12Impetangkoromo, hei luwuno pepaekompo, ka si hinawe te'asa mia i olomiu anu mosa'o aroano ka anu nahi pompe'ala-ala hangano ihapu Ira Ue Ala anu tuwu. 13Sine imemambe patudumo sompo oleo, i larono da pinokopau ”oleo andio,” ka si hina i olomiu anu gagi motea aroano hangano pompopo'oono hala. 14Hangano mpohawe kitamo tia ndi Ondae i Kerisituu, poolo ka tompe'ini moroso a pompe'ala-alato anu amba-ambano hawe a pokotompaano. 15#Pud. 95:7-8 Sine tewala horio pinau,
”A oleo andio, tewala imerongeo suara-Do,
si mpokomoteao aroamiu kana a laro bamburu,”
16 #
Pod. 14:1-35
Isemake ondae anu mokotesingkao tekuda-Do Ue Ala, maupo domerongeo suara-Do? Kombake luwudo anu mpeluarako inso i Masiri i Musa petewawado? 17Ka isemake anu tinekudaako-Do pato pulu nta'u tehineno? Kombake ondae anu mpoweweu hala ka anu wata ngkoroido matumbole i pada one? 18Ka isemake anu Dototonaaomo, nine nahi ira mpewinso a mpo'ianga penaa-naaa-Do? Kombake ondae anu nahi dompomperorongeako? 19Kanandiomo tomengkitao, nine nahi dompokompewinso hangano nahi dompompe'ala-ala.
Currently Selected:
IBARANI 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
