IBARANI 11
11
Ponsakosii pompe'ala-ala
11:1-40
1Pompe'ala-ala onaemo pu'uno luwuakoano anu pinerorohito ka tondonino luwuakoano anu nahi tomengkitao. 2Nde hangano pompe'ala-ala sinakosiiomo a uempu'uto.
3 #
Teg. 1:1
Hangano pompe'ala-ala ka tomento'orio, nine luwuakoano pinokogagiako pau-Do Ue Ala, ranta hapa anu kinitato gagiomo inso a hapa anu nahi tompokokitao.
4 #
Teg. 4:3-10
Hangano pompe'ala-ala ipesombaakonomo i Habeli ndi Ondae Ue Ala pesomba anu lalu moiko sekonopo pesombano i Kai. Hangano koa atuu ka ipohawe ponsakosii ndi onae, nine onae mentee, hangano Dopemoikoo Ue Ala pesombano atuu ka hangano pompe'ala-ala onae da mepau, umarino mate.
5 #
Teg. 5:21-24
Hangano pompe'ala-ala i Heno tetande, ka si pompembasai matea, ka onae nahi hinawe, hangano Dotandeomo Ue Ala. Hangano se'eluno napi tetande, onae mohawe ponsakosii, nine onae Dopemoikoo Ue Ala. 6Sine ba nahina pompe'ala-alano mia nahi Ira memoikoo Ue Ala. Hangano ba isema rumangkuhi Ira Ue Ala, asalakono ipe'ala-alao nine kongko Ira Ue Ala, ka nine Ondae Ue Ala moweeakono tambo mia anu umungke Ira ntu'u.
7 #
Teg. 6:13-22
Hangano pompe'ala-ala, onaemo i Noho – saru pontiso-Do Ue Ala mongkona hapa anu napi tengkita – saru metenunu ipatindao Bangka kaduduido pe'asa rahano ka hangano pompe'ala-ala atuu ihukuo wawontolino, ka onae tinantui montarima menteea, menunu saru pompe'ala-alano.
8 #
Teg. 12:1-5
Hangano pompe'ala-ala i Burahima metenunu, tempono ipinoboi ka ipelungka lumako i wita anu ta tumarimao gagi tia pusakano, ka i'amba melungka nahi to'orio po'ianga anu te'aroano. 9#Teg. 35:27 Hangano pompe'ala-ala onae mo'ia i wita anu idinandiako atuu kana i asa wita susua ka i tu'ai ipo'ia a ngkema saru i Saki ka i Yako, anu saru ondae me'umbuo dandi anu aasa atuu. 10Hangano isisikorio kota anu hinao empehino, anu sinongka ka winangu-Do Ue Ala.
11 #
Teg. 18:11-14; 21:2 Hangano pompe'ala-ala onae ka i Sara mohawe koa mbo'u roso umule ira inule, maupo laloomo tinuwudo, hangano iperorohi Ira, anu mompowee dandi atuu Ira koa umihiio. 12#Teg. 15:5 Onaemo pu'uno, inso a mia aasa, tendeano mia anu kana mateomo, moluarako hadio inule, kana anano wula i langi ka kana one i wiwi ntahi, anu nahi pinokodoa hadiono.
13 #
Teg. 23:4
Luwudo andio memate iramo a pompe'ala-ala gagi mia anu nahi dompohawe hapa anu dinandi atuu, sine butu domengkitao inso olai ka mengkawe-kaweo ka memangakuakono, nine ondae mia hawe ka mehawe i tolino andio. 14Hangano ondae anu mpotae kanandio mpokomengkaao, nine ntekewoi ira mpo'ungke aasa wita po'iangado. 15Ka bakana i larono mongkona atuu dompewowoloo wita insoado anu domebintaomo, sompo tempodo mpekule i tu'ai. 16Sine kanandio-andio mpongkekewoi ira wita po'iangado anu lalu moiko onaemo aasa po'ianga suruga. Onaemo pu'uno nahi mokoko'ii-Do Ue Ala nineeako Ue Alado, hangano Dopatindaako iramo aasa kota.
17 #
Teg. 22:1-14
Hangano pompe'ala-ala onaemo i Burahima tempono i inara-arahako, ipesombaakono i Saki. Onae, anu tumarimaomo dandi atuu, ipe'induakono mesombaakono anano anu asa-asa, 18#Teg. 21:12 maupo umariomo ipinauako, ”Inulemu anu tepu'u inso ndi Saki anu ta nineeako inulemu.” 19Hangano ipewowoloo, nine Ondae Ue Ala pabawa wangu ira mia maupo inso i olodo mia mate. Ka inso i ra'ai kana waliomo itarimao.
20 #
Teg. 27:27-40
Hangano pompe'ala-ala onaemo i Saki, saru mengkita olai i arono ironso ira i Yako ka i Esau.
21 #
Teg. 47:31–48:20
Hangano pompe'ala-ala onaemo i Yako, mansano rangkuomo tempono ta mate, ironso ira orua anano i Yusupu, ka i'amba mesomba ka ipehonda a uluno tukono.
22 #
Teg. 50:24-25
Hangano pompe'ala-ala onaemo i Yusupu tempono rangkuomo mateano ipaleleo mongkona peluarakodo to Isaraeli ka me'oliwi mongkona wukuno.
23 #
Pel. 1:22; 2:2 Hangano pompe'ala-ala onaemo i Musa, mansano pine'anaako, domewunio mia mota'uno i larono otolu wula, hangano domengkitao, nine nana'ote atuu tekosi rupano ka nahi domedoitoakono parentano mokole.
24 #
Pel. 2:10-12
Hangano pompe'ala-ala onaemo i Musa, mansano langkaiomo, nahi behe ipinau anano ana beineno i Pirao, 25hangano inehenopo marasai saru bawaa-Do Ue Ala sekonopo anu sarai koa membasaio tuwu sanaa anu tehala. 26Pompokongkodeia hangano Ondae i Kerisituu ituduo gagi kaeaa anu lalu langkai sekonopo luwuno arataa i Masiri, hangano pinewowolono ipo'aroo a ntambo.
27 #
Pel. 2:15
Hangano pompe'ala-ala ka ibintaomo Masiri saru nahi doitoakono tekudado mokole. Onae mekorahako mengkena kana ikitao hapa anu nahi tengkita.
28 #
Pel. 12:21-30
Hangano pompe'ala-ala ka iweweuo Pasa ka pontawisia rea, ka si danggi ira anu mompepate luwuno ana aka.
29 #
Pel. 14:21-31
Hangano pompe'ala-ala ka domentelaloiomo Tahi Motaha mengkena kana telalo a wita motu'i, sine to Masiri mentondu, tempono dome'arahakono ndada.
30 #
Yos. 6:12-25
Hangano pompe'ala-ala ka itehoa luwu rere watuno Yeriko, mansano kota atuu tinanggolili opitu oleo tehineno.
31Hangano pompe'ala-ala onaemo i Rahabi, beine belesu atuu, nahi mate merongaako ira mia mpe'ewa, hangano moiko itotowo ira anu mempadaso atuu.
32 #
Mpo. 4:16; 1Sam. 1–1Mok. 2 Ka hapa mbo'uke anu asalakono kupao? Hangano nahi ta sompo tempoku, tewala aku tumutuluo mongkona i Gideo, i Baraki, i Simeso, i Yepeta, i Daudi ka i Semueli ka luwuno nabi, 33#Dan. 6:1-27anu hangano pompe'ala-ala ka domenangi iramo poparentaa, mpoweweu menteea, mehaweo hapa anu dinandi, mpokopuo ngangado singa, 34#Dan. 3:1-30 mpepateo api anu mongkokongiri. Mentola iramo inso a mata mponai, mpohawe iramo roso a laro molemaa, gagi iramo memoroso a laro mpeteaa ka domensaari iramo bawaano sorodadu susua. 35#1Mok. 17:17-24 Luwuno ine wali iramo mentarimao luwuno miado anu memate iramo, hangano mewinangu. Sine mia mehano dompo'ineeo koroido binobarasai ka nahi domebehe mentarimao pompotolaa, ka dompohawe pewangua anu moikoopo. 36#1Mok. 22:26-27; Yer. 20:2 Hinao mbo'u anu pinopodeu-deu ka sinepi, tamoako anu pinongu ka tinorungku. 37#2Taw. 24:21 Mewinuno ira, meginaragadi, mempinepateako ponai; mpo'itu-itu ira mpesangkaako kulino bimba ka kulino bembe saru memarasaiako makerea, pompema'iso ka pobobarasai. 38Wawontolino andio nahi pototo ndi ondae. Mpo'itu-itu ira i pada one ka a mentorukuno, a laro ngkunepo ka a ntebokano wita. 39Ka luwudo nahi dompohawe hapa anu dinandi atuu, maupo pompe'ala-alado moweeako iramo aasa ponsakosii anu moiko. 40Hangano Ondae Ue Ala Dopatindaakitamo aasa anu lalu moiko; Ba nahi saru ontae nahi dompohawe hawe a sompoano.
Currently Selected:
IBARANI 11: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
