IBARANI 1
1
Ondae Ue Ala mepau telalo a Ana-Do
1:1-4
1Mansano a tempo i ndi'upua Ondae Ue Ala mararu ka a mperupa-rupa pesalaa-Do mepau a uempu'uto telalo a luwuno nabi, 2ka a tempo pokotompa andio mepau Iramo ndi ontae telalo a Ana-Do, anu Dopakosiomo gagi anu tekona tumarimao luwuno anu hina. Hangano Ondae Dopokogagiomo Ue Ala wawontolino saru luwuno ihino. 3Ondaemo wantano maramba-Do Ue Ala ka gambara tade-Do Ue Ala ka luwuakoano pinokorosoako pau-Do anu bukeako pabawa. Ka mansa-Do umari moweweu pompokomemporia inso a hala, mentoro Ira i koana-Do Anu Tedoa Langkai, a mpo'ianga anu mantande, 4olaiopo lalu mantande sekonopo luwuno mala'eka, mengkena kana nee anu Dowineeako olaiopo lalu tekosi sekono needo.
Ana-Do Ue Ala mantande Irapo sekono luwuno mala'eka
1:5-14
5 #
Pud. 2:7; 2Sam. 7:14; 1Taw. 17:13 Hangano ndi sema i olodo mala'eka atuudo hori Ira motae,
”Ana-Ku Omue!
Kupe'anaakomumo oleo andio?”
ka
”Aku gagi Ama-Do,
ka Ondae Ira gagi Ana-Ku?”
6 #
Pud. 97:7
Ka tempono Dowawao mbo'u Ana-Do anu amba-ambano i wawontolino, mepau Ira,
”Luwuno mala'eka-Do Ue Ala asalakono mpesombai Ira.”
7 #
Pud. 104:4
Ka mongkona luwuno mala'eka mepau Ira,
”Anu weweu ira mala'eka-Do gagi angi mokora
ka puu pompekakaako-Do megagi langano api.”
8 #
Pud. 45:7-8
Sine mongkona Ana mepau Ira,
”Kadera poparentaa-Miu, oo Ue Ala, kongko mpiha motilalo ka nahina tampulaano,
ka tuko poparentaa-Miu onaemo tuko menteea.
9Ikekewoio moleoa ka umo'aliaakono gau mosa'o;
onaemo pu'uno Ondae Ue Ala, Ue Alamu Do'urapia-Komiu
lana gagi tondonino mawongkoa, lumaloio luwuno wali-wali tepo'asaa-Miu.”
10 #
Pud. 102:25-27
Ka,
”A pompu'uano, oo Ue, Inaaomo empehino tolino,
ka langi onaemo wineweuno kae-Miu.
11Luwuno atuu ta roopu, sine Omiu kongko mpiha,
ka luwuno atuu ta gagi laano kana sangka;
12kana lemba meloe Komiu kupalulu ira,
ka kana pe'anaa ira mebinali,
sine Omiu mengkena mpiha,
ka ta'u-Miu nahina tampulaano.”
13 #
Pud. 110:1
Ka ndi semake i olodo mala'eka atuudo Dohori mepau,
”Pentoromo i koana-Ku,
ranta Kuweweu ira iwali-Miu
gagi pelandaano karu-Miu?”
14Kombake luwudo onaemo luwuno penaa anu mpompekakaako, anu mentinena ka dompekakaako ira anu asalakono mpohawe tekaduduia?
Currently Selected:
IBARANI 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
