Esera 7

I Esera mekule i Yerusale

7:1-10

1Tehine umarino atuu, i tempo poparentaano Aritahasasita, mokole i Peresia, melungkaomo i Esera anano i Seraya anano i Hilikia, 2anano i Salumi anano i Sadoki anano i Ahitubi 3anano i Amaria anano i Asaria anano i Merayoti 4anano i Serahia anano i Usi anano i Buki 5anano i Abisua anano i Pinehasi anano i Eleasa anano i Haruni, sando mpesomba langkai atuu. 6I Esera andio mekule inso i Babeli. Onae asa mia anu tedoa pande a wunta ka sompo ponto'orino mongkona Taurano i Musa anu Doweeakono i Ue, Ue Alado to Isaraeli. Luwuakoano anu inemano, doweeakono mokole, hangano kae-Do Ue Alano kumongkomio.

7Ta'u ko'opitu tempo poparentaano i mokole Aritahasasita mekuleomo mbo'u nada i Yerusale kana to Isaraeli ka sando mpesomba, to Lewi, puu mpenani, puu mpodagai pewowa langkai ka puu pompekakaako i Raha-Do Ue Ala. 8Wula ko'olima ta'u ko'opitu tempo poparentaano mokole atuu, i Esera haweomo i Yerusale. 9Tepakosiomo pelungkaano inso i Babeli tanggala asa wula ko'asa ka hangano moikono pokongkomino kae-Do Ue Alano, onae hawe i Yerusale tanggala asa wula ko'olima. 10Hangano i Esera montooomo ta mepaguruakono ntu'u Taura-Do i Ue ka weweuo a laro ntumuwuno saru paguruako ira to Isaraeli pompakosi ka atora-Do.

Wunta parentano mokole Aritahasasita

7:11-26

11Ndiomo polimbano wunta anu iweeakono mokole Aritahasasita ndi Esera, sando mpesomba ka anu tedoa pande a wunta atuu, anu tedoa pande a parenta ka pompakosi-Do i Ue a nto Isaraeli,

12”I Aritahasasita, mokoleno luwuakoano mokole, hawe ndi Esera, sando mpesomba ka tedoa pande a Taura-Do Ue Alano asa wawolangi, ka anu nahina tampulaano. Kanandio-andio, 13moluarako akumo parenta, nine luwuno mia ilarono poparentaaku anu tewinso palili to Isaraeli, sando mpesomba, ke to Lewi ka anu ineheno lumako i Yerusale, moiko domelako saru omue. 14Hangano omue dotenako mokole saru opitu ira puu mpopatuduno kau lako paresao mongkona Yehuda ka Yerusale, menunu songka-Do Ue Alamu, gagi pe'iniamu. 15Omue mbo'u asalakono mowawa salaka ka wulaa pompoweedo mokole saru luwuno puu mpopatuduno, gagi pesomba a moleono aroa ndi Ondae Ue Alado to Isaraeli anu po'ianga-Do i Yerusale, 16saru luwuno salaka ka wulaa anu komohawe inso a luwuno poropinsi Babeli, ka mbo'u pesomba a moleono aroado palili ka luwuno sando mpesomba, tiano Raha-Do Ue Alado i Yerusale. 17Onaemo pu'uno, asalakono doi andio pakeo temoiko po'oliako sapi lakino, bimba lakino, ka ana bimba saru pesomba kaanga ka pesomba tinawa. Luwuno atuu, asalakono pesombaakono a wawo meda pontunua pesomba i Raha-Do Ue Alamu i Yerusale. 18Umarino atuu, weweuomo hapa anu pinemoikomu ka luwuno pepaekompomu saru salaka ka wulaa anu susuano, menunu po'ehe-Do e Alamu. 19Sekono luwuno parewa anu pineweengako ndi omue pakea mpesomba i Raha-Do Ue Alamu, peweengakono luwu i aro-Do Ue Ala i Yerusale. 20Anu kinere susuano tiano Raha-Do Ue Alamu, anu gagi owahiamu, moiko u'owahio inso a mponaapa arataa poparentaa. 21Ongkue, mokole Aritahasasita, moluarako akumo parenta a luwuno anu mompekaria arataa poparentaa i asa towano Koro Eparata, kanandio, ’Luwuno anu inso ndi omiu, inemano sando mpesomba Esera anu tedoa pande a Taura-Do Ue Alano asa wawolangi, asalakono imeweweuo temoiko, 22mompake salaka hawe asa etu talenta, gandu hawe asa etu kor, anggoro hawe asa etu bati, lana hawe asa etu bati, ka ohia nahi tetidahi. 23Luwuakoano anu mongkona parenta-Do Ue Alano asa wawolangi, asalakono iweweuo tementee ntu'u tiano Raha-Do Ue Alano asa wawolangi, kasi alu ira tekuda-Do a mpoparentaano mokole ka luwuno anano. 24Kimempauakomiu mbo'u nine si mpo'ema sima'ulu, peki'ue ke owahia susua a luwuno sando mpesomba, to Lewi, puu mpenani, puu mpodagai pewowa langkai, puu pompekakaako ke ata susuano i Raha-Do Ue Ala.’ 25Omue Esera, pakeomo ponto'orimu inso ndi Ondae Ue Alamu anu Doweeko, kau potoro ira petewawa, puu mpobitara, ka domebitara ira luwuno palili anu mpo'ia i asa towano Koro Eparata, onaemo luwuno mia anu mponto'ori songka-Do Ue Alamu ka mia anu napi to'orio, asalakono paguruako ira. 26Sompo mia anu nahi tondao songka-Do Ue Alamu ka songkano mokole, asalakono hinuku menunu saru wineweuno, moiko hinuku mate ke tinadi, moiko pohuku dinenda ke tinorungku.”

I Esera umunde-unde Ira i Ue

7:27-28a

27Inunde-unde Iramo i Ue, Ue Alado uempu'uto anu lumeluomo aroado mokole kai gagi kanandio, ranta kai tekosi doweweuo raha-Do i Ue i Yerusale,#Yes. 60:13 28aka weweu aku ka dopemoikoo mokole ka luwuno puu pompatuduno saru luwuno anu langkai potorono a poparentaano mokole ka anu pabawa!

Pepatinda a pelempaa

7:28b–8:30

28bOngkue mbo'u kupokomorosoo aroaku, hangano kae-Do i Ue, Ue Alaku kumongkomi aku. Kupumpu ira ba opia petewawa inso i olodo to Isaraeli mpekule saru ongkue.

Currently Selected:

Esera 7: XMZ

Highlight

Copy

Compare