Esera 6

1Umarino atuu, mokole Dariusu moluarako parenta, ka ipinaresa a mponaapa arataa i Babeli, a mpo'iangano luwuno anu binuri domeninaa. 2Ka i'amba i Ahimeta, bente i poropinsi Media, hinawe asa kalulu, anu ihino kanandio,

”Wunta pinokorosono mokole: 3Ta'u amba-ambano poparentaano mokole Koresi, linuarakoomo parentado mokole Koresi: Mongkona Raha-Do Ue Ala i Yerusale, asalakono raha atuu wali winangu gagi po'iangado mia mpopesombaako pesomba sinumbele, ka pondasino a mpo'iangano se'elu. Mantandeno asalakono nomo pulu hiku ka maluano nomo pulu hiku, 4rereno otolu api watu melolangkai ka asa api keu. Owahino asalakono inso a mponaapa arataano poparentaa. 5Kanatuu koa mbo'u wulaa ka salaka parewano Raha-Do Ue Ala anu inalano i Nebukanesa inso a Raha Mempori i Yerusale ka winawa i Babeli atuu, asalakono pinokule ka iwinawa mbo'u a mpo'iangano amba-ambano, a Raha Mempori i Yerusale. Ka asalakono unaao i larono Raha-Do Ue Ala.”

Wunta sangkino i Dariusu

6:6-12

6”Onaemo pu'uno, hei Tatinai, bupati i wita asatowano Koro Eparata, ka i Setari-Bosinai saru wali-walimiu, to poparenta i wita asa towano Koro Epatara, asalakono impoko'olaio koroimiu inso i ra'ai. 7Po'ineeomokoa anggaano powangua Raha-Do Ue Ala atuu. Bupati ka luwuno mia pinemota'udo to Yahudi me'anggao powangua Raha-Do Ue Ala atuu a mpo'iangano amba-ambano. 8Ka mbo'u muluarako akumo parenta mongkona hapa anu asalakono komiu meweweuo a luwuno mia pinemota'udo to Yahudi mongkona powangua Raha-Do Ue Ala: Inso a pohaweno poparentaa, inso a peki'uedo wita i asatowano Koro Eparata, owahino ka domewineeako luwu mia atuudo, kasi te'onto. 9Hapamo koa anu kineredo, montonda pontisodo sando mpesomba i Yerusale, kana sapi lakino mongura, bimba lakino, ana bimba gagi pesomba tinunu tia-Do Ue Alano asa wawo langi, gandu mbo'u, ohia, anggoro ka lana, luwuno atuu, asalakono domewineeako sompo oleo, si mpompe'olo, 10ka dowela mpopesombaako pesomba anu mokomawongko Ira Ue Alano asa wawo langi, ka mekakaiako ira mokole saru luwuno anano. 11Ka i'amba moluarako akumo mbo'u parentaku, isema anu umewaio parenta andio, asa karuno rahano ta binuta, ka karu rahano atuu ta sinonsoako koroino inso i totono. Rahano mbo'u ta rinongka hangano pe'ewano atuu. 12Ondae Ue Ala anu weweuo nee-Do mo'ia i ra'ai, po'ineeomo Dopotii ira sompo mokole ka tongku, anu tumaangakono kaeno umewaio tompaano pau andio ka ta mokotampulao Raha-Do Ue Ala anu i Yerusale atuu. Ongkue i Dariusu, anu moluarako parenta andio. Asalakono atuu ka iwineweu temoiko.”

Poronsoa Raha-Do Ue Ala

6:13-18

13Ka i'amba i Tatinai, bupati i asa towano Koro Eparata, i Setari-Bosinai ka wali-walino, mpoweweu ira moiko montonda parentano mokole Dariusu. 14#Hag. 1:1; Sak. 1:1Luwudo mia pinemota'udo to Yahudi mpowangu mpiha ka moroso aroado, hangano pipaudo nabi Hagai ka i Sakaria anano i Ido anu ta gagi. Dompoko'umario powangua atuu montonda parenta-Do Ue Alado to Isaraeli ka parentano i Koresi, i Dariusu ka i Aritahasasita, mokole i Perisia. 15Raha atuu umari, i'oleo ko'otolu wula Adari, ta'u ko'onoo poparentano mokole Dariusu.

16Ka do'amba to Isaraeli, luwuno sando mpesomba, to Lewi ka mia susua anu mpekule inso a mpo'ianga domentinadi mporame-rame memawongkoakono poronsoa Raha-Do Ue Ala. 17A poronsoa Raha-Do Ue Ala andio, dompesombaakono asa etu sapi lakino, bimba lakino rua etu ka ana bimba pato etu, ka bembe lakino gagi pesomba po'onini halado to Isaraeli, hopulu ka orua, montonda hadiono sukudo to Isaraeli. 18Luwuno sando mpesomba domenaa ira montonda tetia-tiano ka to Lewi montonda luwuno bawaado a mpoweweua pesomba ndi Ondae Ue Ala anu mo'ia i Yerusale, kana anu teburi a Wuntano i Musa.

Porame-ramea Pasa

6:19-22

19 # Pel. 12:1-20 Tanggala hopulu ka opaa wula ko'asa ondae anu mpekule inso a mpo'ianga domentinadi mporame-rameakono Pasa. 20Hangano luwuno sando mpesomba ka to Lewi mperonga-ronga mpokomemporio koroido, gagi mempori iramo luwu. Umarino atuu, to Lewi mposumbele ana bimba Pasa tiado luwuno mia anu mpekule inso a mpo'ianga domentinadi, ka tiano pepaekompodo, luwuno sando mpesomba atuu ka tiano koroido ondaedo. 21To Isaraeli anu mpekule inso a mpo'ianga domentinadi mengkaano pesomba atuu ka meronga saru ondae sompo mia anu meliahako inso a mokoburuado luwuno tongku i wita atuu anu umungke Ira Ue Alado to Isaraeli. 22Domporame-rameakono oleo langkai Roti Nahi Peragi, memawongkoa ira opitu oleo tehineno hangano Ondae i Ue mokomawongko ira. Ondae i Ue balio aroano mokole i wita Asuri ka ipokowali ira anggaano mpowangua Raha-Do Ue Ala, Ue Alado to Isaraeli.

Currently Selected:

Esera 6: XMZ

Highlight

Copy

Compare