Yehesikieli 12

I Yehesikieli pinokogagi tondonino tadiado to Isaraeli

12:1-28

1Ka i'amba haweomo pau-Do i Ue ndi ongkue, 2#Yes. 6:9-10; Yer. 5:21; Mrk. 8:18”Hei anano mia, omue mo'ia i tonga-tongado suku mpe'ewa, anu hinao mata pongkita sine nahi pongkita ka hinao biri poronge sine nahi poronge, hangano ondae atuu suku mpe'ewa. 3Onaemo pu'uno, omue, anano mia, patindaomo tiamu luwuno parewano asa mia tinadi ka pelempamo kana asa mia tinadi tempono meene i arono matado. Lakomo inso a mpo'iangamu kanandio-andio a mpo'ianga anu susua kana asa mia tinadi i arono matado. Bara'ura ira mpokonto'orio nine ondae atuu suku mpe'ewa. 4Wawaomo luwuno parewamu atuu meluarako kana luwuno parewano asa mia tinadi tempono meene i arono matado. Omue isa'a asalakono meluarako tempono wongi i arono matado kana asa mia anu lumako a pontadia. 5I arono matado weweuomo asa bolo a rere watu ka peluarakomo inso i tu'ai. 6I arono matado naaomo luwuno parewamu a wawo oweamu, ka wawaomo atuu meluarako a laro wongi-wongi. Omue asalakono tumutuwio rupamu, ranta nahi upongkita wita. Hangano, Ongkue weweuko gagi tondonido suku Isaraeli.”

7Ka ku'amba weweuo kana anu kupinarentaako. Kuwawao meluarako luwuno parewa tempono meene kana luwuno parewano mia tinadi ka tempono ngkiniwia kuweweuakono kaeku asa bolo a rere watu. A laro wongi-wongi ongkue meluarako ka i arono matado kunaao luwuno parewaku a wawo owea.

8Tisomono haweomo pau-Do i Ue ndi ongkue, 9”Hei anano mia, kombake suku Isaraeli, suku mpe'ewa atuu, mpesikeno ndi omue: Hapake wineweumu andio? 10Pauako iramo: Kanandiomo pau-Do Ue Ala: Pau-Do Anu Pabawa andio mongkona petewawa i Yerusale ka luwuno suku Isaraeli anu mpo'ia i ra'ai. 11Pauomo: Ongkue gagi tondonimiu. Kana anu wineweuku andio kanatuumo ta wineweu ndi ondae: gagi mia tinadi ira melako a pontadia. 12Petewawa anu i tonga-tongado ta numaa ira parewano a wawo oweano a laro wongi-wongi ka i'amba meluarako. Mia ta moweweu asa bolo a rere watu pesalaano ka ipokompeluarako. Onae ta tumutuwio rupano ka si pongkita wita. 13#2Mok. 25:7; Yer. 52:11Aku tuma'oo buani-Ku gagi rakoano ka i larono dampa-Ku onae ta te'uko. Aku wawao i Babeli, witado to Kasidimi, sine wita atuu nahi ta kumitao. I ra'aimo onae ta mate. 14Luwuno anu pehori-horino, luwuno anu pompokowali ka sorodaduno, Aku sumiarawoo a luwuno mata angi ka Aku butao ponai i bungkudo. 15Ira mento'orio nine Ongkuemo Ue, tempono Kusiarawo ira i olodo luwuno tongku ka sumiarawo ira a luwuno wita atuu. 16Sine, asa ntia inso ndi ondae Aku motola ira inso a mponai, mokoninggoa, ka haki lele ka domentutuluo luwuno wineweudo anu mokoburu i olodo luwuno tongku, ba isua domelako. Ka ira mento'orio nine Ongkuemo Ue.”

17Ka i'amba haweomo pau-Do i Ue ndi ongkue, 18”Hei anano mia, kaanomo kaangamu saru pondindi-ndidi ka inuomo uwoi saru biibi ka aroa danggara. 19Pauomo a mpalilino wita andio: Kanandiomo pau-Do Ue Ala mongkona palilino Yerusale, i wita Isaraeli: Ira mengkaano kaangado saru aroa danggara ka me'inuo uwoi saru aroa moliro, ranta witado gagi boni-boni hangano ihino tampulaako pobobarasaia anu wineweudo luwuno anu mpo'ia i ra'ai. 20Luwuno kota anu da dompo'iangario mia ta gagi tekale-kale ka wita atuu ta gagi boni-boni; Ka ira mento'orio nine Ongkuemo Ue.”

21Ka i'amba haweomo pau-Do i Ue ndi ongkue, 22”Hei anano mia, pasinggiri hapake atuu anu hina i olomiu i wita Isaraeli, anu unino: Kanandiomo tehineno, sine maupo te'asa pongkita nahina anu gagi? 23Onaemo pu'uno pauako ira: Kanandiomo pau-Do Ue Ala: Aku mokompenaa-naao pasinggiri andio ka mia nahi ta pauo mbo'u i Isaraeli. Sine, pauako iramo: Tempono umpedaomo ka sompo pongkita ta gagi. 24Hangano, nahi ta hina mbo'u pongkita anu mompopo'oo ke maupo anu mompau nahi manasa ta gagi anu mompokotesaa i tonga-tongano suku Isaraeli, 25hangano Ongkue, Ue, Aku mepau ka hapa anu pinau-Ku ta gagi, ka pau atuu nahi ta pinotulu mbo'u. Hangano, i tempono imentuwu, hei suku mpe'ewa, Aku pauo pau ka umihiio, kanandiomo pau-Do Ue Ala.”

26Ka i'amba haweomo pau-Do i Ue ndi ongkue, 27”Hei anano mia, kitaomo, suku Isaraeli mpotae: Pongkita anu kinitano atuu, oleono da olai, pinau anu ta pinauno, tempono da tehine. 28Onaemo pu'uno, pauako iramo: Kanandiomo pau-Do Ue Ala: Nahina maupo te'asa pau-Ku ta pinotulu mbo'u. Hapa anu pinau-Ku ta gagi, kanandiomo pau-Do Ue Ala.”

Currently Selected:

Yehesikieli 12: XMZ

Highlight

Copy

Compare