Yehesikieli 11

Luwuno petewawa Isaraeli hinuku

11:1-13

1Ka i'amba Penaa-Do i Ue tumande aku ka wawa aku a mpewowa langkai i sabaano oleo Raha-Do i Ue, pewowa anu me'aro i sabaano oleo. Kitao, a mpewowa langkai atuu hinao rua pulu ka olima mia ka i olodo kukitao i Ya'asana anano i Asuri ka i Pelatia anano i Benaia, luwuno petewawa tongku. 2Pau-Do ndi ongkue, ”Hei anano mia, ondaemo andio mia anu mpontoo mosa'oa ka mporawo patudu mosa'o i kota andio, 3anu mpotae: Kombake napi tempono tompowangu raha? Kota andio kuro ka ontae bauno. 4Onaemo pu'uno pompaumo anu ta gagi ndi ondae, pompaumo anu ta gagi, hei anano mia!”

5Penaa-Do i Ue pabawai aku ka Ondae i Ue mepau ndi ongkue, ”Pauomo, kanandiomo pau-Do i Ue: Omiu mpotae kanatuu, hei suku Isaraeli, ka Kuto'orio hapa anu meluarako i laro aroamiu. 6Omiu pompepate kohadi-hadiono mia i kota andio ka luwuno sala bukeako wata ngkoroido. 7Onaemo pu'uno, kanandiomo pau-Do Ue Ala: Luwuno mia anu pinepatemiu i kota andio, ondaemo bauno ka kota andio kurono, sine omiu Aku rumende komiu mpeluarako inso i kota andio. 8Omiu medoito a mponai, sine Aku mompotii ponai ndi omiu, kanandiomo pau-Do Ue Ala. 9Aku rumende komiu mpeluarako inso i kota andio ka meweengakomiu a ngkaedo mia hawe ka modontai pohuku ndi omiu. 10Komiu ntebangkuako ponai ka iwita Isaraeli Aku humuku komiu. Ka komiu mento'orio nine Ongkuemo Ue. 11Kota andio nahi ta gagi kuromiu ke maupo omiu gagi bau i larono. A mpetidaano Isaraeli Aku humuku komiu. 12Komiu mento'orio nine Ongkuemo Ue. Hangano, omiu nahi mentuwu montonda luwuno pompakosi-Ku ka atora-Ku nahi meweweuo, tendeano omue weweuo luwuno atorado tongku pehori-horimiu.”

13Kontongaaku mompau anu ta gagi, i Pelatia anano i Benaia mate. Ka ku'amba menggolontu mesomba ka mebooli meroku, kupotae, ”Oo, Ue Ala, nde Komiu pingko irake to Isaraeli anu da tebinta?”

Dandi mongkona pokowo'ohuno Isaraeli

11:14-25

14Ka i'amba haweomo pau-Do i Ue ndi ongkue, 15”Hei anano mia, palilino Yerusale mpepau mongkona luwuno pepaekompomiu, oo luwuno pepaekompomiu, pe'etumiu ka luwuno suku Isaraeli, luwuno, ’Ondae ntedonta iramo inso ndi Ondae i Ue; ndi omamimo wita andio wineeako gagi tiamami.’ 16Onaemo pu'uno pauomo: Kanandiomo pau-Do Ue Ala: Maupo Kutadi ira olai i olodo luwuno tongku ka sumiarawo ira a luwuno wita atuu, Ongkue gagi po'ianga mempori anu kodei pengkonaano ndi ondae a luwuno wita ba isua domelako, 17onaemo pu'uno pauomo: Kanandiomo pau-Do Ue Ala: Aku pumpu komiu inso a luwuno tongku ka Aku pumpu komiu inso a luwuno wita isua itesiarawo ka Aku weeakomiu wita Isaraeli. 18Umarido mehawe i ra'ai, ira mpoko'olaio luwuno lahumoano ka luwuno wineweu anu mokoburu inso i wita atuu. 19#Yeh. 36:26-28Aku moweeako ira aroa anu susua ka numaao penaa anu wo'ohu i laro aroado. Aku tumadio inso a ngkoroido aroa anu motea ka moweeako ira aroa anu metenunu. 20Kanandio ondae ira mentuwu montonda luwuno pompakosi-Ku ka mpe'ini a luwuno atora-Ku saru meweweuo. Ka ondae ira megagi bawaa-Ku ka Ongkue gagi Ue Alado. 21Sine mongkona ondae, anu aroado metako a luwuno lahumoa ka luwuno wineweudo anu mokoburu, Aku dumunsiako ira peleludo a uludo, kanandiomo pau-Do Ue Ala.”

22 # Yeh. 43:2-5 Luwuno kerubi atuu mentandeo panido, ka luwuno bolano melelu meronga ondae, kontongaano maramba-Do Ue Alado to Isaraeli kongko i wawodo. 23Ka i'amba maramba-Do Ue Ala mewuatako inso i tonga-tongano kota ka menaa-naa a wawo ntorukuno i sabaano oleo kota. 24Penaa-Do i Ue atuu tumande aku ka wawa aku mekule, a laro pongkita inso a Mpenaa-Do Ue Ala, i wita Kasidimi a luwuno mia mentinadi. Ka i'amba pongkita anu kinitaku atuu moliu inso ndi ongkue. 25Ongkue mbo'u mohaweo a luwuno mia mentinadi atuu luwuakoano anu pinopokita-Do i Ue ndi ongkue.

Currently Selected:

Yehesikieli 11: XMZ

Highlight

Copy

Compare