Peluarakoa 7

1Mepau Iramo i Ue ndi Musa, ”Kitao, Kupokogagikomo kana Ue Ala ndi Pirao, ka i Haruni akamu, ta gagi kana nabimu. 2Asalakono kau pauakono luwuno anu Kutenaakomu, ka i Haruni, akamu, onae anu ta mepauakono i Pirao, ka ipo'inee iramo to Isaraeli melako inso i witano. 3#Tin. 7:36Sine Aku mokomoteao aroano i Pirao ka Aku mompoko hadio petondoni ka moweweu kinohali-haliako i wita Masiri. 4Tewala nahi perorongeakomiu i Pirao, Aku motiio kae-Ku moweeako ira pohuku anu mobea a nto Masiri, ka lumuarako ira mia-Ku, bawaa-Ku, to Isaraeli inso i wita Masiri. 5To Masiri atuu iramo mento'orio nine Ongkuemo Ue, tewala Kupotiio kae-Ku a nto Masiri ka wawa ira to Isaraeli mpeluarako inso i olodo.” 6Kanandiomo doweweuo i Musa ka i Haruni kana songka-Do i Ue ndi ondae. 7Tempono dopepau ndi Pirao, tinuwuno i Musa halo pulu nta'u ka i Haruni halo pulu ka otolu nta'u.

8Ka Do'amba mepau i Ue ndi Musa ka ndi Haruni, 9”Tewala motae i Pirao ndi omiu: ’Popokitaakune asa petondoni anu kinohali-haliako,’ asalakono tenao i Haruni: ’Alao ka ipetendeakono tukomu i arono i Pirao.’ Ka tuko atuu ta gagi ule.”

10Lumako iramo i Musa ka i Haruni me'aro ndi Pirao, ka doweweuo kana anu Dotenaako ira i Ue; i Haruni metendeakono tukono i arono i Pirao ka a luwuno pegawaino, ka tuko atuu gagi ule. 11Ka i'amba i Pirao moboi ira mia anu mpoto'ori ka pande sihiri to Masiri ka dompoweweu mbo'u anu kanantuu, montonda ponto'orido. 12Pada ira mpopetendeako tukodo, ka tukodo atuu gagi ule; sine tukono i Haruni tumele ira tukodo. 13I Pirao motea aroano, onaemo ka nahi behe merorongeako ira, kana anu umariomo Dopauo i Ue.

Pohuku amba-ambano: uwoi gagi rea

7:14-25

14Mepau Iramo i Ue ndi Musa, ”I Pirao mokomoteao aroano, nahi eheako ira to Isaraeli melako. 15Lakomo ndi Pirao da mo'oru, tempono ipeluarako lumako a ngkorono. Sikoriomo a wiwino koro Nili, ka wawao a ngkaemu tuko anu horiomo gagi ule. 16Pauakono: Ondae i Ue, Ue Alado to Ibarani, tumena aku aiwa pauakomiu: Po'inee iramo bawaa-Ku ka domelako mpesomba ndi Ongkue i pada one. Sine ranta hawe kanandio-andio nahi ubehe momperorongeako. 17#Meng. 16:4Onaemo pu'uno, kanandiomo pau-Do i Ue: Inso anu ta gagi andio, ko tumo'orio, nine Ongkuemo Ue. Pauakono i Pirao: Kitao, tuko a ngkaeku andio, aku wombaakono uwoi i koro Nili, ka uwoi atuu ta bali gagi rea. 18Bou a ngkorono Nili ta memate, ka koro Nili ta mewoo mana moboo, gagi to Masiri nami moiko dompo'inu uwoi inso a ngkoro Nili.”

19Pau-Do i Ue ndi Musa, ”Tenao i Haruni: Alaomo tukomu, weroomo kaemu a luwuakoano uwoi i wita Masiri, a wawo ngkorono, a pangkoro, a limbo ka a luwuakoano tepumpuano uwoi, anu hinao ndi ondae, ka igagi luwu rea. I asa wawo wita Masiri ta hina rea, sekonopo uwoi a dula keu ka a ngkusi gagi rea.” 20Kanandiomo doweweuo i Musa ka i Haruni, menunu songka-Do i Ue. Tuko atuu itandeo ka ipewombaakono a uwoi i koro Nili, i arono i Pirao ka luwuno pegawaino, ranta luwuno uwoi a ngkoro Nili bali gagi rea. 21Memate iramo luwu bou a ngkoro Nili, onaemo kai mewoo mana moboo koro Nili atuu. Gagi uwoi atuu nami moiko dome'inuo to Masiri ka a luwuno wita Masiri hinao rea. 22Sine mia mpoto'ori to Masiri, mpoweweu ira koa mbo'u montonda ponto'orido, onaemo i Pirao ka ikongko motea aroano, nahi behe rumonge ira kana anu pinau-Do i Ue. 23I Pirao mewolili, ka ipewinso a langkanaeno ka nahi behe mewowoloo mbo'u anu gagi atuu. 24Sine luwudo to Masiri mpokeke i horino koro Nili mpo'ungke uwoi inuado, hangano nami moiko uwoi koro Nili dome'inuo. 25Kanandio sompoomo telalo opitu oleo umari-Do i Ue wombakio koro Nili.

Currently Selected:

Peluarakoa 7: XMZ

Highlight

Compare

Copy