Peluarakoa 6

I Musa wali tinena

6:1-12

1Umarino atuu mepau Ira Ue Ala ndi Musa, ”Ongkuemo Ue. 2#Pel. 3:13-15Mepopokita Akumo ndi Burahima, ndi Saki ka ndi Yako nine Ongkuemo Ue Ala anu tedoa pabawa, sine ia nee-Ku Ue napi Kupepopoto'ori. 3Komba butu Kupedandiako iramo Aku weeako ira wita Kana'a, po'iangaado kana mia mehawe, 4sine Kurongeomo mbo'u mperaipido to Isaraeli anu mempine'atado to Masiri, ka Ku'inio pedandia-Ku. 5Onaemo, pauako iramo to Isaraeli: Ongkuemo Ue, Aku koa motolakomiu inso a mpodadaido mpo'angga to Masiri, ka motolakomiu inso a mpope'ataado. Aku tumandeo kae pabawa-Ku tumolosikomiu, saru luwuno pohuku anu mobea. 6Aku mokogagi komiu bawaa-Ku ka Ongkue Ue Alamiu, ka imento'orio nine Ongkuemo Ue, Ue Ala anu motola komiu inso a mpedadaido mpo'angga a to Masiri. 7Aku wawa komiu a wita anu Kudandiomo, Aku weeakono i Burahima, i Saki ka i Yako. Aku weeakomiu gagi tiamiu. Ongkuemo Ue.”

8Ka i'amba i Musa pauako ira to Isaraeli, sine nahi domperorongeakono, hangano tedungkuomo aroado ka tedoa dompemobeao tepe'atado.

9Umari atuu Ondae i Ue mepau ndi Musa, 10”Lakomo ndi Pirao, mokoledo to Masiri atuu, ka pauakono, asalakono kai potola iramo to Isaraeli melako inso i witano.” 11Sine ipotae i Musa ndi Ondae i Ue, ”Sekonopo to Isaraeli nahi domperorongeakune, kana'umpe i Pirao ta rumonge aku, ongkue mia anu nahi pande mpau.” 12Kanandiomo pau-Do i Ue ndi Musa ka ndi Haruni, ka tumena ira lumako a nto Isaraeli ka ndi Pirao, mokoledo to Masiri, ka domewinawa to Isaraeli mpeluarako inso i wita Masiri.

Uempu'udo i Musa ka i Haruni

6:13-26

13Ndiomo luwuno petewawado asa mpinu'u anu mpepe'etu: i Rube, ana amba-ambano i Isaraeli, onaemo: i Heno, i Palu, i Heseroni ka i Karami. Ondaemo inuleno i Rube. 14Luwuno anano i Simeo onaemo: i Yemueli, i Yami, i Ohada, i Yakini, i Sohari, ka i Saulu; anano inso a beine to Kana'a. Onaemo inuleno i Simeo. 15Ndiomo needo anano i Lewi montonda potudano domehina: i Geresoni, i Keha ka i Merari. Tinuwuno i Lewi asa etu tolu pulu ka opitu nta'u. 16#Pod. 3:17-20; 26:57-59; 1Taw. 6:16-19; 23:13Anano i Geresoni: I Libeni ka i Simei, montonda pepe'etuado. 17Anano i Keha, onaemo: I Amarami, i Yisara, i Heberoni ka i Usieli. Tinuwuno i Keha asa etu tolu pulu ka otolu nta'u. 18Anano i Merari, onaemo: i Mahali ka i Musi. Onaemo pepe'etuado to Lewi montonda potudano hinaado.

19I Amarami kumombiao i Yokebe, pepaekompono amano, ka beine andio me'anaako ira i Haruni ka i Musa. Tinuwuno i Amarami asa etu tolu pulu ka opitu nta'u. 20Anano i Yisara, onaemo: I Kora, i Nepegi ka i Sikiri. 21Anano i Usieli, onaemo: I Misaeli, i Elesapa ka i Siteri. 22I Haruni kumombiao i Eliseba, anano i Aminada, pepaekompono beine i Nahaso, ka beine andio me'anaakono i Nada, i Abihu, i Eleasa ka i Itamara. 23Anano i Kora, onaemo: I Asira, i Elikana ka i Abiasapa; onaemo pepe'etuado to Kora. 24I Eleasa, anano i Haruni, kumombiao asa ana beine anano i Putieli ka beine andio me'anaakono i Pineha. Ondaemo petewawado to Lewi montonda pepe'etuado.

25I Haruni ka i Musa, ondaemo anu tinena-Do i Ue, ”Wawa iramo to Isaraeli mpeluarako inso i wita Masiri, montonda pebaresido.” 26Ondaemo i Musa ka i Haruni anu mepau ndi Pirao, mokoledo to Masiri, ka domewinawa to Isaraeli mpeluarako inso i wita Masiri.

Pohona mbo'u i Musa me'aro ndi Pirao

6:27–7:13

27Asa tempo mepau Ira i Ue ndi Musa i wita Masiri. 28Mepau Ira i Ue ndi Musa, ”Ongkuemo Ue. Pauakonomo i Pirao, mokoledo to Masiri, luwuakoano anu Pinau-Ku ndi omue.” 29Ipotae i Musa ndi Ondae i Ue, ”Ongkue andio komba mia anu pande mpau, kana'umpe ta rumonge aku i Pirao?”

Currently Selected:

Peluarakoa 6: XMZ

Highlight

Compare

Copy