Peluarakoa 39

Moweweu sangkano sando mpesomba

39:1-31

1Inso a bana wungo motu'a, wungo mongura, motaha motu'a dompoweweu sangka pompelangkai pakea ba dompesomba a mpo'ianga mempori. Wineweu mbo'u sangka mempori pakeano i Haruni, kana petena-Do i Ue ndi Musa.#Pel. 28:1-43

2Doweweuo lemba epo inso a bana wulaa, wungo motu'a, wungo mongura, motaha motu'a ka lena alusu anu kinoloro banano. 3Dopaluo luwuno sibano wulaa, ka do'amba mempole-poleo gagi bana, anu sinula i olono bana wulaa, wungo motu'a, wungo mongura, motaha motu'a ka lena alusu, gagino sinula. 4Doweweuo tutuwi owea anu sinombu a lemba epo atuu, tesombu i orua untuno lemba atuu. 5Koloro tanggono a lemba epo atuu tepe'asa saru onae ka inso a nsawu anu mengkena: bana wulaa, wungo motu'a, wungo mongura, motaha motu'a ka lena alusu anu kinoloro banano, kana petena-Do i Ue ndi Musa. 6Dopodedeo watu paramata kerisopara anu tinanggoako simpi wulaa, ngginori kana monggori pontondoni, menunu saru needo luwuno anano i Isaraeli. 7Ka i'amba paramata atuu ninaa a orua tutuwi owea lemba epo gagi paramata petondoni mewowolo ira to Isaraeli, kana parenta-Do i Ue ndi Musa.

8Doweweuo tutuwi rada, mengkena kana lemba epo, anu sinula inso a bana wulaa, wungo motu'a, wungo mongura, motaha motu'a ka lena alusu anu kinoloro banano. 9Tutuwi rada atuu, mensiu opaa, wineweu orua lupi, ondauno asa otuwe mengkena ka maluano asa otuwe. 10Do'atorao gagi opaa baresi paramata, a baresi amba-ambano: yasapisi motaha, kirisoli ka malakiti. 11A baresi ko'orua: watu rea, lasuaradi ka yasapisi molowulu. 12A baresi ko'otolu: ambara, aki ka kesubu. 13A baresi ko'opaa: pirusu, kerisopara ka nepiri. Luwuno paramata atuu pinotakoako simpi wulaa. 14Menunu saru needo luwuno anano i Isaraeli, paramata atuu hadiono hopulu ka orua, sompo paramata asa nee. Luwuno paramata atuu ngginori kana monggori sinsi pontondoni, sompo paramata asa nee inso a hopulu ka orua suku atuu. 15A ntutuwi rada atuu wineweu mbo'u rante inso a wulaa mpena, kana koloro anu linisu. 16Mpoweweu ira orua onggo wulaa ka orua mala-mala wulaa ka mala-mala orua atuu, pinasa a orua untuno tutuwi rada. 17Dopasao orua rante wulaa linisu atuu a orua mala-mala i untuno tutuwi rada. 18Ko'oruano untuno susua inso a orua rante linisu, pinasa a orua simpi atuu. Kanandiomo dopasao a ntutuwi owea lemba epo, i arono. 19Doweweuo orua mala-mala wulaa ka dopasao a orua untuno tutuwi rada atuu, a wiwino i larono, anu me'aro a lemba epo. 20Wineweu mbo'u orua mala-mala wulaa ka pinasa a orua tutuwi owea lemba epo, i totono te'alaako i arono, umpeda a mpesombuano lemba epo ka koloro tanggono anu i wawono. 21Ka i'amba tutuwi rada atuu saru mala-malano, dotanggoakono bana wungo motu'a a mala-malano lemba epo kai kongko mpiha tutuwi rada atuu i wawono koloro tanggono lemba epo ka nahi tepahe inso a lemba epo, kana parenta-Do i Ue ndi Musa.

22Domeweweuo lemba meloe i bungkuno i totono lemba epo, luwuno sinula inso a bana wungo motu'a. 23We'uno i tongano lemba meloe i bungkuno atuu kana we'uno lemba sira, anu hinao wiwino lumimbuo kasi teberi. 24A lupino i totono lemba meloe atuu, wineweu wua delima inso a bana wungo motu'a, wungo mongura ka motaha motu'a anu kinoloro. 25Moweweu ira nggiri-nggiri inso a wulaa mpena ka ipinasa nggiri-nggiri atuu i olono wua delima, lumimbuo lupino lemba i bungkuno atuu, mpe'olo-olo saru wua delima atuu. 26Gagi hinao asa nggiri-nggiri ka asa wua delima mpe'olo-olo lumimbuo lupino lemba meloe i bungkuno anu pinake tewala moweweu pesombaa, kana parenta-Do i Ue ndi Musa.

27Doweweuo lemba meloe i larono inso a lena alusu anu hinoru tiano i Haruni ka luwuno anano, 28serubani inso a lena alusu, peboo ulu anu tekosi inso a lena alusu ka saluara inso a lena alusu anu kinoloro banano, 29ka peboo ntonga mbo'u inso a lena alusu anu kinoloro banano, inso a bana wungo motu'a, wungo mongura ka motaha motu'a, anu sinula, kana parenta-Do i Ue ndi Musa. 30Mpoweweu ira lempe inso a wulaa mpena peramba-ramba mempori a ulu ka monggori binuri i wawono kana nggorino sinsi pontondoni, ”mempori ndi Ondae i Ue.” 31A lempe atuu dopasao koloro wungo motu'a ta pinetanggoako a mpeboo ulu i wawono, kana parenta-Do i Ue ndi Musa.

Poko'umariano Kema Mempori

39:32-43

32Kanatuumo i pinoko'umari luwuno anggaa a Ngkema Mempori, Kema Tepotowoa atuu. To Isaraeli meweweuo montonda kana parenta-Do i Ue ndi Musa. Kanatuumo domeweweuo.#Pel. 35:10-19 33Domewawao Kema Mempori atuu ndi Musa, tenda saru luwuno parewano, kai, dopi, keu montowea, karuno ka po'empehi karuno, 34ato inso a ngkuli bimba lakino anu pinarada motaha, ato inso a ngkuli alusu, sawu pelingo poborungi, 35burua po'iangano songka saru luwuno keu ponselano, ka ulono pesintuwua, 36meda saru luwuno parewano ka roti pesomba, 37hulu mekaru inso a wulaa mpena saru potudano luwuno huluno ka luwuno parewano ka lana pompokomewanta, 38meda pontunua pesomba inso a wulaa, lana po'urapi, dupa inso a rampa-rampa anu mo'ahi woono, sawu pelingo a mpewowa kema, 39meda pontunua pesomba inso a mala saru tarali malano, luwuno keu ponselano ka luwuno parewano, bolusa pewo'ohia saru empehino, 40sawu pelingo olotino kintala, karuno saru empehino, sawu pelingo tiano pewowa langkai kintala, kolorono ka pandorano ka luwuno parewano tiano anggaa mowangu Kema mempori, Kema Tepotowoa atuu, 41sangka pompelangkai pakea moweweu pesombaa a mpo'ianga mempori, sangka mempori tiano sando mpesomba i Haruni ka sangkado luwuno anano pakeado mpopekakaako gagi sando mpesomba 42Kana parenta-Do i Ue ndi Musa, kanatuumo domeweweuo to Isaraeli luwuno anggaa atuu. 43Ka i Musa kumitao luwuno anggaa atuu. Mentee ntu'u domeweweuomo kana parenta-Do i Ue. Kanatuumo domeweweuo. Ka i'amba rumonso ira i Musa.

Currently Selected:

Peluarakoa 39: XMZ

Highlight

Compare

Copy