Peluarakoa 36

1Kanatuumo dopo'angga i Besale'eli ka i Aholiabi, kanatuu koa mbo'u sompo mia anu hinao pandeno, anu Dopoweeakono i Ue pande ka ponto'ori, ranta ka doponto'ori mpoweweu luwuno anggaa mpowangu po'ianga mempori, kana perenta-Do i Ue.”

2Ka i'amba i Musa moboio i Besale'eli, i Aholiabi ka sompo mia anu pande mo'angga, anu Dopoweeakono i Ue pande i laro ngkoroino, sompo mia anu telelu aroano aiwa me'anggao anggaa atuu. 3Ondae mentarimao inso ndi Musa luwuno pesomba pinesusua anu mewinawado to Isaraeli pakea a anggaa mowangu po'ianga mempori. To Isaraeli da kongkodo mpowawa pompowee a po'eheno aroado ndi Musa sompo mo'oru. 4Ka i'amba luwuno mia pande anu me'anggao luwuno anggaa a mpo'ianga mempori, asa mia ka asa mia bintao anggaano anu kontongaano inanggano, 5ka dompotae ndi Musa, ”Mewinawado palili hadioopo sekonopo anu kineredo mpoweweu anggaa kana parenta-Do i Ue.” 6Ka i'amba i Musa metena ka ipinalele a luwuno pekemaa kanandio, ”Moiko tama ke beine siimo mbo'u imperokuhi mpowawa te'asa rupa gagi pesomba pinesusua a mpo'ianga mempori.” Kanatuumo dome'inonto palili mpowawa mbo'u pesomba. 7Hangano sangka anu mehinawedo weweuno luwuno anggaa sompoomo, tendeano torea.

Moweweu Kema Mempori

36:8-38

8 # Pel. 26:1-37 Ka i'amba luwuno mia anu pande mo'angga, i olodo mia mpo'angga atuu, mpoweweu Kema Mempori inso a hopulu sawu tenda. Sangkano inso a lena alusu anu kinoloro banano ka bana wungo motu'a, wungo mongura, ka motaha motu'a. Sawu atuu domensulao megambara kerubi. 9Ondauno sompo sawu tenda rua pulu ka oalu hiku ka maluano sompo sawu tenda opaa hiku. Luwuno sawu tenda atuu mengkena songkano. 10Olima sawu tenda pinosombu asa ka anu susua, ka anu olima mbo'u, pinosombu asa ka anu susua. 11A nsawu anu pinosombu amba-ambano, i wiwino sawu tenda anu i tompano ntu'u, wineweu bolo-bolono anu kinoloro inso a nsawu wungo motu'a ka kanatuu koa mbo'u i wiwino sawu tenda anu i tompano ntu'u a nsawu pinosombu ko'orua. 12Lima pulu bolono wineweu tiano sawu tenda anu asa ka lima pulu mbo'u bolono a sawu tenda anu i tompano ntu'u a nsawu pinosombu ko'orua, gagi luwuno bolono atuu ntepopo'aro. 13Wineweu lima pulu kai wulaa ka luwuno kai atuu onae pinake monsombuako orua tenda, gagi asa Kema Mempori. 14Luwuno sawu tenda atuu wineweu inso a wulu bembe gagi atono kema anu borungio Kema Mempori, hopulu ka aasa sawu tenda wineweu. 15Ondauno sompo sawu tenda, tolu pulu hiku ka maluano sompo sawu tenda opaa hiku. Hopulu ka asa sawu tenda atuu mengkena songkano. 16Olima sawu tenda atuu sinombu gagi asa, ka onoo sawu tenda sinombu mbo'u gagi asa. 17I wiwino asa sawu tenda anu i tompano ntu'u a nsawu sinombu amba-ambano, wineweu lima pulu bolono anu kinoloro ka lima pulu mbo'u bolono wineweu i wiwino asa sawu tenda a nsawu sinombu ko'orua. 18Lima pulu kai mala wineweu ponsombu Kema atuu kai tepe'asa. 19Kanatuu koa mbo'u borungino i wawono Kema atuu, wineweu inso a ngkuli bimba lakino anu pinarada motaha ka boru inso a ngkuli alusu i wawono mbo'u.

20A Ngkema Mempori atuu, wineweu dopi inso a ngkeu akasia anu pinontade moleo, 21sompo dopi hopulu hiku ondauno ka maluano asa ka entonga hiku. 22Sompo dopi hinao orua paso keu anu gagi pesombuano saru anu susua. Kanatuumo iwineweu luwuno dopino Kema Mempori. 23Rua pulu dopi wineweu i selatano Kema Mempori. 24Pato pulu po'empehi salaka wineweu i totono rua pulu dopi atuu, orua po'empehi i totono asa dopi, pentoroano orua paso keu ka orua po'empehi i totono sompo dopi petudano, pentoroano orua paso keuno. 25Kanatuu koa mbo'u i apano ko'orua Kema Mempori wineweu rua pulu dopi i utarano, 26saru pato pulu po'empehi inso a nsalaka: orua po'empehi i totono asa dopi ka orua empehino i totono sompo dopi petudano. 27I bungkuno Kema mempori, i sumooano oleo, wineweu onoo dopi. 28Orua dopi wineweu a orua siuno i bungkuno Kema Mempori. 29Orua dopi atuu pinotowo i totono, kanatuu koa mbo'u pinotowo i wawono a mala-mala anu asa atuu. Kanatuumo iwineweu orua dopi atuu a orua siuno. 30Gagi, oalu dopi saru po'empehi salaka hopulu ka onoo hadiono: orua po'empehi i totono asa dopi ka orua po'empehi i totono sompo dopi petudano.

31Wineweu mbo'u keu montowea inso a ngkeu akasia: olima keu montowea a luwuno dopi i'apano anu asa Kema mempori, 32olima keu montowea a luwuno dopi i apano anu susua Kema Mempori ka olima keu montowea a luwuno dopi i bungkuno Kema Mempori i somooano oleo. 33I tongano luwuno dopi atuu wineweu keu montowea, gagi montowea inso i tompano hawe i tompano. 34Luwuno dopi atuu inapiiako wulaa, luwuno mala-mala po'iangano luwuno keu montoweano, wineweu inso a wulaa ka luwuno keu montowea atuu inapiiako wulaa.

35Wineweu mbo'u pelingo inso a bana wungo motu'a, wungo mongura, motaha motu'a, ka lena alusu anu kinoloro banano. Pelingo atuu sinula megambara kerubi. 36A mpelingo atuu, wineweu opaa karuno inso a ngkeu akasia ka inapiiako wulaa, kaino inso a wulaa, ka i'amba pinoweweuako opaa po'empehi karuno inso a nsalaka tinawa.

37Wineweu mbo'u pelingo a mpewowano Kema atuu, anu sinula inso a bana wungo motu'a, wungo mongura, motaha motu'a ka lena alusu anu kinoloro banano, 38ka olima karuno saru kaino a ngkaruno atuu. Uluno ka luwuno ponsombuno inapiiako wulaa, ka olima po'empehi karuno atuu inso a mala.

Currently Selected:

Peluarakoa 36: XMZ

Highlight

Compare

Copy