Peluarakoa 35

Pepopoto'ori kai pinokomempori oleo Saba

35:1-3

1I Musa tumena ira luwudo bawaa Isaraeli mpepumpu. Ka i'amba motaeako ira, ”Ndiomo luwuno songka-Do i Ue anu ta tinonda ka wineweu. 2Onoo oleo tehineno moiko impo'angga anggaamiu, sine oleo ko'opitu, oleo Saba anu mempori ndi omiu, oleo penaa-naaa-Do i Ue. Sompo mia anu mo'angga anggaano oleo atuu, asalakono hinuku mate.#Pel. 20:8-11; 23:12; 31:15; 34:21; Ima. 23:3; Win. 5:12-14 3A oleo Saba, si mpopotuwu api maupo isua po'ianga miu.”

Pesomba pinesusua tiano Kema Mempori

35:4-29

4Motae i Musa a luwuno bawaa Isaraeli, ”Ndiomo pau peparenta-Do i Ue:#Pel. 25:1-9 5Impo'alamo inso i olomiu pesomba pinesusua tia-Do i Ue. Sompo mia anu telelu aroano, mowawa gagi pesomba pinesusua tia-Do i Ue: wulaa, salaka, mala, 6bana wungo motu'a, wungo mongura ka motaha motu'a, lena alusu, wulu bembe, 7kuli bimba lakino anu pinarada motaha, kuli alusu, keu akasia, 8lana pehulu, rampa-rampa weweua lana po'urapi ka weweua dupa anu mo'ahi woono, 9paramata kerisopara ka paramata anu ta pinotako a lemba epo ka tutuwi rada. 10Luwuno mia anu pande mo'angga ndi omiu asalakono dome'aiwa mpoweweu luwuno parenta-Do i Ue:#Pel. 39:32-41 11Kema Mempori, tenda ka borungino, kaino, dopino, keu montoweano, karuno ka empehino karuno, 12burua po'iangano songka ka keu ponselano, ulo pesintuwua ka pelingo poborungi, 13meda saru keu ponselano, ka luwuno parewano saru roti pesomba, 14karuno hulu pompokomewanta, saru parewano, huluno ka lana pehulu, 15meda pontunua pesomba dupa ka keu ponselano, lana po'urapi ka dupa inso a rampa mana mo'ahi, pelingo a mpewowano Kema Mempori, 16meda pontunua pesomba tinunu saru tarali malano, keu ponselano ka saru luwuno parewano, bolusa pewo'ohia saru pentoroano, 17pelingo po'oloti a kintala, karuno, empehino, ka pelingo a mpewowa langkai i kintala atuu, 18pandorano Kema Mempori ka pandorano kintala ka kolorono, 19sangka pompelangkai mompasilolonga pesombaa a mpo'ianga mempori, ka sangka mempori tiano sando mpesomba i Haruni ka sangkado luwuno anano anu sando mpesomba mpopekakaako.”

20Ka melako iramo luwu bawaa Isaraeli inso i arono i Musa. 21Umarino atuu mehawe iramo sompo mia anu telelu aroano, mpowawa pesomba pinesusua anu moleo aroano ndi Ondae i Ue, poweweu Kema Tepotowoa, ka luwuno pesombaa i larono, ka sangka mempori. 22Mehawe iramo sompo mia anu moleo aroano, tama maupo beine, mpowawa tole-tole enge, tole-tole biri, sinsi pontondoni ka enu-enu, ka luwuno peramba-ramba wulaa. Kanatuu koa mbo'u, sompo mia anu mompowee pesomba tinande inso a wulaa ndi Ondae i Ue. 23Kanatuu koa mbo'u sompo mia anu mowawa hapa hinado: bana wungo motu'a, wungo mongura, ka motaha motu'a, lena alusu, wulu bembe, kuli bimba lakino anu pinarada motaha ka kuli alusu. 24Sompo mia anu ta mompowee pesomba pinesusua inso a nsalaka ke mala, winawa pesomba atuu tia-Do i Ue, ka sompo mia anu hinao keu akasia, iwawao weweua luwuno parewa mpesomba. 25Sompo beine anu pande mongkoloroako kaeno, ka iwawao bana wungo motu'a, wungo mongura, ka motaha motu'a, ka lena alusu, anu kinolorono atuu. 26Luwuno beine anu pande ka telelu aroano, mongkoloro wulu bembe. 27Luwuno petewawa mpowawa paramata kerisopara ka paramata anu ta pinotako a lemba epo ka tutuwi rada, 28rampa-rampa ka lana pehulu, ka lana po'urapi ka dupa mo'ahi woono. 29Sompo tama ke beine, anu moleo aroano mowawa te'asa rupa tiano anggaa petena-Do i Ue ndi Musa ka iwineweu. To Isaraeli mewawao gagi pompowee a po'eheno aroado ndi Ondae i Ue.

Mia pande ka pesomba anu lulua

35:30–36:7

30Motae i Musa a nto Isaraeli, ”I mengkitaomo, Dotisoomo i Ue i Besale'eli anano i Uri anano i Huri, inso a nsuku Yehuda,#Pel. 31:1-11 31ka bukeakoomo pabawano Penaa-Do Ue Ala, saru monto'ori, mokonto'orio, pande mompewowolo ka mperupa-rupa ponto'orino, 32kai poweweu mperupa-rupa sinongkapi anu ta inangga inso a wulaa, salaka ka mala, 33saru mo'aha watu paramata anu ta pinodede, monggori keu ka umanggao luwuno anggaa anu sinongkapi atuu. 34Ondae i Ue moweeakono mbo'u pande a ngkoroino kai pompaguru, kanatuu koa mbo'u ndi Aholiabi anano i Ahisamaki inso a nsuku Dani. 35Dopoweeako ira pande moweweu luwuno anggaa anu lano inanggano, puu mpopewowolo ka puu mpoweweu hinoru inso a bana wungo motu'a, wungo mongura, motaha motu'a, ka lena alusu, ka gagi mbo'u puu mponsula. Ondae moweweu mperupa-rupa anggaa ka moweweu mperupa-rupa anu ta sinongkapi.

Currently Selected:

Peluarakoa 35: XMZ

Highlight

Compare

Copy