Peluarakoa 33

Ondae i Ue montena Mala'eka-Do

33:1-6

1 # Teg. 12:7; 26:3; 28:13 Mepau Iramo i Ue ndi Musa, ”Impelungkamo inso i ndi'ai, omue saru tongku anu winawamu mpeluarako inso i wita Masiri, a wita anu Kudandiomo mesumpa ndi Burahima, ndi Saki ka ndi Yako, kanandio: A inulemu Aku meweengakono wita andio. 2Aku montena asa mala'eka melempa i aromu anu ta sumaari ira to Kana'a, to Amori, to Heti, to Perisi, to Hewi ka to Yebusi. 3Komiu mpewinso a wita anu hadio susu ka siu hoani. Sine nahi Aku melempa i olomiu, kasi Kupepatekomiu a nsala, hangano omiu tongku anu me'ulu watu, kasi Kuropu komiu a nsala.” 4Mansado merongeo tongku atuu pau anu mongkokongiri atuu, mponsabangi iramo. Nahina maupo te'asa mia mompake peramba-ramba. 5Mepau Iramo i Ue ndi Musa, ”Pauako ira to Isaraeli: Omiu tongku anu me'ulu watu, ande-andeno melempa Aku i olomiu maupo tesarai, manasa Kuropu komiu. Kanandio-andio imelolohio peramba-ramba miu, ka Aku mokomanasao hapa anu ta wineweu-Ku ndi omiu.” 6Onaemo pu'uno to Isaraeli nami dompopake mbo'u peramba-ramba mompu'u inso i torukuno Hore.

Kema Tepotowoa ibungkuno pekemaa

33:7-11

7Kanatuumo i Musa, wela umalao kema ka ipasao i bungkuno pekemaa, olai inso a mpekemaa atuu. Ineeakono Kema Tepotowoa. Sompo mia anu umungke Ira i Ue, ta lumako a Ngkema Tepotowoa atuu anu mo'ia olai inso a mpekemaa. 8Sompo ilako i Musa a Ngkema Tepotowoa atuu, luwuno tongku pentade, sompo mia mentade a mpewowano kemano. Dompoporooo i Musa ranta ka ipewinso a laro Kema Tepotowoa atuu. 9I tempono i Musa mewinso a laro Ngkema atuu, metiiomo seru-Do Ue Ala ka menaa-naa a mpewowano Kema atuu, ka Do'amba i Ue mepauakono i Musa. 10Sompo domengkitao luwuno tongku atuu seru-Do Ue Ala menaa-naa a mpewowano Kema atuu, mpentade ira ka dompenggolontu mpesomba, sompo mia a mpewowa kemano. 11Ondae i Ue mepau ndi Musa tepopo'aro kana asa mia mepauakono walino. Umarino atuu mekuleomo i Musa a mpekemaa, sine i Yosua anano i Nunu, tetenaano, anu da mongura, nahi bintao Kema atuu.

I Musa i arono maramba-Do i Ue

33:12-23

12Motae i Musa ndi Ondae i Ue, ”Omiumo anu mepau ndi ongkue: ’Wawa iramo tongku andio melako!’ Sine nahi Ipauakune, isema anu Komiu tumenao merongaakune. Kahinaano mepau Komiu: ’Kuto'oriko saru neemu ka mohaweko mbo'u pompehohawa i aro-Ku.’ 13Kanandio-andio, tewala mohawe aku pompehohawa i aro-Miu, Ipauakune po'ehe-Miu ranta ka kuto'ori-Komiu, ka kukongko mpiha mohawe pompehohawa i aro-Miu. Ipewowoloo tongku andio bawaa-Miu.” 14Ka i'amba mepau Ira i Ue, ”Ongkuemo anu kumongkomiko ka moweeko rodoa.”

15Motae i Musa ndi Ondae, ”Tewala komba Omiu kumongkomi kami, si wawa kami mpelungka inso i ndi'ai. 16Gagi kana'umpe ira mento'orio mia, nine mohawe akumo pompehohawa i aro-Miu, ongkue ka bawaa-Miu andio? Kombake hangano Omiu kumongkomi kami, ranta omami, ongkue ka bawaa-Miu pinesusua inso a luwuno tongku i wawontolino?” 17Mepau Iramo i Ue ndi Musa, ”Maupo anu pinaumu andio Aku mokogagio, hangano omue mohawekomo pompehohawa i aro-Ku ka Kuto'orio koroimu saru neemu.”

18Sumangki i Musa, ”Po'ineeomo ka Ipopokitao maramba-Miu ndi ongkue!” 19Ka i'amba pau-Do i Ue, ”Aku mokogagio luwuno mewanta-Ku telalo i aromu, ka ta mebooliako nee-Ku Ue i aromu; Aku moweeakono pompehohawa a mia anu Kupoweeakono pompehohawa, ka Aku mehohawao mia anu pinehohawa-Ku.”#Rom. 9:15 20Pau-Do mbo'u, ”Nahi komoko kitao rupa-Ku, hangano nahina mia anu kumita Aku ta tuwu.” 21Ka i'amba pau-Do i Ue, ”Hinao po'ianga umpeda ndi Ongkue, i wawono torukuno watu atuu moiko pentadeamu. 22Tempono itelalo maramba-Ku, Aku numaako i apino torukuno atuu ka Aku lumingoiakomu kae-Ku, ranta ka Kutelalo. 23Ka Ku'amba padiio kae-Ku ka kokumitao bungku-Ku, sine rupa-Ku nahi ta tengkita.”

Currently Selected:

Peluarakoa 33: XMZ

Highlight

Compare

Copy