Peluarakoa 32

Ana nsapi wulaa

32:1-35

1Mansado mengkitao tongku atuu, nine i Musa tehineomo nahi hori metii inso i torukuno atuu, mpepumpu iramo melimbuo i Haruni ka dompotaeakono, ”Aiwa, poweweuakami Ue Ala anu ta melempa i aromami. Hangano i Musa, mia anu wawa kita mpeluarako inso i wita Masiri, nahi kimento'orio hapa anu gagi ndi onae.”#Tin. 7:40#Win. 9:7-29 2Motaeomo i Haruni ndi ondae, ”Imelolohio tole-tole wulaa inso a birido kombia miu, ana miu anu tama, ana miu anu beine ka imewawao luwu ndi ongkue.” 3Ka do'amba luwuno tongku atuu melolohio tole-tole wulaa a birido ka domewawao ndi Haruni. 4Itarimao inso a ngkaedo, ka iweweuo tinadeno mompake parewa ka iweweuo ana nsapi wulaa tinawa. Ka do'amba mpotae, ”Hei Isaraeli ndiomo Ue Alamiu, anu tumaate komiu mpeluarako inso i wita Masiri!”#Tin. 7:41 5Mansano kumitao i Haruni anu gagi atuu, mowanguomo meda pontunua pesomba i arono ana nsapi atuu. Ka i'amba mebooli, ”Tisomo oleo langkai-Do i Ue!” 6Tisomono mo'o-mo'oru mpopesombaako iramo pesomba tinunu ka pesomba tekaduduia. Ka do'amba tongku atuu mpentoro mpongkaa ka mpo'inu, umarino atuu mpentade pada mpewoo-woo.#1Kor. 10:7

7Mepau Iramo i Ue ndi Musa, ”Te'alamo petii, hangano tongkumu anu winawamu mpeluarako inso i wita Masiri, mosa'oomo gaudo. 8Tedoa ira ronga mepansia inso a nsala anu Kuparentaako ira. Mpoweweu iramo ana nsapi tinawa ka dompenggolontu mpesombaio. Mpopesombaako ira pesomba ndi onae, ka dompotae: Hei Isaraeli ndiomo Ue Alamiu anu tumaate komiu mpeluarako inso i wita Masiri.” 9Ka Do'amba mepau i Ue ndi Musa, ”Kukita iramo tongku andio. Mentee ntu'u, ondae tongku anu me'ulu watu. 10Kanandio-andio, po'ineemo Aku mohuku! Po'ineeomo tekuda-Ku tensila ndi ondae, ka Aku mepate ira. Sine omue Aku mokogagiko tongku anu langkai.” 11#Pod. 14:13-19Sine i Musa mo'arahako mokomolusao aroa-Do i Ue, Ue Alano, ipotae, ”Tembio Ue tekuda-Miu kai tensila a bawaa-Miu, anu Iwawa iramo mpeluarako inso i wita Masiri a langkaino pabawa-Miu ka kae-Miu anu moroso? 12Tembio to Masiri ka domansa mpotae: Lano tinoo mosa'o, Dowawa ira mpeluarako, mepate ira ia mentorukuno ka domeropu inso i wawontolino? Ipomuleomo aroa tekuda-Miu anu tensila atuu ka Ibaliomo tinoo-Miu mompotiiako ira masolaa a bawaa-Miu. 13#Teg. 17:8; 22:16-17Ipewowolo ira i Burahima, i Saki ka i Isaraeli, ondae tetenaa-Miu atuu. Ndi ondae mesumpa Komiumo ia nee-Miu ka Ipepau, Aku weweuo inulemu kana hadiono anano wula i langi, ka luwuno wita anu Kudandia komu andio Aku weeako ira inulemu, ka dompe'ueo ranta nahina tampulaano.” 14Umarino atuu, Dobalio i Ue tinoo-Do mompotii masolaa a bawaa-Do.

15Umarino atuu mewoliliomo i Musa, ka ipetii inso i torukuno, mowawa orua watu buriano songka atuu a ngkaeno, orua watu buriano songka anu meburi mompombali, i arono ka i bungkuno. 16Orua watu buriano songka atuu wineweu-Do Ue Ala ka binuri anu ngginori a orua watu buriano songka atuu binuri-Do Ue Ala. 17Mansano rumongeo i Yosua, peboolido tongku atuu, ipotae ndi Musa: ”Hinao pebooli peteaa a mpekemaa.” 18Sine sumangki i Musa, ”Komba pebooli poponangi, komba koa mbo'u pebooli mentenangi, sine suarado mia mpenani, onaemo anu rinongeku.” 19Mansano umpeda i Musa a mpekemaa, ikitao anano sapi atuu ka mia mpenari-nari, onaemo kai tensila tekudano. Ipetadiakono orua watu buriano songka atuu inso a ngkaeno ka irawo-rawoomo, a mpu'u torukuno atuu. 20Umarino atuu i'alao anano sapi anu wineweudo, itunuo kai isao ranta motutu. Ka i'amba rumawoo a wawo uwoi ka itena ira to Isaraeli me'inuo.

21Mesikeno i Musa ndi Haruni, ”Hapa wineweudo tongku andio ndi omue, ranta kau pokohinao hala tedoa langkai ndi ondae?” 22Sumangki i Haruni, ”Siipo ari itekuda, ueku! Lano ito'orio ueku, tongku andio gaudo mosa'o!” 23Mpotae ira ndi ongkue, ”Aiwa, poweweua kamimo Ue Ala, anu ta melempa i aromami. Hangano i Musa mia anu wawa kitamo mpeluarako inso i wita Masiri, nahi kimento'orio hapa anu gagi ndi onae.” 24Onaemo ka kupotaeako ira, ”Isema anu hinao wulaano asalakono ilolohio ka ipeweengakono ndi ongkue. Kupetendeakono a laro api, meluarakoomo anano sapi andio.”

25Ikitao i Musa nine tongku atuu gagi ira memo'ila, hangano ipo'inee ira i Haruni ka domemo'ila, ranta kai gagi pengingisiado iwalido. 26Ka i'amba mentade i Musa a mpewowa langkai pekemaa, ka ipotae, ”Isema anu metenunu ndi Ondae i Ue, aiwa ndi ongkue!” Onaemo ka dompepumpu luwu to Lewi umpeda ndi onae. 27Ipotaeako ira: ”Kanandiomo pau-Do i Ue, Ue Alado to Isaraeli: Sompo mia metampio ponaino a ntongano. Impelempamo ngkoraane, ngkoramai telalo a mpekemaa inso a mpewowa langkai, lumako a mpewowa langkai. Sompo mia mepateo pepaekompono, wali-walino, ka pehori kemano.” 28To Lewi meweweuo kana pinauno i Musa. I oleo atuu bara'ura tolu nsowu mia mate inso a tongku atuu. 29Ka i'amba motae i Musa, ”Oleo andio merinonso komiu ndi Ondae i Ue, hangano sompo mia umewaio anano tama ka luwuno pepaekompono, onaemo kai mpohawe ronso oleo andio.”

30Tisomono motaeomo i Musa a tongku atuu, ”Mpoweweu komiumo hala langkai. Kanandio-andio aku mewuatako me'aro ndi Ondae i Ue. To pomperorohimokoa ka kupokompo'ema pesintuwua a hala miu atuu.” 31Ka i'amba i Musa wali me'aro ndi Ondae i Ue, ka ipotae, ”Ku'emao ndi Omiu Ue, tongku andio mpoweweu iramo hala langkai, hangano mpoweweu anu pinesombaido inso a wulaa tiano koroido. 32Sine kanandio-andio, po'ineeomo kai oninio halado. Tewala naahi, po'ineeomo ipahihio neeku inso a wunta anu binuri-Miu.”#Pud. 69:29; Meng. 3:5 33Mepau Iramo i Ue ndi Musa, ”Isema anu tehala ndi Ongkue, neeno Aku pahihio inso a wunta-Ku. 34Kanandio-andio lakomo, wawa iramo tongku atuu a mpo'ianga anu umariomo Kupauakomu. Mala'eka-Ku ta melempa i aromu. Sine i oleo pombaloa-Ku, mia atuudo Aku humuku ira hangano halado.”

35Kanatuumo Dohuku ira i Ue tongku atuu, hangano hapa anu wineweudo a ana nsapi wineweuno i Haruni.

Currently Selected:

Peluarakoa 32: XMZ

Highlight

Compare

Copy