Peluarakoa 25

Pontiso mowangu Kema Mempori

Pesomba anu pinesusua

25:1-9

1 # Pel. 35:4-9 Mepau Iramo i Ue ndi Musa, 2”Pauako ira to Isaraeli, ka dompopumpu pesomba pinesusua ndi Ongkue. Asalakono impopumpu pesomba pinesusua ndi Ongkue inso anu telelu aroano. 3Ndiomo pesomba pinesusua anu komiu mepumpuo inso ndi ondae: wulaa, salaka, mala, 4bana wungo motu'a, anu wungo mongura ka motaha ntu'u, lena alusu ka wulu bembe, 5kuli bimba laki anu pinarada motaha, kuli alusu ka keu akasia 6lanano hulu, rampa-rampa weweua lana po'urapi ka weweua dupa anu mo'ahi woono, 7paramata kerisopara ka paramata anu mempinotako a lemba epo ka a ntutuwino rada.

8Asalakono ka dompoweweu po'ianga mempori, ka Kupo'ia i olodo. 9Montonda luwuakoano anu Kutisoakomu gagi pandirino Kema Mempori ka luwuakoano parewano, kanandiomo imeweweuo.”

Burua Songka

25:10-22

10 # Pel. 37:1-9 ”Asalakono dompoweweu burua pedandia inso a ngkeu akasia, orua ka entonga hiku ondauno, asa ka entonga hiku maluano ka asa ka entonga hiku mantandeno. 11Asalakono apiiakono wulaa mpena inso i larono ka i bungkuno ka i wawono poweweuakono simpi wulaa lumimbuo. 12Asalakono poweweu te'opaa mala-mala wulaa tiano burua pedandia atuu ka potakoo a opaa karuno, orua mala-mala i apano anu asa ka orua mala-mala i apano anu susua. 13Asalakono poweweu keu ponsela inso a ngkeu akasia ka apiiakono wulaa. 14Keu ponsela atuu asalakono winsoo a laro mala-mala i apano burua pedandia atuu, hinaomo keu atuu, burua pedandia pinokotande. 15Keu ponsela atuu asalakono mo'ia mpiha a laro mala-mala, si binuta.

16 # 1Mok. 8:9; Ibr. 9:4 Songka anu Aku weeakomu, asalakono naao a laro burua pedandia atuu. 17Asalakono poweweu mbo'u ulo pesintuwua inso a wulaa isa'a, orua ka entonga hiku ondauno ka maluano asa ka entonga hiku. 18Asalakono poweweu orua kerubi inso a wulaa pinalu a orua tapuno ulo pesintuwua. 19Weweuomo asa kerubi i tapuno i ndi'ai ka asa kerubi i tapuno raane. Asalakono imeweweuo orua kerubi atuu me'asa saru ulo pesintuwua i wawono orua tapuno.

20Orua panino kerubi atuu asalakono tewile i wawono, borungio ulo pesintuwua atuu ka rupado tepo'aro. Rupado kerubi orua atuu me'aro a ulo pesintuwua.

21Ulo pesintuwua atuu asalakono naao i wawono burua pedandia ka a laro burua pedandia atuu naao songka anu Aku weeakomu. 22I ra'aimo Aku tepohaweakomu; inso i wawono ulo pesintuwua atuu i olono orua kerubi iwawono burua songka atuu, Aku mepauakomu mongkona luwuakoano anu Aku tumenaakomu ka domempinauako to Isaraeli.”

Meda ponaapa roti pesomba

25:23-30

23 # Pel. 37:10-16 ”Asalakono poweweu meda inso a ngkeu akasia, orua hiku ondauno, asa hiku maluano ka asa hiku mantandeno. 24Asalakono apiiakono wulaa mpena ka poweweu simpi wulaa lumimbuo. 25Lumimbuo meda atuu asalakono poweweuakono tengino i wiwino asa pelengkae maluano ka simpi wulaa lumimbuo tengino atuu. 26Asalakono poweweua te'opaa mala-mala wulaa tiano meda atuu ka pasao i opaa siuno a opaa karuno. 27Mala-ala atuu asalakono tepasa umpeda tengino meda gagi po'iangano keu ponsela ka ipikotande koa meda atuu. 28Asalakono poweweu keu ponsela inso a ngkeu akasia ka apiiakono wulaa, ka keumo atuu pe'inia ba tatinande meda atuu. 29Asalakono poweweuakono sempe, sangkirino, takeano ka tonde mekaru, anu pinake a mpesomba tinawa. Luwuno atuu wineweu inso a wulaa isa'a. 30#Ima. 24:5-8 Asalakono ponaa mpiha roti pesomba i aro-Ku a wawo meda atuu.”

Karuno hulu inso a wulaa

25:31-40

31 # Pel. 37:17-24 ”Asalakono poweweu hulu mekaru inso a wulaa mpena anu pinalu. Moiko karuno maupo sampano, lewekino ka palono ka bungano asalakono me'asa saru hulu mekaru atuu. 32Onoo sampano meluarako inso i apano. Otolu sampano hulu mekaru atuu inso i apano anu asa ka otolu sampano inso i apano anu susua. 33Otolu lewekino kana bunga badama a sompo sampano i apano anu asa, saru palono ka bungano, ka otolu lewekino anu mengkena, a sampano anu susua saru palono ka bungano. Kanandiomo weweuo a onoo sampano anu meluarako inso a hulu mekaru. 34A hulu mekaru atuu asalakono hinao opaa lewekino kana bunga badama saru palono ka bungano. 35Asalakono hinao mbo'u asa palono mo'asao sampano anu metaro amba-ambano anu meluarako inso a hulu mekaru atuu, asa palono a sampano anu metaro ko'orua ka asa palono a sampano anu metaro ko'otolu. Kanandiomo weweuo onoo sampano anu meluarako inso a hulu mekaru atuu. 36Palono ka sampano atuu asalakono me'asa saru hulu mekaru atuu ka luwuno atuu wineweu inso a wulaa mpena anu pinalu, inso a asa watu anu mengkena. 37A hulu mekaru atuu asalakono poweweu opitu hulu ka luwuno hulu atuu asalakono pinasa i wawono hulu mekaru atuu kai wantahio anu i arono. 38Sipino ka pontineano asalakono wineweu inso a wulaa isa'a. 39Hulu mekaru atuu saru luwuno parewano asalakono weweuo inso a wulaa mpena asa talenta. 40#Tin. 7:44; Ibr. 8:5Ka pekokoongakono, ka uweweuo luwuakoano atuu montonda pandiri anu umariomo Kutisoakomu i wawo ntorukuno atuu.”

Currently Selected:

Peluarakoa 25: XMZ

Highlight

Compare

Copy