Peluarakoa 12
12
Mongkona pompelangkai pasa
12:1-28
1 #
Ima. 23:5; Pod. 9:1-5; 28:16; Win. 16:1-2 Mepau Iramo i Ue ndi Musa ka ndi Haruni i wita Masiri, 2”Wula andio tumondonio pompu'uano luwuakoano wula ndi omiu; onaemo wula ko'aasa a mpodoamiu wula sompo ta'u. 3Pauako iramo luwuno bawaa Isaraeli: Ia tanggala hopulu wula andio, asalakono sompo mia mo'ala asa ana bimba tiano sompo sombori, montonda pepe'etuado. 4Sine tewala tedei lahi miano asa nsombori, moiko domperonga-ronga saru pehori rahado mposumbele asa ana bimba, montonda hadiono mia; anu domentasereo sompo dompetiao montonda tekonano asa mia. 5Moiko impo'ala ana bimba ke bembe, sine asalakono anu nahina tataano, lakino, metinuwu asa nta'u. 6Bimba ke bembe atuu, asalakono imponsiao hawe tanggala hopulu ka opaa wula andio; ka i'amba luwuno bawaa Isaraeli mpepumpu mposumbele tempono ngkiniwia. 7Ka i'amba inala reano tedei kai hinahiako a orua karuno pewowa ka pontoweano i wawono, a luwuno raha po'iangaado mengkaano. 8Bauno asalakono rinarami ka i'amba kinaa a wongi koa atuu saru roti anu nahi peragi ka inahu mopa'i. 9Si mengkaano momata ke anu ninahu uwoi; tendeano rinarami ia api, luwuno saru uluno ka witino ka ihi larono. 10Si mpopetorea bauno ke hapanomo koa hawe mo'oru. Tewala hinao anu torea hawe mo'oru, imentunuo ranta ka ipingko. 11Kanandio ba imengkaano: Impeboo ntonga, mpesandala ka tuko ia ngkae; Imempari-pario mengkaano. Onaemo Pasa pompelangkaimiu ndi Ondae i Ue.
12Nde ia wongi andio Aku melempa sumompoo wita Masiri, Aku mepate ira luwuno ana amba-ambano, moiko anano mia hawe anano pinotuwu, ka luwuno lahumoado to Masiri Aku humuku ira. Ongkuemo Ue. 13Rea atuu gagi tondonino raha po'iangamiu. Tewala Kukitao rea atuu, Aku lumalokomiu. Gaagi nahi tahina pohuku matea ndi omiu tempono Kuhukuo wita Masiri. 14#Pel. 23:15; 34:18; Ima. 23:6-8; Pod. 28:17-25; Win. 16:3-8Oleo andio ta gagi oleo pepopoto'ori ndi omiu. Asalakono impelangkaio oleo atuu gagi oleo langkai-Do i Ue hawe a inulemiu. Kanatuumo sompo ta'u asalakono impelangkaio mpiha gagi pompakosi. 15Opitu oleo tehineno imempokaa roti anu nahi peragi. Oleo ko'aasa ragi anu kongko a laro rahamiu imentadio, nde i larono opitu oleo atuu, isema mia anu mongkaa hapamo koa anu meragi, mia atuu linuarako inso a bawaa Isaraeli.
16Moiko i oleo amba-ambano, kanatuu koa mbo'u oleo ko'opitu, impoweweu tepumpua mempori. Ia orua oleo atuu, nahi moiko impo'angga hapamo koa sangkadio mpopatinda kaangamiu oleo atuu. 17Gagi asalakono impelangkaio Oleo Langkai Roti Nahi Peragi, nde ia oleo atuu Kuwawao pebaresimiu mpeluarako inso i wita Masiri. Asalakono ka impelangkaio oleo atuu ranta hawe a inulemiu. Onaemo pompakosi ranta nahina tampulaano. 18Ia wula ko'aasa, tanggala hopulu ka opaa wula atuu tempono ngkiniwia, asalakono impokaa roti nahi peragi, hawe ia tanggala rua pulu ka asa wula atuu tempono ngkiniwia. 19Opitu oleo tehinenio kasihina ragi i rahamiu, nde mia anu mongkaa hapamokoa anu meragi, asalakono mia atuu linuarako inso a bawaa Isaraeli, moiko mia hawe maupo to Isaraeli. 20Si mpokaa hapamo koa anu mompake ragi; ba isuamokoa impo'ia impokaamo roti anu nahi peragi.”
21Ka i'amba moboi ira i Musa luwuno mia memota'u to Isaraeli, ka ipotaeako ira, ”Imelakomo mpo'ala bembe ke bimba tiamiu asa mpinu'u ka imensumbeleomo ana bimba Pasa. 22Imempo'ala te'asa nte'u hisopi, kai emoo a rea anu ninaa a bolusa, ka rea atuu pahihio a orua karuno pewowa ka a montoweano i wawono. Wongi atuu, nahina maupo te'asa mia ndi omiu meluarako inso a laro raha hawe mo'oru. 23#Ibr. 11:28Ka Ondae i Ue melempa sumompoo humukuo luwuno wita Masiri. Itempono Dokitao rea a orua karuno pewowa ka montoweano iwawono atuu, Ondae i Ue Ira lumaloo pewowa atuu ka nahi Dopo'ineeo mala'eka pompepate mewinso a laro raha humuku komiu.
24Omiu saru luwuno anamiu asalakono imeweweuo songka andio ranta nahina tampulaano. 25Tewala mehawe komiumo ia wita anu Ira weeakomiu i Ue ndi omiu, kana anu pinau-Do asalakono imeweweuo pesomba andio. 26Tewala mpesikeno ira anamiu ndi omiu, ’Hapa pengkonaano pesomba andio ndi'omiu?’ 27Asalakono imempauako ira: Onaemo atuu pesomba Pasa melangkai ira i Ue, anu lumaloo rahado to Isaraeli i wita Masiri, tempono Dohuku ira to Masiri, sine ndi ontae tetolosi luwuno rahato.” Onaemo ka dompenggolontu to Isaraeli mpesomba. 28Melako iramo to Isaraeli, ka domeweweuo kana petena-Do i Ue ndi Musa ka ndi Haruni, kanatuumo domeweweuo.
Pohuku kohopulu: Ana amba-ambano mate
To Isaraeli mpeluarako te'inso i Masiri
12:29-42
29 #
Pel. 4:22-23
Itempono ntonga wongi Ondae i Ue mepate ira ana amba-ambano i wita Masiri, mompu'u inso a ana amba-ambano i Pirao, anu mentoro a ngkadera poparentaano hawe a ana amba-ambano mia tinabua, anu mpo'ia a laro kineke pohukua, saru luwuno pinotuwu anu pine'anaako amba-ambano. 30Ka i'amba mewangu i Pirao wongi atuu saru luwuno pegawaino ka luwudo to Masiri. Ka terongeomo ponsabangia i wita Masiri, hangano luwuno raha hinao mia mate.
31Wongi atuu i Pirao moboi ira i Musa ka i Haruni, ka ipotae, ”Impeluarakomo luwu inso ndi omami ka imebintao wita mami, ka imelakomo mpesomba ndi Ondae i Ue, kana po'emamiu. 32Imewawa ira luwu pinotuwumiu, sapi, asa bawaa bembe bimbamiu, kana pinaumu atuu, sine imelakomo ka impekakai po'emaakune ngkuda ura tiaku.” 33To Masiri mbo'u dumadai ira to Isaraeli, ka dompopari-pari melako mebintao witado, nde dompotae, ”Kasi komba kimemate luwu.”
34Ka i'amba tongku atuudo menaao tarigu sinalo anu napi pinonaako ragi a mposaloa anu tinongo a laro nsawu ka domentandeo a oweado. 35#Pel. 3:21-22To Isaraeli meweweuo mbo'u kana pinauno i Musa, mpo'ema ira inso a nto Masiri sangka wulaa, salaka saru sawu. 36Ondae i Ue moweeako ira to Masiri aroa pompehohawa, onae ka do'ihiiako ira po'emado to Isaraeli atuu.
Kanatuumo wineweudo to Isaraeli rumontu ira to Masiri. 37Umarino atuu, mpelungka iramo to Isaraeli melako inso i Ra'amase te'aro i Sukoti, tama anu mpelempa ngkaru bara'ura nomo'etu nsowu mia nahi tedoa nana'ote ka kombiado. 38Hadio mia inso a tongku susua anu mpetonda ndi ondae ka tedoa hadio pinotuwudo, asa bawaa bembe bimba ka sapi.
39Tarigu sinalo anu mewinawado inso i wita i Masiri, domentunuo gagi roti bonggoli anu nahi peragi. Tarigu sinalo atuu nahi pinonaako ragi hangano mensinaari ira inso i wita Masiri ka mpodadusi ira, nami domente'alu popatinda kaangado.
40 #
Teg. 15:13; Gal. 3:17 To Isaraeli mpo'ia i wita Masiri pato etu ka tolu pulu nta'u tehineno.
41Umarino pato etu ka tolu pulu nta'u, kona i oleo atuu, mpeluarako iramo luwu baresino bawaa-Do i Ue inso i wita Masiri. 42Wongi atuu Ondae i Ue dumagai ira ka tumaate ira a mpelempado mpeluarako inso i wita Masiri. Wongi atuu nahi ira mengkolupeo to Isaraeli mpedagai ndi Ondae i Ue ranta a inuledo.
Potilalono songka pompelangkai Pasa
12:43-51
43Mepau Iramo i Ue ndi Musa ka ndi Haruni, ”Ndiomo songka mongkona Pasa: Mia mehawe si dompokaa bauno bimba pesomba Pasa. 44Sine ata anu inoli, tewala umariomo tinindi ka i'amba moiko ipongkaa. 45Mia mehawe ka mia mentinambo si domengkaano. 46#Pod. 9:12; Yoh. 19:36Bauno ana bimba Pasa atuu asalakono kinaa i laro asa raha; si mpowawa bauno maupo tedei meluarako inso i laro raha; maupo wuku si mempuduo. 47Asalakono luwuno bawaa Isaraeli mpelangkaio. 48Sine tewala hinao mia hawe, rodoomo mo'ia ndi omiu ka ineheno melangkaio Pasa ndi Ondae i Ue, asalakono luwuno tama pe'asa rahano mpetindi, umari atuu moikoomo dompetonda mpelangkaio Pasa. Ondae gagi iramo bawaa Isaraeli. Sine mia anu nahi petindi, si dompongkaa. 49Asa koa atora anu ta tinonda, moiko to Isaraeli maupo mia mehawe anu merodo iramo ndi omiu.”
50Luwudo to Isaraeli mpoweweu kanatuu. Kana songka-Do i Ue ndi Musa ka ndi Haruni, kanatuumo domeweweuo. 51I oleomo atuu Ondae i Ue wawa ira baresido to Isaraeli mpeluarako inso i wita Masiri.
Currently Selected:
Peluarakoa 12: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
