Peluarakoa 11

Pepopoto'ori mongkona pohuku pokotompa

11:1-10

1Mepau Iramo i Ue ndi Musa, ”Aku mompokohina mbo'u asa pohuku ndi Pirao ka a nto Masiri, umari atuu ta mo'ineekomiu inso i ndi'ai. Tempono ipo'ineekomiu, onae ta sumaarikomiu ntu'u inso i ndi'ai. 2Pauako iramo to Isaraeli, ka dompo'ema sangka wulaa ka salaka, singge mia moiko tama ka beine mo'ema a pehori rahano.” 3Onaemo ka Doweweu ira i Ue to Masiri mpe'aroa a nto Isaraeli atuu; laanopo i Musa onae asa mia anu tedoa pinelangkai i wita Masiri, moiko a mpegawaino i Pirao maupo a mpalili.

4Ipotae i Musa, ”Kanandio pau-Do i Ue: Tempono ntonga wongi, Aku melempa i olodo to Masiri. 5Luwuno ana aka i wita Masiri ira memate, mompu'u inso a ana amba-ambano i Pirao anu mentoro a ngkadera poparentaano hawe a ana amba-ambano ata beine anu mpo'aropi watu pogilia, kanatuu koa mbo'u luwuno anano pinotuwu anu amba-ambano. 6Ka tamo teronge ponsabangia anu tedoa mongkokongiri asa wawo wita Masiri, kana anu napi hori gagi ka nahi ta hori mbo'u gagi. 7Sine ndi ondae to Isaraeli, te'asa mokoa dahu nahi ta mosia mohopa, moiko a mia ka a mpinotuwu, kai mento'orio, nine Ondae i Ue moweweu teposisinggeno to Masiri ka to Isaraeli.” 8Ipotaeakono i Musa i Pirao, ”Luwuno pegawaimu ira me'aiwa mpenggolontu ndi ongkue, ka dompotae: ’Peluarakomo, omue saru luwuno palili anu mentondako!’ Umarino atuu, aku meluarako.” Meluarakoomo i Musa anu tensila tekudano bintao i Pirao.

9Mepau Iramo i Ue ndi Musa, ”Nahi ta merorongeakomu i Pirao, kai tetiangi hadiono petondoni kinohali-haliako anu wineweu-Ku i wita Mesiri.” 10Doweweuomo i Musa ka i Haruni luwuakoano petondoni kinohali-haliako i arono i Pirao. Sine Ondae i Ue mokomoteao aroano i Pirao, onaemo ka nahi eheako ira to Isaraeli melako inso ia witado.

Currently Selected:

Peluarakoa 11: XMZ

Highlight

Compare

Copy