EPESU 2
2
Luwuno onaemo pompehohawa
2:1-10
1 #
Kol. 2:13
I ndi'upua memate komiumo hangano luwuno polimpaimiu songka ka luwuno halamiu. 2Mentuwu komiu i larono, hangano imentondao salano wawontolino andio, hangano impetenunuio anu pabawa a poparentaa i laro meene, onaemo penaa anu kanandio-andio kontongaano mo'angga i olodo mia anu umewai Ira Ue Ala. 3Menteeano i ndi'upua luwumami tewinso koa mbo'u i olodo, tempono kimentuwu a po'eheno aroa ka mentondao po'eheno koroi ka pinewowolomami anu mosa'o. Menteeano omami onaemo mia anu asalakono mentinekudaako, mengkena kana ondae anu mehano. 4Sine Ondae Ue Ala anu kaeaako pompowee, hangano pompehohawa-Do anu langkai, anu Dowee kita, 5motuwu kitamo meronga saru Ondae i Kerisituu, maupo tomematemo hangano luwuno salato – hangano pompehohawa mengkinadudui komiu – 6ka ndi Ondae i Kerisituu Yesu Dowangu kitamo mbo'u ka mowee kita po'ianga meronga saru Ondae i suruga, 7ka Dotisoakita a tempo anu ta hawe kaeano pompehohawa-Do anu hadio ntu'u menunu saru moiko-Do ndi ontae ndi Ondae i Kerisituu Yesu. 8Nde hangano pe'aroa ka imengkinaduduiako pompe'ala-ala; atuu komba hasilino usahamiu, sine pompowee-Do Ue Ala, 9atuu komba hasilino inanggamiu: si hina mia anu mompelang-kalangkai. 10Hangano ontae andio wineweu-Do Ue Ala, pinokogagi ndi Ondae i Kerisituu Yesu ka tomeweweuo anggaa moiko, anu pinatinda-Do Ue Ala se'eluno. Inehe-Do ka tomentuwu i larono.
Pino'asa ndi Ondae i Kerisituu
2:11-22
11Onaemo pu'uno impewowoloomo, nine i ndi'upua omiu – anu komba to Yahudi montonda koroi, ondae anu meneeakono koroido ”tindi” meneeakomiu mia nahi mpetindi, onaemo petindi ngkoroi anu inanggano kaeno mia, – 12nine tempo atuu nahi imento'ori Ira i Kerisituu, nahi ntewinso to Isaraeli ka nahi mpohawe tia a luwuno pompakosi anu dinandi, nahina pomperorohia ka nahina Ue Ala i wawontolino. 13Sine kanandio-andio omiu a ntepo'asaa saru Ondae i Kerisituu Yesu, anu i ndi'upua ”me'olai”, gagiomo ”umpeda” hangano rea-Do i Kerisituu. 14Hangano Ondaemo rodoato, anu mo'asa iramo orua ntia ka anu mobangkuomo rere watu po'oloti, onaemo teposisalaa, 15#Kol. 2:14 hangano mate-Do kana mia Do'oniniomo songka Taura saru luwuno petena ka pompakosino, ka iwineweu oruano gagi asa mia wo'ohu a ngkoroi-Do, ka hangano atuu mompokohina rodoa, 16#Kol. 1:20 ka dosintuwu oruano, i laro aasa ngkoroi, saru Ondae Ue Ala hangano keu pinotamba, saru mokotampulao teposisalaa atuu a ngkeu pinotamba atuu. 17#Yes. 57:19 Hawe Ira ka paleleo rodoa ndi omiu anu ”me'olai” ka rodoa ndi ondae anu ”me'umpeda”, 18Nde hangano Ondae ontae anu orua ntia a laro aasa Penaa mpohawe pesalaa mewinso ndi Ondae i Ama. 19Kanandiomo omiu komba mia susua mbo'u ka mia hawe, tendeano mpe'asa komiumo saru mia memempori ka ihino raha-Do Ue Ala, 20anu winangu me'empehiako luwuno tinena ka luwuno nabi, ka Ondae i Yesu Kerisituu gagi watu empehino a nsiuno. 21Ndi Ondae tuwu luwuno winangu, tepotuda moiko, gagi raha-Do Ue Ala anu mempori, ndi Ondae i Ue. 22Ndi Ondae mewinangu komiu koa mbo'u gagi po'ianga-Do Ue Ala, a laro Mpenaa.
Currently Selected:
EPESU 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
