Puu Pontutulu 3

Luwuakoano hinao tempono

3:1-15

1A luwuakoano hinao tempono, maupo tiano hapa i totono langi hinao tempono. 2Hinao tempono pine'anaako ka hinao tempono mate, hinao tempo mompaho ka hinao tempo mobuta anu pinaho; 3hinao tempo mompepate ka hinao tempo mompokotompa; hinao tempo mohoa ka hinao tempo mowangu; 4hinao tempo mengese ka hinao tempo mengingisi; hinao tempo monsabangi ka hinao tempo mo'ense-ense; 5hinao tempo montadi watu ka hinao tempo mopumpu watu; hinao tempo mekopui ka hinao tempo nahi pekopui; 6hinao tempo mo'ungke ka hinao tempo rugi; hinao tempo monaa ka hinao tempo montadi; 7hinao tempo moberi ka hinao tempo monseu; hinao tempo komino ka hinao tempo mepau; 8hinao tempo mompehohawa ka hinao tempo mo'o'aliaako; hinao tempo metea ka hinao tempo mesintuwu. 9Hapa ura anu hinaweno puu mpo'angga inso a mpe'iseino? 10Kukitaomo marepaa anu Doweeako ira Ue Ala anano mia ka domemarepaakono. 11Luwuakoano Doweweuo tekosi ia tempono, tendeano Dopoweeako ira anu nahi bali a laro aroado. Sine, mia nahi pokohawe laroo anggaa anu wineweu-Do Ue Ala inso a pompu'uano hawe pokotompaano. 12Kuto'orio nine nahina anu lalu dompemoikoo sekonopo memawongko ka mpembasaio sanaa a laro ntumuwudo. 13Ka nine sompo mia mokompongkaa mo'inu, ka membasaio sanaa a laro luwuno pine'iseino; onaemo pompowee-Do Ue Ala. 14Kuto'orio nine luwuakoano anu wineweu-Do Ue Ala ta kongko mpiha ranta nahina tampulaano, nahi pinokotiangi ke pinokura. Ondae Ue Ala weweuo kanatuu ka idoito mia ndi Ondae. 15Hapa anu hina kanandio-andio hinaomo i ndi'ipua, ka hapa anu ta hina tehineomo hina, ka Ondae Ue Ala mo'ungke anu telaloomo.

Luwuno mengkena teweweuno

3:16–4:6

16Hinao mbo'u anu kinitaku i totono mata'oleo: a mpebitaraa, i tu'ai hinao poweweu mosa'o, ka a mpo'ianga moleoa, i tu'ai hinao poweweu nahi moleo. 17Kupotae i laro aroa, ”Ondae Ue Ala Ira mobitara, moiko mia mentee maupo mia moweweu mosa'o, hangano tiano luwuakoano ka luwuno anggaa hinao tempono.” 18Mongkona anano mia kupotae i laro aroa, ”Ondae Ue Ala umarahako ira ka mopokitao ndi ondae nine ondae butu anano wula.” 19Hangano teweweuno mia mengkena saru teweweuno kondehora, teweweu anu mengkena umalu ira; kana'umpe imate anu asa, kanatuu koa mbo'u anu susua. Oruano hinao penaa anu mengkena, ka mia nahi me'uraopo sekono kondehora. Menteeano, luwuno nahina tuduno. 20Oruano te'aro a asa mpo'ianga. Oruano gagi inso a pampawu ka oruano mekule a pampawu. 21Isemake anu tumo'orio nine penaano mia mewuatako i wawono ka penaano kondehora metii i totono tolino? 22Kukitao nine nahina anu lalu pinemoikono mia sekonopo mawongko a laro inanggano, hangano onaemo tiano. Menteeano, isema anu ta mopokitaakono hapa anu gagi umarino onae?

Currently Selected:

Puu Pontutulu 3: XMZ

Highlight

Copy

Compare