Puu Pontutulu 2

Ponto'ori ka benge-bengea nahina tuduno

2:1-26

1Mepau aku a laro aroa, ”Hio, Aku mo'arahako mo'unde! Membasaio sanaa! Sine kitao, atuu mbo'u nahina tuduno,” 2Mongkona mengingisi mo'unde kupotae, ”Atuu benge-benge!”, ka mongkona po'unde, ”Hapa tuduno?” 3Kupepenteeakono pinewowoloku kana'umpe mokorosoakono anggoro koroiku, kontongaano pinewowolo molinoku kongkono metewawaako ponto'ori, ka kana'umpe mbioano benge-bengea, ranta ka kuto'orio hapa anu moiko tiado anano mia ka domeweweuo i totono langi asa ntinuwudo.

4 # 1Mok. 10:23-27; 2Taw. 9:22-27 Kuweweuo luwuno anggaa langkai, kuwanguo luwuno rahaku, mompahoakono luwuno lere anggoroku; 5kuweweuo luwuno lereku ka bonde po'ianga mesana-sanaa, saru mompahoakono mperupa-rupa keuno wua ngkeu; 6Kuweweuo luwuno limbo uwoi ka i'uwoio tobuno keu mongura inso i ra'ai. 7#1Mok. 4:23Ku'oli ira ata tama ka beine, ka hinao ata anu hina i rahaku. Ongkue mbo'u hadio sapiku ka asa bawaa bembe bimba lumaloio maupo isema anu tuwu i Yerusale se'eluno ongkue. 8#1Mok. 10:10, 14-22Ongkue mbo'u mopumpu tiaku salaka ka wulaa, arataado mokole ka wita poparentaa. Ku'ala ira puu mpenani moiko tama maupo beine, ka hadio samburue, pinesompodo anano mia. 9#1Taw. 29:25Bakanatuu ongkue gagi langkai, tendeano langkaiopo sekono isemamo koa anu tuwu i Yerusale se'eluno ongkue. I larono luwuno atuu ponto'oriku mo'ia mpiha ndi ongkue. 10Nahi ku'onsoio mataku inso a hapamo koa anu ineheno, ka nahi ku'ontoo aroaku inso a mawongkoa hapamo koa, hangano aroaku mawongkoakono luwuno pine'iseiku. Onaemo wuano luwuno pine'iseiku. 11Tempono kulako paresao luwuno anggaa anu wineweuno kaeku ka luwuno pine'isei anu kuweweuomo tiano atuu, kitaomo, luwuno atuu nahina tuduno ka perokuhi mobuani angi; nahina anu mentudu i totono mata'oleo.

12Ka ku'amba mewolili paresao ponto'ori, saru mbo'u anu nahi mentudu ka benge-bengea. Menteeano, hapa anu pinokoweweuno mia anu umeuo mokole sangkadio anu wineweuomo? 13Kukitao nine ponto'ori mentuduopo sekono benge-benge, kana mewine mentuduopo sekono wongi-wongia. 14Matano mia monto'ori kongko a uluno, sekono mia anu benge-benge melempa a laro wongi-wongia, sine kuto'orio koa mbo'u nine teweweu anu mengkena umalu ira luwu. 15Motae aku mbo'u i laro aroa, ”Teweweuno mia benge-benge ta koa mbo'u umalu aku. Hapa tuduno ongkue i ndi'ipua tedoa monto'ori?” Ka ku'amba mepau i laro aroa nine andio mbo'u nahina tuduno. 16Hangano, nahina rorambea anu nahi ta bali moiko a mia monto'ori maupo mia benge-benge. A oleo anu ta hawe luwuno tehineomo ikinolupe. Mia monto'ori mate koa mbo'u kana mia benge-benge! 17Onaemo pu'uno ku'o'aliaakono tuwu, hangano hapa anu wineweu i totono mata'oleo kupemasusao. Menteeano, luwuno atuu nahina tuduno ka perokuhi mobuani angi. 18Ku'o'aliaakono luwuno perokuhi anu kuweweuakono pine'isei i totono mata'oleo, hangano asalakono aku bintao a mia anu hawe umarino ongkue. 19Ka i'amba isema anu tumo'orio ba monto'ori koake mia atuu ke benge-benge? Maupo kanatuu onae ta pabawa a luwuno perokuhi anu wineweuku saru pine'isei i totono mata'oleo ka saru mompake ponto'ori. Ndio mbo'u nahina tuduno.

20Mompu'uomo nahina pompe'osaiaku a luwuno perokuhi anu kuweweuo saru pine'isei i totono mata'oleo. 21Hangano, tewala hinao mia me'i'iseiako ponto'ori, ka pande mo'angga, onae asalakono mobinta tiano a mia anu nahi pe'iseiakono atuu. Ndio mbo'u nahina tuduno ka urasa'o anu langkai. 22Hapa anu mentudu hinaweno mia inso a luwuno pine'isei ka po'eheno aroa anu wineweuno i totono mata'oleo? 23#Ayb. 5:7; 14:1Asa ntinuwuno buke masusaa ka hapa anu inanggano bukeako masusa aroa, maupo ntonga wongi aroano nahi rodo. Ndio mbo'u nahina tuduno. 24#Pon. 3:13; 5:18; 9:7; Yes. 56:12; Luk. 12:19; 1Kor. 15:32Nahina anu lalu moiko a mia sekonopo mongkaa mo'inu ka mesana-sanaa a laro mpine'iseino. Kupokonto'orio nine andio mbo'u inso a ngkae-Do Ue Ala. 25Hangano isema mokompongkaa ka menamio mo'ahino sangkadio ndi Ondae? 26#Ayb. 32:8; Pow. 2:6Hangano, a mia anu Dopekonoo Dopoweeakono ponto'ori ka mawongko, sine mia tehala Dotenao ka ipopumpu ka mohowu hapa-hapa anu lembuino asalakono iweeakono mia anu Dopekonoo Ue Ala. Ndio mbo'u nahina tuduno ka perokuhi mobuani angi.

Currently Selected:

Puu Pontutulu 2: XMZ

Highlight

Copy

Compare