Danieli 9
9
Pekakaino i Danieli
9:1-19
1A nta'u amba-ambano poparentaano i Dariusu, anano i Ahasiwero, inuledo to Midia, anu gagiomo mokole a poparentaado to Kasidimi, 2#Yer. 25:11; 29:10a nta'u amba-ambano poparentaano atuu, ongkue, i Danieli, mepenteeo a Wunta Mempori porokono ta'u anu montonda pau-Do i Ue ndi Nabi Yeremia ta gagi a nterawo-rawono Yerusale, hadiono pitu pulu nta'u.
3Ka ku'amba mo'aroo rupaku ndi Ondae Ue Ala mekakai ka mo'ema, saru mepuasa ka mompokona sawu po'inombo saru awu. 4Ku'emao ndi Ondae Ue Alaku, ka mangakuakono halaku, kanandio, ”Oo Ue, Ue Ala anu tedoa langkai ka mongkokongiri, anu uminio Pedandia, pe'aroa ka pompehohawa ndi ondae anu mehohawa Komiu saru me'ini a parenta-Miu! 5Mpoweweu kamimo hala ka sala, mpoweweu kamimo gau mosa'o ka me'ewa, mepansia kamimo inso a parenta-Miu ka atora-Miu. 6Nahi kimperorongeako ira tetenaa-Miu, luwuno nabi, anu mpepau iramo a nee-Miu a luwuno mokolemami, a luwuno petewawamami, ndi ondae amamami ka a luwuno palili. 7Oo Ue, Omiumo anu mentee, sine tekonaomo kimemokoko'ii kana a oleo andio, omami to Yehuda, palilino kota Yerusale ka luwuno to Isaraeli, ondae anu me'umpeda ka anu olai, a luwuno wita ba isua Itadi ira hangano domehapu Komiu. 8Oo Ue, omami, luwuno mokolemami, luwuno petewawamami ka ondae amamami tekonaomo kimemokoko'ii, hangano mpoweweu kamimo hala ndi Omiu. 9Ndi Ondae i Ue, Ue Alamami, hinao pompehohawa ka po'oninia hala, maupo me'ewa kamimo ndi Ondae, 10ka nahi kimperoromgeakono pau-Do i Ue, Ue Alamami, anu tumena kami mentuwu tumondao songka anu Dowee kamimo telalo a luwuno nabi, tetenaa-Do. 11Luwuno to Isaraeli domelimpaiomo songka-Miu ka mepansia hangano nahi domperorongeakono pau-Miu. Onaemo pu'uno ndi omami inuwuomo pontotonaa ka sumpa, anu teburi a wunta Taurano i Musa, tetenaa-Do Ue Ala, hangano mpoweweu kamimo hala ndi Ondae. 12Dopokorosoomo pau anu pinau-Do ndi omami ka mia anu parenta kamimo saru mowawaakami masolaa langkai anu napi hori gagi i totono asa wawo langi, kana i Yerusale. 13Kana anu teburi a wunta Taurano i Musa, luwuno masolaa andio umalu kami, sine nahi kimpo'ema pompehohawa-Do i Ue, Ue Alamami, saru mpepokule inso a nsalamami ka mpenootio mentee-Miu. 14Onaemo pu'uno, Ondae i Ue Dopatindaomo masolaa atuu ka motiiakami. Menteeano, Ondae i Ue, Ue Alamami, moleo a luwuno wineweu-Do, sine omami nahi kimperorongeakono pau-Do.
15Onaemo pu'uno, oo Ue, Ue Alamami, anu iwawaako iramo kae anu moroso bawaa-Miu mpeluarako inso i wita Masiri ka weweuo nee-Miu telele kana a oleo andio, mpoweweu kamimo hala, mpoweweu kamimo gau mosa'o. 16Oo Ue, menunu saru luwuno moleo-Miu, po'ineeomo tekuda ka bamburu-Miu moliu inso i Yerusale, kota-Miu, torukuno-Miu anu mempori. Hangano halamami ka salado uempu'umami weweuo Yerusale ka bawaa-Miu gagi tataado luwuno mia i horimami. 17Oo Ue Alamami, kanandio-andio, Irongeomo pekakaino ka po'emano tetenaa-Miu andio. Iwantahiakonomo rupa-Miu po'ianga mempori-Miu anu terawoomo andio, me'empehiako Omiu Ue. 18Oo Ue Alaku, po'aroomo biri-Miu ka Irongeomo. Wileomo mata-Miu ka Ikitaomo terawomami ka kota anu pinauako nee-Miu, hangano omami mpohaweo pekakai po'emamami i aro-Miu nahi kimpe'empehiako menteemami, sine me'empehiako pompehohawa-Miu anu hadio ntu'u. 19Oo Ue, Irongeomo! Oo Ue, I'oniniomo halamami! Oo Ue, Ipensiroiomo ka Ipokogagiomo, siimo Ipotuluo, me'empehiako Omiu, oo Ue Alaku, hangano kota-Miu ka bawaa-Miu pinauako nee-Miu!”
Pitu pulu meluka opitu tempo
9:20-27
20Kontongaaku mepau, mekakai ka mangakuakono halaku ka halado tongkuku, tongku Isaraeli, ka mohaweo po'emaku i aro-Do i Ue, Ue Alaku tiano torukuno mempori-Do Ue Alaku, 21#Luk. 1:19, 26da kontongaaku mepau a laro mpekakai, i Gabarieli anu kukitaomo a laro pongkita se'eluno i tempono mpopesombaako pesomba ngkiniwia, magasi ipenee te'aro ndi ongkue. 22Ka i'amba paguru aku ka mepauakune, ”Danieli, kanandio-andio ongkue aiwa moweeakomu pompokonto'ori ka ponto'ori. 23Tempono upompu'u mohaweo po'emamu, meluarakoomo asa pau ka ongkue aiwa pauakomu, hangano omue tedoa pinehohawa. Gagi, pe'ihilaroomo pau atuu ka pekokoongakonomo pongkita atuu!
24Pinakosiomo pitu pulu meluka opitu tempo a tongkumu ka a ngkotamu anu mempori, mokotampulao gau mosa'o, mokompenaa-naao hala, pahihio sala, ka ihawe moleoa anu nahina tampulaano, umihiio pongkita ka pinau anu ta gagi, umurapio anu tedoa mempori.
25To'oriomo ka pokonto'oriomo: inso a tempo ipeluarako pau atuu, tempono ta pinomule Yerusale ka wali winangu, ranta haweno asa mokole, asa mia anu inurapi, hinao opitu meluka opitu tempo. Ka i'amba i larono nomo pulu ka orua meluka opitu tempo tehineno kota atuu ta wali winangu saru tana lapa ka pangkorono, sine a tempo masukara. 26Umarino nomo pulu ka orua meluka opitu tempo atuu asa mia anu inurapiomo ta tinadi, kahinaano nahina salano. Palilino asa mokole anu ta hawe, ta mokotampulao kota ka po'ianga mempori atuu, sine mokole atuu ta mate a laro lolowi. Hawe a tampulaano wawontolino ta hina peteaa ka poropua kana anu pinakosiomo. 27#Dan. 11:31; 12:11; Mat. 24:15; Mrk. 13:14Mokole atuu ta weweuo pedandia atuu gagi dompemobeao hadio mia asa meluka opitu tempo tehineno. A entongano opitu tempo atuu onae ta mokompenaa-naaao pesomba sinumbele ka pesomba kaanga; ka i wawono pani mokoburua ta hawe anu mompepate, hawe a mporopua anu pinakosiomo umaluo anu mompepate atuu.”
Currently Selected:
Danieli 9: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
