Danieli 7

Opaa kondehora ka anano mia

7:1-28

1A nta'u amba-ambano poparentaano i Belesiasari, mokoledo to Babeli, mo'ipiomo i Danieli ka mohawe pongkita a mpoturiano. Ka i'amba burio mo'ipino atuu ka ndiomo tutuluno.

2Motae i Danieli, ”Ia wongi ongkue mohawe pongkita, tengkita opaa angi inso i langi wemboo tahi langkai, 3#Meng. 13:1ka opaa kondehora langkai mewuatako inso a laro ntahi, anu asa teposisingge saru anu susua. 4#Meng. 13:2Anu amba-ambano rupano kana asa singa ka mepaniako panino manu-manu rajawali. Kukitao mpiha ranta ka itebuta panino ka onae tetande inso a wita. Onae pinontade a orua karuno kana mia, ka ndi onae pinoweeako aroano mia. 5Tengkita hinao kondehora susua, anu ko'orua, rupano kana berua. Onae mentade a asa apano, ka otolu wuku hori da kongko a laro ngangano a olo ngisino. Kanandiomo ipinotaeako: Hio, pongkaamo bau tehadio ntu'u. 6Ka i'amba kukitao, tengkita asa kondehora susua, rupano kana nggapu langkai meboti-boti saru opaa panino manu-manu a bungkuno. Kondehora atuu me'ulu opaa ka ndi onae pinoweeako pabawa.

7 # Meng. 12:3; 13:1 Ka i'amba kukitao a laro pongkita wongi atuu, tengkita kondehora ko'opaa, anu mongkokodoito ka mongkokongiri, ka tedoa moroso. Ngisino langkai inso a labu; onae mongkaa ka mongkoru-koru, saru lumolandaakono karuno hapa anu torea. Onae teposisingge saru luwuno kondehora se'eluno ka onae metandu hopulu. 8#Meng. 13:5-6Kontongaaku mekokoongako ira tandu atuu, tengkita tuwu i olono asa tandu susua anu kodei ranta otolu inso a ntandu se'eluno atuu tebuta. A ntandu atuu tengkita hinao mata kana matano mia ka nganga anu mompelangka-langkai.

9 # Meng. 1:14; 20:4 Kontongaaku mpiha mengkita, kadera poparentaa meninaa, ka i'amba mentoroomo Anu Tende Ntinuwu. Sangka-Do mopute kana seru baku ka wuu-Do morina kana wulu bimba. Kadera poparentaa-Do inso a langano api saru luwuno rodano inso a api anu kontongaano tensila. 10#Meng. 5:11; 20:12Asa korono api me'umbaako ka waa inso i aro-Do. Sowu-sowuno mekakaako Ira, ka mapasowu-sowu mpentade i aro-Do. Ka i'amba mentoroomo Majelisi Puu mpobitara ka mewinile iramo Wunta.

11Kukitao mpiha hangano pau pompelangka-langkai anu pinauno tandu atuu. Kukitao mpiha ranta ka ipinepate kondehora atuu, koroino pinerawo-rawo ka pinetadiako a laro api anu montunu. 12Ka pabawado mbo'u kondehora anu susua binuta, ka tehineno domentuwu pinakosi hawe a tempo anu tetantui. 13#Mat. 24:30; 26:64; Mrk. 13:26; 14:62; Luk. 21:27; Meng. 1:7, 13; 14:14Kukitao mpiha a laro pongkita wongi atuu, tengkita aiwa saru seru inso i langi asa mia kana anano mia. Onae aiwa ndi Anu Tende Ntinuwuno atuu, ka winawa i aro-Do. 14#Meng. 11:15Ka i'amba ndi onae wineeako pabawa ka marambaa, saru pentoroa gagi mokole, ka mia inso a luwuno tongku, suku tongku ka pau mpepe'ata ndi onae. Pabawano onaemo pabawa anu nahina tampulaano, anu nahi ta tampula, ka poparentaano onaemo poparentaa anu nahi ta ropu.

15Ongkue, i Danieli, te'urense aroaku hangano mongkona atuu, ka luwuno pongkita anu kinitaku atuu mokodanggara aku. 16Kurangkuhio asa mia inso i olodo anu mpentade i ra'ai ka kupesikenoakono hapa pengkonaano mongkona luwuno atuu. Onae mepau ndi ongkue ka pauakune pengkonaano. 17Opaa kondehora langkai atuu onaemo opaa mokole anu ira mpe'umbaako inso i tolino. 18#Meng. 22:5Umarino atuu luwuno mia mempori-Do Anu Tedoa Mantande ira mpotarima poparentaa, ka ira me'inio poparentaa atuu hawe nahina tampulaano, tendeano nahina balino ranta nahina tampulaano.

19Ineheku tumo'orio pengkonaano kondehora opaa anu teposisingge inso a luwuno kondehora susua, anu tedoa mongkokodoito mengisi labu ka kuku malano, anu mongkaa ka mongkoru-koru saru mololandaako karuno hapa anu torea; 20ka mongkona hopulu tandu anu kongko a uluno, saru mbo'u mongkona tandu susua anu tuwu ranta ka itepudu otolu tandu. Tandu atuu hinao matano ka hinao ngangano anu mompelangka-langkai, saru rupano langkaiopo sekono luwuno tandu anu susua. 21#Meng. 13:7Kukitao tandu atuu metea umewai ira mia mempori ka inangi ira, 22#Meng. 20:4ranta ka Dohawe Anu Tende Ntinuwu atuu ka moleoa wineeako a luwuno mia mempori-Do Anu Tedoa Mantande ka hawe tempono mia mempori atuudo me'inio poparentaa.

23Kanandiomo ipotae: Kondehora ko'opaa atuu onaemo poparentaa ko'opaa anu ta kongko i tolino, anu teposisingge inso a luwuno poparentaa ka tumeleo asa wawontolino, lumolandao ka puro-puroo. 24#Meng. 17:12Hopulu tandu atuu onaemo hopulu mokole anu me'umbaako inso a poparentaa atuu. Umarino ondae ta me'umbaako asa mokole; onae teposisingge inso a luwuno mokole se'eluno ka ta me'uru-uru ira otolu mokole. 25#Meng. 12:14; 13:5-6Onae ta pauo pau anu umewai Ira Anu Tedoa Mantande, bobarasai ira mia mempori-Do Anu Tedoa Mantande, ka merokuhi balio tempo ka songka. Ira mempineweengako a ngkaeno i larono asa tempo ka orua tempo ka entonga tempo. 26Ka i'amba Majelisi Mpobitara ta mentoro, ka pabawano ta binuta ka rinawo-rawo ranta ka itampula. 27#Meng. 20:4; 22:5 Poparentaa, pabawa, ka marambano luwuno poparentaa i totono asa wawo langi ira mewineeako mia mempori, bawaa-Do Anu Tedoa Mantande. Poparentaado onaemo poparentaa anu nahina tampulaano, ka luwuno pabawa ira ntepe'ata ka mpetuundu ndi ondae.

28Tompamo i ndi'ai tutuluno, Ndio mbo'u ongkue i Danieli, luwuno pinewowoloku tedoa mokodanggara aku ka gagi aku momite. Sine, mongkona atuu kunaao i laro aroaku.”

Currently Selected:

Danieli 7: XMZ

Highlight

Compare

Copy