Danieli 6

Aano singa

6:1-29

1I Dariusu, to Midia, montarima poparentaa tempono tinuwuno nomo pulu ka orua nta'u. 2Ka i'amba i Dariusu mompotoro asa etu ka rua pulu petewawa daera a mpoparentaano. Ondae ira meninaa a luwuno poparentaa; 3i wawodo pinotoro mbo'u otolu anu langkai potorono, ka i Danieli onaemo asa mia inso i olodo otolu mia atuu. Ndi ondaemo luwuno petewawa daera peweengakono inangga moiko anu asalakono domeweweuo ka si pinokorugi mokole. 4I Danieli lumaloi ira anu langkai potorodo ka petewawa daera atuu, hangano ndi onae hinao penaa anu susua sekono anu mehano. Tinoono mokole numaao a luwuno poparentaano.

5Ka i'amba anu langkai potorodo ka petewawa daera atuudo mpo'ungke pe'empehido ira metuntuo i Danieli mongkona a poparentaa, sine nahi dompohawe pe'empehi maupo hapa ke te'asamo koa salano, hangano onae metenunu ka nahina hinawe anu nahi anggao ke salano. 6Dompotae mia atuudo, ”Nahi kita mpohawe pe'empehi hapamo koa metuntuo i Danieli sangkadio mongkona a songka-Do Ue Alano!”

7Mpopari-pari iramo anu langkai potorodo ka petewawa daera atuudo mpe'aro ndi mokole ka dompotae, ”Oo mokole Dariusu, melai tinuwumiu ueku! 8Luwuno anu langkai potorono a poparentaa andio, luwuno anu pabawa ka petewawa daera, luwuno anu mokowali ira a poparentaa ka bupati ntepo'asa ka ilinuarako asa pompakosido mokole ka ipinolempa asa pepo'onto nine ba isema i larono tolu pulu oleo mompohawe po'ema a asa i olono pinesombai ke mia sangkadio ndi omiu ueku, oo mokole, onae ta pinetadiako a aano singa. 9Onaemo pu'uno, oo mokole, ipoluarakomo pepo'onto atuu ka ipoweweumo wunta parenta anu nahi pinokobali, montonda atorado to Midia ka Peresia, anu nahi ta pinokobuta mbo'u.” 10Onaemo pu'uno, mokole Dariusu moweweu wunta parenta pepo'onto atuu.

11Rumongeo wunta parenta atuu wineweuomo, i Danieli mekule i rahano. A bolongkono i wawono hinao pentangoa anu te'ungkahi te'aro i Yerusale. Pentolu asa oleo ipenggolontu, mekakai saru umunde-unde Ira Ue Alano kana anu wela wineweuno. 12Mia atuudo mpopari-pari mpewinso ka domehaweo i Danieli tekonai mekakai ka mo'ema ndi Ondae Ue Alano.

13Ka do'amba mpe'aro ndi mokole ka mpesikenoakono ndi onae mongkona pepo'ontodo mokole, ”Kombake omiu ueku moluarako asa pepo'onto nine sompo mia anu i larono tolu pulu oleo mompohawe po'ema a asa i olono pinesombai ke a mia sangkadio ndi omiu ueku, oo mokole, ta pinetadiako a laro aano singa?” Sumangki mokole, ”Mongkona atuu manasaomo montonda atorado to Midia ka Peresia, anu nahi ta pinokobuta mbo'u.” 14Ka do'amba mpotae ndi mokole, ”I Danieli, asa mia i olodo mia mentinadi inso i Yehuda, nahi perio komiu ueku, mokole, ka nahi perioo pepo'onto anu linuarakomiu; pentolu asa oleo ipowuatako pekakai.” 15Mansano rumongeo mokole mongkona atuu, onae tedoa mompemasusa. Onae mo'ungke sala ta motolao i Danieli, maupo ranta sumoo oleo, onae da merokuhi ta tumulungio.

16Ka do'amba mia atuudo mpopari-pari mpe'aro ndi mokole ka dompotae ndi onae, ”Ito'oriomo, mokole, nine montonda atorado to Midia ka Peresia nahina pepo'onto ke pompakosi anu linuarakono mokole anu ta pinokobali!” 17Meparentaomo mokole, ka i'amba i Danieli inala ka pinetadiako a laro aano singa. Mepau mokole ndi Danieli, ”Ondae Ue Alamu anu wela pinesombaimu, po'ineeomo Ondae anu motolako!” 18Asa watu winawa ka ninaa a ngangano aa atuu, ka i'amba mokole tumondoniakono sinsi pontondonino, saru mbo'u sinsi pontondonido anu langkai potorono, ka si hina bali maupo hapa ndi Danieli. 19Ka i'amba mokole mekule a langkanaeno ka puasa asa wongi. Puu mpontarero nahi poboi ira, ka onae mbo'u nahi pokompoturi.

20Mo'o-mo'oru ntu'u tempono tebosi towea, mokole mewangu ka mompari-pari lumako a aano singa. 21Mansano hawe umpeda aa atuu, mebooliomo ndi Danieli saru suara mongkoko'undu. Ipotae ndi Danieli, ”Danieli, tetenaa-Do Ue Ala anu tuwu, Ondae Ue Alamu anu wela pinesombaimu, Dopolioke motolako inso a singa atuudo?” 22Ka i'amba motae i Danieli ndi mokole, ”Oo mokole, melai tinuwumiu! 23Ondae Ue Alaku montena Iramo mala'eka-Do mokopuo ngangado singa atuudo onaemo ka nahi domebelai aku, hangano mengkaa nahina salaku i aro-Do; ka ndi omiu mbo'u ueku, mokole, nahi kupoweweu anu mosa'o.” 24Mokole tedoa mawongko ka onae meparenta ka idinii i Danieli inso a laro aa. I Danieli diniiomo inso a laro aa, ka nahina mobela hapamo koa ndi onae, hangano ipe'ala-ala Ira Ue Alano. 25Mokole meparenta, ka i'amba mia anu mentulurio i Danieli me'inala ka mempinetadiako a laro aano singa, moiko ondae maupo luwuno ana ka kombiado. Napi domehawe a horono aa atuu, domperangkami iramo singa atuudo, maupo wukudo domempuroo.

26Ka i'amba mokole Dariusu mo'oliwi wunta a luwuno mia inso a luwuno tongku, suku ka pau, anu mpo'ia i asa wawontolino, ihino, ”Po'ineeomo ka itetiangi manangaimiu! 27Meronga andio ongkue mompowee parenta nine a luwuno poparentaa anu pinabawaiku, mia asalakono medoito ka mpondende ndi Ondae Ue Alano i Danieli. Hangano, Ondaemo Ue Ala anu tuwu, anu nahina tampulaano; poparentaa-Do nahi ta tampula ka pabawa-Do nahina tompaano. 28Ondae mompotola ka montulungi, moweweu petondoni ka anu kinohali-haliako i langi ka i tolino. Ondaemo anu motolao i Danieli inso a mpekapodo singa.”

29Kanatuumo i Danieli hinao pentoroano mantande a poparentaano i Dariusu ka a poparentaano i Koresi, to Peresia atuu.

Currently Selected:

Danieli 6: XMZ

Highlight

Compare

Copy