Danieli 3

Pompotuwua api anu kolanga-langa

3:1-30

1Mokole Nebukanesa moweweu asa tinaha wulaa, mantandeno nomo pulu hiku ka maluano onoo hiku anu pinontadeno i lembono Dura i wita Babeli. 2Mokole Nebukanesa montena mia pumpu ira anu wela sumarungkoroi ira mokole, anu mempabawa, luwuno bupati, puu pompatudu a poparentaa, anu mpopekaria arataa, puu mpobitara, anu mpoto'ori songka ka luwuno petewawa a poparentaa, ka domehawe a poronsoa tinaha anu pinontadeno atuu. 3Ka i'amba mpepumpu iramo anu wela sumarungkoroi ira mokole, anu mempabawa, luwuno bupati, puu pompatudu a poparentaa, anu mpopekaria arataa, puu mpobitara, anu mpoto'ori songka ka luwuno petewawa a poparentaa, me'aiwa a poronsoa tinaha anu ipontadeomo mokole Nebukanesa atuu. 4Mebooliomo meroku asa mia puu pompohawe paudo mokole, ”Kanandio petenado ndi omiu, hei luwuno mia inso a luwuno tongku, suku ka pau: 5tempono imerongeo unino tawuwua, siloli, katapi, geso-geso, gambusu, serudami ka mperupa-rupa anu me'uni, asalakono impenggolontu mpesombaio tinaha anu pinontadedo mokole Nebukanesa atuu. 6Isema anu nahi penggolontu mesomba, i tempo koa mbo'u atuu ta pinetadiako a laro api anu kolanga-langa!” 7Onaemo pu'uno, i tempono domerongeo luwuno tongku unino tawuwua, siloli, katapi, geso-geso, gambusu ka mperupa-rupa anu me'uni, mpenggolontu iramo mia inso a luwuno tongku, suku ka pau, ka mpesombaio tinaha wulaa anu pinontadedo mokole Nebukanesa atuu.

8I tempo koa mbo'u atuu ba opia ira to Kasidimi mpentade ka tumuluri ira to Yahudi. 9Dompotae ndi mokole Nebukanesa, ”Oo mokole, melai tuwumiu ueku! 10Omiu ueku moluarako komiumo parenta, nine sompo mia anu rumongeo unino tawuwua, siloli, katapi, geso-geso, gambusu, serudami ka mperupa-rupa anu me'uni, asalakono menggolontu mesombaio tinaha wulaa atuu, 11ka nine isema anu nahi penggolontu mesomba, ta pinetadiako a laro api anu kolanga-kolanga. 12Sine, i Sadaraki, i Mesaki ka i Abenego, ba opia ira to Yahudi anu pinakosimiumo ueku ka dompopareta i wita Babeli, nahi domperioo parentamiu ueku, oo mokole. Nahi dome'unde-undeo pinesombaimiu ueku ka nahi dompesombaio tinaha wulaa anu pinontademiu ueku.” 13I tempo koa mbo'u atuu a laro tesingkano tekudano, i Nebukanesa meparenta ka domewinawa i Sadaraki, i Mesaki ka i Abenego mpe'aro. Mansado mewinawa mia atuudo mpe'aro ndi mokole, 14motaeomo i Nebukanesa ndi ondae, ”Menteeke, hei Sadaraki, Mesaki ka Abenego, nine omiu nahi me'unde-undeo pinesombaiku ka nahi mpesombaio tinaha wulaa anu pinontadeku atuu? 15Kanandio-andio, tewala mpepatinda komiu, i tempono imerongeo unino tawuwua, siloli, katapi, geso-geso, gambusu, serudami ka mperupa-rupa anu me'uni, impenggolontumo mpesombaio tinaha anu wineweuku atuu! Sine tewala omiu nahi mpesomba, i tempo koa mbo'u atuu komiu mempinetadiako a laro api anu kolanga-langa. Pinesombai isuake anu polio motola komiu inso a ngkaeku?” 16Ka i'amba i Sadaraki, i Mesaki ka i Abenego sumangkio mokole Nebukanesa, ”Nahina tuduno kimesangki komiu mongkona andio ueku. 17Tewala Ondae Ue Alamami anu inunde-undemami polio motola kami, Ira motola kami inso a laro api anu kolanga-langa atuu, ka inso a ngkamiu, oo mokole. 18Sine ande-andeno naahi, moikoano ka ito'orio ueku, oo mokole, nine nahi kami me'unde-undeo pinesombaimiu ueku, ka nahi kami mpesombaio tinaha wulaa anu pinontademiu atuu ueku.”

19Tedoaomo lansara tekudano i Nebukanesa ndi Sadaraki, Mesaki ka ndi Abenego, ka rupano bali. Ka i'amba meparenta ka iwineweu pompotuwua api atuu meluka pepintu lalu mokula inso anu biasa. 20Ndi ondae ba opia mia anu moroso ntu'u inso i olono sorodaduno, onae meparenta ka domempinongu i Sadaraki, i Mesaki ka i Abenego, ka domempinetadiako a laro api anu kolanga-langa atuu. 21Ka i'amba mia otolu atuu mempinongu, ka saru lemba meloe, saluara, songko, ka sangkado anu susua mempinetadiako ira a laro api anu kolanga-langa. 22Hangano petenano mokole atuu mokora, tiniangi mbo'u mokulano api, ranta langano api atuu tumunu ira ka domemate mia anu tumande ira i Sadaraki, i Mesaki ka i Abenego. 23Sine i Sadaraki, i Mesaki ka i Abenego, otolu mia atuu ntedonta kongko pongu a laro api anu kolanga-langa atuu.

24Ka i'amba mokole Nebukanesa tededengke; onae mompari-pari mentade ka ipotaeako ira anu mokowali ira moparenta, ”Kombake mia otolu anu tompetadiako iramo a laro api kongko pongu?” Domesangkio mokole, ”Mentee, mokole!” 25Ipotae, ”Sine kukitao opaa mia mpelempa-lempa i tonga-tongano api atuu. Nahi domemobela, ka anu ko'opaa atuu tengkita kana anano pinesombai!” 26Ka i'amba i Nebukanesa rumangkuhio pewowano pompotuwua api anu kolanga-langa atuu ka ipotae, ”Sadaraki, Mesaki, ka Abenego, tetenaa-Do Ue Ala anu tedoa mantande, impeluarakomo ka ime'aiwamo ramai!” Mpeluarako iramo I Sadaraki, i Mesaki ka i Abenego inso a laro api atuu. 27Luwuno anu wela sumarungkoroi ira mokole, anu mempabawa, luwuno bupati, ka anu mokowali ira mokole a pomparentaa me'aiwa mpepumpu; domengkitao nine koroido mia andiodo nahi kaano api, nine wuu a uludo nahi mo'ai, lemba meloedo nahina tebalino, tendeano maupo woono mana mo'ai nahina ndi ondae.

28Motaeomo i Nebukanesa, ”Unde-unde Iramo Ue Alano i Sadaraki, i Mesaki ka i Abenego! Montena Iramo mala'eka-Do ka motola ira tetenaa-Do anu mpe'ala-alaakono koroido ndi Ondae, saru nahi domentondao petenano mokole, anu mpeweengakono koroido hangano nahi domebehe me'unde-undeo ka mpesombaio pesombaa susua sangkadio Ue Alado. 29Onaemo pu'uno, kuluarakono parenta nine sompo mia inso a tongku, suku ke pau isuamo koa, anu mompau pontetewehi ndi Ondae Ue Alano i Sadaraki, i Mesaki ka i Abenego, ta binatu-batu ka rahano ta pinobangku gagi howuno anu terawo, hangano nahina pinesombai susua anu polio mompotola kanatuu.”

30Ka i'amba mokole moweeako ira i Sadaraki, i Mesaki ka i Abenego pentoroa mantande i wita Babeli.

Currently Selected:

Danieli 3: XMZ

Highlight

Compare

Copy