Danieli 2

Mo'ipino i Nebukanesa

2:1-49

1A nta'u ko'orua poparentaano i Nebukanesa mo'ipi; sala-laroomo aroano ka nahi pokompoturi. 2Ka i'amba mokole metena moboi ira anu pande mebali-bali mata, pande sihiri, pande mompuu-puuri, ka luwuno Kasidimi, ka domempauakono pengkonaano mo'ipino. Me'aiwa iramo ka mpentade i arono mokole. 3Mepau ira mokole ndi ondae, ”Ongkue mo'ipi, ka aroaku salalaro, hangano mingki tumo'orio mo'ipi atuu.” 4Ka do'amba mpotae to Kasidimi atuu ndi mokole (a mpaudo to Arami), ”Oo mokole, melai tinuwumiu! Itutuluomo ndi omami atamiu mo'ipi atuu, ka kami mempauakomiu pengkonaano.” 5Sumangki mokole a nto Kasidimi atuudo, ”Ku'alaomo pomputusi andio: tewala nahi imempauakune mo'ipi atuu saru pengkonaano, asalakono komiu mebinatu-batu ka rahamiu ta pinobangku gagi howuno anu terawo. 6Sine, tewala imempolio mempauakune mo'ipi atuu saru pengkonaano, komiu mpontarima inso ndi ongkue ihingkae, luwuno pompowee, ka pontudu anu langkai. Onaemo pu'uno, imempauakunemo mo'ipi atuu saru pengkonaano!” 7Mesangki ira anu kompenduano, ”Itutuluomo ueku mokole mo'ipi atuu a atamiu andiodo, asalakono kami mempauakomiu pengkonaano.” 8Sumangki mokole, ”Kuto'orio ntu'u nine omiu mpo'arahako mpotuluo tempo, hangano imengkitao ku'alaomo pomputusi andio: 9tewala nahi imempolio mempauakune mo'ipi atuu, asalakono hinao asa pohuku tiamiu. Kuto'orio nine ntepo'asa komiumo komiu mpompau ndi ongkue mongkona anu nahi mentee ka mosa'o, ranta ka ibali teweweuno. Onaemo pu'uno imentutuluakunemo mo'ipi atuu, ka kuto'orio, nine imempolio koa mbo'u mempauakune pengkonaano.” 10Mesangki ira ta Kasidimi atuudo ndi mokole, ”Nahina maupo te'asa mia i wawontolino anu polio pauo hapa anu inemamiu ueku mokole! Nahi hori asa mokole, maupo langkai ka onae pabawa, mo'ema anu kanandio inso a asa mia anu pande mebali-bali mata ke asa mia anu pande mobasa-basa ke asa to Kasidimi. 11Hapa anu inemamiu ueku mokole tedoa mobea, ka nahina maupo te'asa mia anu polio pauakomiu ueku mokole, sangkadio luwuno pinesombai anu nahi po'ia i olono mia.” 12Mokole mbo'u gagi tedoa bamburu ka tekuda hangano mongkona atuu, onaemo ka ipeparenta mokotampulao luwuno mia mponto'ori i Babeli.

13Tempono ilinuarako parenta ka domempinepate mia mponto'ori, i Danieli ka wali-walino mbo'u me'inungke ira mempinepate. 14Ka i'amba saru pandeno me'akala ka ponto'orino i Danieli motaeakono i Arioki, petewawado puu mpodagai mokole anu lumakoomo ta mepate ira mia mponto'ori i Babeli, 15ipotae ndi Arioki, anu hinao potorono a poparentaa atuu, ”Tembio parenta anu mokora andio ka doluarakono mokole?” I Arioki mbo'u pauo pu'uno ndi Danieli.

16Ka i'amba i Danieli me'aro ndi ondae mokole ka mo'ema ka ipinoweeako tempo ta pauo pengkonaano mo'ipi atuu ndi ondae mokole. 17Ka i'amba i Danieli mekule ka ipauo mongkona atuu ndi Hanania, ndi Misaeli ka ndi Asaria wali-walino, 18ka dompo'ema pompehohawa inso ndi Ondae Ue Alano asa wawo langi mongkona rahasia atuu, ka si domempinokotampula i Danieli ka wali-walino meronga mia mponto'ori susua i Babeli.

19Ka i'amba rahasia atuu pinopoto'oriako i Danieli a laro asa pongkita wongi. I Danieli mbo'u umunde-unde Ira Ue Alano asa wawo langi. 20Motaeomo i Danieli,

”Inunde-undeomo nee-Do Ue Ala

inso nahina tampulaano hawe nahina tampulaano,

hangano inso ndi Ondae ponto'ori ka roso!

21Ondae balio tempo;

Ondae mompokompenaa-naa ka mompotoro mokole.

Ondae mompowee ponto'ori anu mentee a mia pande mosongka

ka ponto'ori a mia anu molino pinewowolono.

22Ondaemo anu mosabao luwuakoano anu nahi kinookoo ka tewuni.

Ondae tumo'orio hapa anu kongko a laro wongi-wongi,

ka mewine kongko ndi Ondae.

23Oo Ue Alado uempu'uku,

ku'unde-unde Komiu ka melangkai Komiu.

Hangano, Omiu moweeakune ponto'ori anu mentee ka roso,

ka kanandio-andio Ipauakunemo hapa anu kime'emao ndi Omiu,

ka pauakami pinemasusado mokole.”

24Onaemo pu'uno i Danieli lumako ndi Arioki anu tinenado mokole mokotampuala ira mia anu pande mposongka i Babeli. Onae lumako ka ipotae ndi onae, ”Si pokotampula ira mia anu pande mposongka i Babeli! Wawa akumo me'aro ndi ondae mokole, ka aku pauako ira mokole pengkonaano mo'ipi atuu!” 25I Arioki mompari-pari wawao i Danieli me'aro ndi ondae mokole saru motaeako ira mokole, ”Mohawe akumo asa mia i olodo mia mentinadi inso i Yehuda, anu polio pauo pengkonaano mo'ipi atuu ndi omiu mokole.” 26Mesikenoomo mokole ndi Danieli anu meneeako mbo'u i Beletasasari, ”Upolioke pauakune mo'ipi anu kukitaomo atuu ka pengkonaano?” 27I Danieli sumangki ira mokole, ipotae, ”Rahasia anu pinesikenoakomiu ueku mokole nahi domempolio pauakomiu mia anu pande mposongka, pande mobasa-basa, pande mpebali-bali mata ke pompau anu nahi manasa ta gagi. 28Sine, i suruga kongko Ira Ue Ala anu mosabao luwuno rahasia. Dopauakomiumo ueku Mokole Nebukanesa hapa anu ta gagi a oleo anu ta hawe. Ndiomo mo'ipi ka luwuno pongkita anu kinitamiu ueku a mpoturia: 29Kontongaamiu ueku a mpoturia, oo ueku mokole, me'umbaakoomo pinewowolomiu mongkona hapa anu ta gagi lembuino. Ondae anu mosabao luwuno rahasia pauakomiumo ueku hapa anu ta gagi. 30Kanatuumo ongkue, rahasia atuu pinosabaomo ndi ongkue, komba hangano ponto'ori mentee anu kongko ndi ongkue lumaloio ponto'ori mentee a luwuno mia anu tuwu, sine ka ipinau pengkonaano ndi omiu ueku mokole, ka ito'orio luwuno pinewowolomiu ueku.

31Oo ueku mokole, ikitao asa tinaha anu tedoa langkai! Tinaha atuu mantande, tesangkilo nahina pengkenano, moleo i aromiu ueku, ka tengkita mongkokongiri. 32Uluno tinaha atuu wineweu inso a wulaa motu'a, rada ka tokiano inso a nsalaka, kompo ka tongano inso a mala, 33pa'ano inso a labu, sekono karuno asa ntia inso a labu ka asa ntia mbo'u inso a wita pulu. 34Kontongaamiu ueku kumitao, asa watu teloka komba wineweuno kaeno mia, ka dumunsio tinaha atuu kona ntu'u a ngkaruno anu inso a labu ka wita pulu ranta ka iterawo. 35Ia tempo koa mbo'u atuu terawoomo labu, wita pulu, mala, salaka ka wulaa atuu; luwuno gagi kana ota a mponsesaa i tempono motu'i-tu'i. Ka i'amba puurio angi, ranta maupo hangano nahi hinawe. Sine watu anu dumunsio tinaha atuu gagi torukuno langkai anu buketio asa wawontolino.

36Onaemo mo'ipimiu ueku, ka kanandio-andio pengkonaano kami mempauakomiu ueku mokole: 37Oo ueku mokole, mokoleno luwuno mokole, Ondae Ue Alano asa wawo langi meweengakono ndi omiu ueku poparentaa, pabawa, roso ka marambaa. 38A ngkaemiu ueku Dopeweengakonomo luwuno anano mia isuamo koa dompo'ia, luwuno kondehora a mpada ka manu-manu i laro meene, ka omiu ueku Doweweu komiu gagi pabawaio luwuno atuu. Omiumo ueku uluno tinaha inso a wulaa atuu. 39Sine, umarino omiu ueku ta me'umbaako poparentaa susua anu komba langkaiopo sekono poparentaamiu ueku. Ka i'amba poparentaa ko'otolu, anu inso a mala, ta pabawaio asa wawontolino. 40Umarino atuu ta hina poparentaa ko'opaa anu motea kana labu, hangano labu mompuro ka momperawo-rawo luwuakoano. Kana labu anu momperawo-rawo, kanatuumo poparentaa andio ta puroo ka luwuno iperawo-rawoo. 41Kana anu kinitamiu ueku karu ka wunga ntonisono asa ntia inso a wita puluno puu poweweu kuro ka asa ntia mbo'u inso a labu, pengkonaano poparentaa atuu tetia. Lano poparentaa mbo'u atuu motea kana labu, menunu saru anu kinitamiu ueku labu atuu mesaloako wita pulu. 42Sine, kana'umpe wunga ntoniso ngkaru atuudo asa ntia inso a labu ka asa ntia mbo'u inso a wita pulu, kanatuumo poparentaa atuu asa ntia motea ka asa ntia mbo'u montopu. 43Kana anu kinitamiu ueku, labu mesaloako wita pulu, pengkonaano atuu ira mpesalo molalo pekombiaa, sine nahi ira ntepo'asa, kana labu anu nahi pokompesalo saru wita pulu.

44Sine i tempono mokole atuudo, Ondae Ue Alano asa wawo langi Ira montadeo asa poparentaa anu nahi ta pinerawo-rawo ranta nahina tampulaano, ka pabawa nahi ta melimba mbo'u a tongku susua. Poparentaa atuu ta merawo-rawoo luwuno poparentaa ka mokopingkoo, sine poparentaa atuu ta mentade ranta nahina tampulaano. 45Mongkona atuu mengkena ntu'u kana anu kinitamiu ueku, nine komba wineweuno kaeno mia asa watu teloka inso a ntorukuno ka ipuroo labu, mala, wita pulu, salaka ka wulaa atuu. Ondae Ue Ala anu tedoa langkai Dopauakomiumo ueku mokole hapa anu ta gagi lembuino. Mo'ipi atuu mentee ka pengkonaano pine'ala-ala.”

46Ka i'amba Mokole Nebukanesa menggolontu ka mesombaio i Danieli. Onae mbo'u meparenta ka ipinesombaako pesomba ka anu mo'ahi woono ndi onae. 47Mepauomo mokole ndi Danieli, ”Menteeano, Ondae Ue Alamu atuu Ue Ala i wawono luwuno pinesombai ka Anu pabawa a luwuno mokole, ka Anu mosabao luwuno rahasia, hangano omue polio mosabao rahasia atuu.” 48Ka i'amba mokole melangkaio i Danieli ka moweeakono hadio pompowee langkai, saru mokogagio anu pabawaio luwuno wita Babeli ka luwuno mia pande mosongka i Babeli. 49A mpo'emano i Danieli, mokole meweengakono poparentaa i wita Babeli ndi Sadaraki, Mesaki ka ndi Abenego, sine i Danieli mo'ia a langkanaedo mokole.

Currently Selected:

Danieli 2: XMZ

Highlight

Compare

Copy