Amosi 7
7
Pongkita ko'aasa: Kosume
7:1-3
1Ndiomo anu pinopokita-Do Ue Ala ndi ongkue: Tengkita Iramo moweweu bawaano kosume, i tempono ewo da'iaopo mompu'u tuwu, onaemo atuu ewo dasarai umarido mensewoo puu mponsewo ewo tiado mokole. 2Tempono kosume mompu'u kumaano ka ipingko luwuno anu tuwu a wita, mepau aku,
”Oo Ue Ala, I'oniniakami hala mami!
Kana'umpe i Yako ta mokompekorahako?
Kombake onae tedoa molema?”
3Ka Do'amba i Ue balio tinoo-Do mongkona pohuku atuu.
”Mongkona atuu nahi ta gagi,” pau-Do i Ue.
Pongkita ko'orua: Api
7:4-6
4Ndiomo anu pinopokita-Do Ue Ala ndi ongkue: Tengkita Iramo Ue Ala moboio api ta pohuku. Api atuu kumaano uwoi piingko a ondaloano ntu'u ka ta piingko ikaano wita lere. 5Umarino atuu mepau aku,
”Oo Ue Ala, ku'emao Ipenaa-naakonomo atuu!
Kana'umpeke i Yako ta mokompekorahako?
Kombake onae tedoa molema?”
6Ka Do'amba i Ue balio tinoo-Do mongkona pohuku atuu.
”Ndio mbo'u nahi ta gagi,” pau-Do Ue Ala.
Pongkita ko'otolu: Koloro pompokomoleo
7:7-9
7Ndiomo anu Dopopokitao ndi ongkue: Tengkita Iramo i Ue mentade a wawo rere watu anu sinongkaako koloro pompokomoleo, ka a ngkae-Do hinao koloro tida. 8Ka i'amba mepau Iramo i Ue ndi ongkue, ”Hapake anu kinitamu Amosi?” Sumangki aku, ”Koloro pompokomoleo!” Mepau Iramo i Ue,
”Menteeano, Aku monaa koloro pompokomoleo i tonga-tongano bawaa-Ku Isaraeli;
nahi Aku umampuni ira mbo'u.
9Luwuno pesombaano i Saki Aku mokotampulao
ka luwuno po'ianga memporido to Isaraeli ta rinongka,
ka somborino i Yerobea Aku umewaiakono ponai.”
I Amosi sinaari inso i Beteli
7:10-17
10I Amasia sando mpesomba i Beteli, montena mia lumako ndi Yerobea, mokole i Isaraeli, saru pe'oliwi, ”I Amosi moweweuomo tepo'asaa umewai komiu ueku i tonga-tongano tongku Isaraeli; wita andio nahi pokompeteao mbo'u a luwuno pinauno. 11Hangano kanandiomo pinauno i Amosi:
I Yerobea ta pinepateako ponai
ka to Isaraeli manasa ira melako inso i witado gagi mia tinadi.”
12Ka i'amba motaeomo i Amasia ndi Amosi, ”Puu pongkita, lakomo, polaimo omue i wita Yehuda! Po'ungkemo pepotuwumu i ra'ai, pompaumo anu ta gagi i ra'ai! 13Sine siimo mbo'u pompau anu ta gagi i Beteli, hangano onaemo andio po'ianga memporido mokole, onaemo andio raha memporino poparentaa.” 14Sumangki i Amosi ndi Amasia, ”Ongkue komba nabi ka ongkue komba tewinso bawaano nabi, tendeano ongkue andio puu mpopakambi ka puu mpo'opu wua ara. 15Sine Ondae i Ue umala aku inso a mpopakambia asa bawaa bembe bimba, ka Ondae i Ue mepau ndi ongkue: Lakomo, pompaumo anu ta gagi a bawaa-Ku Isaraeli.
16Kanandio-andio, rongeomo pau-Do i Ue!
Omue motae, ’Siimo pompau anu ta gagi umewaio Isaraeli,
ka si kuahako ira inuleno i Saki.’
17Onaemo pu'uno, kanandiomo pau-Do i Ue: Beinemu ta mebelesu i kota,
ka luwuno anamu tama ka beine ira memateako ponai;
witamu ta tinia-tiaako koloro posongka.
Omue komate i wita anu mokoburu,
ka to Isaraeli manasa ira melako inso i witado gagi mia tinadi.”
Currently Selected:
Amosi 7: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
