2 Samueli 7

Pedandi-Do i Ue mongkona inuleno i Daudi anu ta mowangu Raha Mpesombaa

7:1-17

(1Taw. 17:1-15)

1Tempono mokole rodoomo i rahado, ka Ondae i Ue moweeakono rodoa inso a luwuno iwalino limbu-limbu, 2motae ira mokole ndi nabi Nata, ”Kitaomo, mo'ia aku a raha inso a ngkeu arasi, kahinaano Burua-Do Ue Ala kongko i larono tenda.” 3Motae i Nata ndi ondae mokole, ”Moiko, weweuomo luwuno anu ino'aroamu, hangano Ondae i Ue kumongkomiko.”

4Sine, wongi koa mbo'u atuu haweomo Pau-Do i Ue ndi Nata, kanandio, 5”Lakomo, pauakono tetenaa-Ku i Daudi, ’kanandiomo Pau-Do i Ue: Menteeke komowangu raha ta po'ianga-Ku? 6Nahi Kuhori mo'ia a laro raha tumampu'u Kutaate ira to Isaraeli inso i wita Masiri hawe oleo andio. Wela Aku melakopi ka mo'ia a laro ngkema gagi po'iangaa-Ku. 7Maupo isua Kupelakopi saru luwuno to Isaraeli, hori Akuke mompohawe pau a asa mia petewawa Isaraeli, anu Kuparentao pakambi ira bawaa-Ku Isaraeli, kanandio: Tembio ka nahi mpowangua-Kune raha inso a ngkeu arasi?’ 8Onaemo pu'uno, asalakono ka upauo kanandio ndi tetenaa-Ku i Daudi, Kanandiomo pau-Do Ueno luwuakoano: Ongkuemo anu umalako inso a ntonga mpada, tempono da upompakambi asa bawaa bembe bimba, gagi petewawado bawaa-Ku Isaraeli. 9Kukongkomikomo maupo isua ulako ka mokotampula ira luwuno iwalimu inso i aromu. Aku weweuo neemu telele kana needo luwuno mia langkai potorodo i tolino. 10Aku mompakosi asa po'iangado bawaa-Ku Isaraeli ka Kunaa ira, ranta ka domerodo mpiha a mpo'iangado ondaedo ka nami dontelelu. Luwuno mia lambaha nami ira bobarasai ira kana i ndi'ipua, 11mompu'u Kupotoro ira puu mpobitara a bawaa-Ku Isaraeli. Aku moweeakomiu rodoa inso a luwuno iwalimu. Dopauakomu mbo'u i Ue: Ondae i Ue Ira wanguo inulemu anu moparenta. 12Tewala haweomo tempomu ka komohawe pena-naa me'asaako ira uempu'umu, ka Aku wanguo inulemu lembuino, ana ngkoroimu, ka Aku mokomorosoo poparentaano. 13Onaemo anu ta mowangu raha tiano nee-Ku ka Aku mokomorosoo kadera poparentaano ranta nahina tampulaano. 14#2Kor. 6:18; Ibr. 1:5Ongkue ta gagi Amano ka onae ta gagi ana-Ku. Ba moweweu anu sala, Aku humukuakono tuko tiado mia ka ponsepi anado mia. 15Sine pompehohawa-Ku nahi ta olai te'inso ndi onae, kana anu Kupoko'olaiomo inso ndi Saulu, anu Kuliahakonomo inso i aromu. 16Inulemu ka poparentaamu ta moroso ranta nahina tampulaano i aro-Ku, kadera poparentaamu ta moroso ranta nahina tampulaano.”

17Menunu kana pau andio ka menunu kana pongkitaa andio, kanatuumo ipepau i Nata ndi Daudi.

Pekakai po'undeno i Daudi

7:18-29

(1Taw. 17:16-27)

18Ka i'amba mokole Daudi mewinso i larono ka ipentoro i aro-Do i Ue. Ipotae, ”Isemake ongkue andio, oo Ue Ala, ka isemake somboriku, ranta ka Iwawa aku hawe olai andio? 19Mongkona andio mbo'u da makura a pongkita-Miu, oo Ue Ala ranta mepau Komiu mbo'u mongkona somborino tetenaa-Miu a tempo anu da olai. Po'ineeomo andio gagi pontisodo mia, oo Ue Ala. 20Hapa mbo'u anu ta pinokopauno i Daudi ndi Omiu? Ito'orio tetenaa-Miu andio, oo Ue Ala? 21A mpau-Miu ka menunu po'eheno aroa-Miu moweweu-Komiumo luwuno wineweu anu langkai andio ka Ipohaweakonomo tetenaa-Miu andio. 22Nde langkai Komiu, oo Ue Ala. Nahina kana Omiu ka nahina Ue Ala susua sangkadio Omiu montonda luwuno anu kimerongeakono birimami. 23Isema kana bawaa-Miu Isaraeli, asa tongku i tolino, anu Ue Alano lumako ta tumolosio gagi bawaa-Do? Mohawe Komiu nee-Miu hangano luwuno wineweu-Miu anu langkai ka mongkokongiri ndi ondae, ka sumaari ira luwuno tongku ka pinesombaido anu susua inso i arodo bawaa-Miu anu tinolosi-Miumo inso i Masiri. 24Ipokoroso iramo bawaa-Miu Isaraeli gagi bawaa-Miu ranta nahina tampulaano, ka Omiu, oo Ue, gagi Ue Alado. 25Kanandio-andio, oo Ue Ala, dandi anu pinau-Miu mongkona tetenaa-Miu andio ka somborino I'ihiiomo ranta nahina tampulaano ka Iweweuomo kana anu dinandi-Miu atuu. 26Nee-Miu ta gagi langkai ranta nahina tampulaano ka dompotae mia, ’Ondae Ueno luwuakoano, onaemo Ondae Ue Alado to Isaraeli.’ Inuleno i Daudi, tetenaa-Miu andio ta moroso i aro-Miu. 27Hangano Omiu, Ueno luwuakoano, Ue Alado to Isaraeli, Ipokomengkaaomo a ntetenaa-Miu andio, kanandio: Aku wanguo inulemu. Onaemo pu'uno tetenaa-Miu andio mosiaomo mekakai ndi Omiu. 28Oo Ue Ala, butu Omiu Ue Ala ka luwuno pau-Miu pine'ala-ala; Idandiomo mongkona anu moiko andio a ntetenaa-Miu. 29Po'ineeomo ka Ironsoo somborino tetenaa-Miu andio kai kongko mpiha i aro-Miu ranta nahina tampulaano. Hangano Omiu, oo Ue Ala, Omiumo anu mepau ka hangano poronso-Miu somborino tetenaa-Miu andio rinonso ranta nahina tampulaano.”

Currently Selected:

2 Samueli 7: XMZ

Highlight

Copy

Compare