2 Samueli 6

Burua-Do Ue Ala linimba i Yerusale

6:1-23

(1Taw. 13:5-14; 15:25–16:3)

1Ipumpu ira mbo'u i Daudi luwuno mia ntebiniki i olodo to Isaraeli, hadiodo tolupulu nsowu mia. 2#Pel. 25:22Ka i'amba i Daudi melempa inso i Baale-Yehuda saru luwuno palili anu merongaakono, ira mewawao inso i ra'ai burua-Do Ue Ala, anu pinau a nee-Do Ueno luwuakoano anu mentoro i wawono kerubi. 3#1Sam. 7:1-2Dome'ulao Burua-Do Ue Ala atuu a laro ngkareta anu wo'ohu umarido mentandeo inso a rahano i Abinada i pongku wita. Ka i'amba i Usa ka i Ahio, anano i Abinada, mese'elungio kereta wo'ohu atuu 4saru Burua-Do Ue Ala atuu, kontongaano i Ahio melempa i arono burua atuu. 5I Daudi ka luwudo to Isaraeli mpelense-lense i aro-Do i Ue tinondaako luwuno parewa mpenani inso a ngkeu sanoba, ka katapi, gambusu, rabana, nggiri-nggiri ka simbali.

6Tempono domehawe a mposesaano i Nakohoni, i Usa tumasio kaeno a Burua-Do Ue Ala ka i'inio, hangano sapi atuudo telendo. 7Tensilaomo tekuda-Do i Ue ndi Usa. Ondae Ue Ala mepateo i ra'ai hangano salano atuu. Kanandiomo imate i ra'ai umpeda a Burua-Do Ue Ala. 8Nahi pesanaao i Daudi hangano i Usa Dotiuomo i Ue tedoa mongkokongiri, onaemo po'iangaa atuu ka inineeako Peresi-Usa hawe kanandio-andio. 9Itempo atuu i Daudi doito ndi Ondae i Ue, ipotae, ”Kana'umpe Burua-Do i Ue ka ipokohawe a mpo'iangaku?” 10Onaemo pu'uno i Daudi nahi limbao Burua-Do i Ue atuu a mpo'iangano i kota Daudi, sine i Daudi pansia ka iwawao a rahano i Obe-Edomi, to Gati.

11 # 1Taw. 26:4-5 Burua-Do i Ue kongko a rahano i Obe-Edomi, to Gati, i larono otolu wula. Ondae i Ue rumonsoo i Obe-Edomi saru pe'asa rahano. 12Domempauakonomo i Mokole Daudi, kanandio, ”Ondae i Ue rumonsoo somborino i Obe-Edomi ka luwuno anuno hangano Burua-Do Ue Ala.” Ka i'amba mawongko aroano i Daudi lumako umalao Burua-Do Ue Ala inso a rahano i Obe-Edomi wawao i kota Daudi. 13Tempono luwuno mia anu menselao Burua-Do i Ue atuu mpelempa onoo laampa'a, ipesombaakono aasa sapi ka aasa anano sapi anu pinokomewalo. 14I Daudi melense-lense i aro-Do i Ue tompaano rosono; ipokonao lemba epo inso a nsawu lena.

15I Daudi ka luwuno to Isaraeli mewawao Burua-Do Ue Ala tinondaako peboo-booli ka unino tawuwua. 16Tempono Burua-Do i Ue mewinso i kota Daudi, i Mikali ana beineno i Saulu, mentango inso a mpentangoa ka ikitao Mokole Daudi melonso-lonso, ka melense-lense i aro-Do i Ue. Onaemo pu'uno ipokongkodeio i Daudi i laro aroano.

17Burua-Do i Ue winawa mewinso, ka i'amba ninaa a mpo'ingaano, i larono kema anu wineweuno i Daudi. Ka i'amba i Daudi mompesombaako pesomba tinunu ka pesomba tekaduduia i aro-Do i Ue. 18Mansano umari mpopesombaako pesomba tinunu ka pesomba tekaduduia, i Daudi rumonso ira tongku atuu a nee-Do Ueno luwuakoano. 19#1Taw. 16:43Ka i'amba a luwuno tongku atuu, luwuno to Isaraeli, moiko tama maupo beine, singge mia tiniaako asa roti, asa hea bau, ka asa mpole kukisi kisimisi. Ka i'amba luwuno tongku atuu singge mpekule i rahado.

20Tempono i Daudi mekule ta rumonso ira pe'asa rahano, i Mikali anano i Saulu meluarako tumotowoo i Daudi ka ipotae, ”Tedoa pinelangkai mokoledo to Isaraeli, pogauno oleo andio ipokokoiio koroino i arodo ata beinedo pegawaino, kana asa mia mongkokolaro anu mokoko'iio koroino onaeno!” 21Sine ipotae i Daudi ndi Mikali, ”I aro-Do i Ue, anu laluaopo biniki aku sekono amamu ka luwuno somborino, ka tumiso aku gagi petewawado to Isaraeli, bawaa-Do i Ue; i aro-Do i Ue kupenari-nari, 22tendeano laluaopo sekono atuu, aku mokongkodeio koroiku ranta kaku kodei a pongkitamu. Sine, luwuno ata beine anu pinaumu atuu, po'ineomo hangano ondae kupinelangkai.” 23I Mikali anano i Saulu, nahi pe'ana ranta kai mate.

Currently Selected:

2 Samueli 6: XMZ

Highlight

Copy

Compare