2 Samueli 23

Pauno i Daudi anu pokotompa

23:1-7

1Ndiomo pauno i Daudi pokotompa,

”Pauno i Daudi anano i Isai

pauno mia anu pinokomantande,

mia anu inurapi-Do Ue Alano i Yako,

puu mpenani po'unde-unde anu pinesanaado Isaraeli.

2Penaa-Do Ue Ala mepau telalo ndi ongkue,

pau-Do kongko a eloku.

3Ondae Ue Alado Isaraeli mepau,

torukuno watu Isaraeli mepau ndi ongkue:

Tewala asa mia moparenta mia a moleoano,

moparenta ka doitoako Ira Ue Ala,

4onae mewanta kana towea i tempono mo'oru,

mo'oru anu nahi menseru,

anu ba umari usa weweuo tesosangkilo

ewo mongura i wita.

5Komba kanatuuke somboriku i aro-Do Ue Ala?

Hangano moweweu Iramo pedandia anu nahi ta bali saru ongkue,

luwuno pinalele ka manasa ta tinonda.

Hangano luwuno tekaduduia ka pinerorohiku,

komba Ondaeke anu weweuo kai mentumba?

6Sine mia melambaha,

luwuno kana rui pinetadiako.

Ka menteeano nahi pinoko'alaako kae.

7Mia anu dumanggi ira, asalakono ipatindaakono koroino

asa mpole labu ke tangkeno kansai.

Ondae ira mepingko ntetunu a mpo'iangado!”

Sorodaduno i Daudi

23:8-39

(1Taw. 11:10-44)

8Ndiomo needo luwuno sorodaduno anu tumondao i Daudi: i Isabaali, to Hakemoni, petewawado Otolu Mia Mosia. Onae umioo kansaino mo'ewai halu etu mia anu pinepate i larono asa mpeteaa. 9Umarino onae, i Eleasari anano i Dodo anano asa to Ahohi. Onae asa mia inso a Otolu Mia Mosia atuu. Onae merongaakono i Daudi, tempono do'ewai ira to Pelisiti, anu mpepumpu i ra'ai ira mpetea, kahinaano to Isaraeli mponsuka iramo. 10Onae mentade mompepate to Pelisiti ranta kai mokendo kaeno ka metako a mponaino. Ondae i Ue moweeako ira ponangia langkai a oleo atuu. Palili mpekule tumonda ira butu mporontu parewado mia anu pinepate. 11Tudano onaemo i Sama anano i Age, to Harari. Tempo atuu to Pelisiti mpepumpu i Lehi isua ihinawe asa mpo'ianga lere bukeako wua inahu motaha. Tempono dompolai sorodadu inso i arodo to Pelisiti, 12onae mentade i tongano lere atuu. Ikorahakono ka inangi ira to Pelisiti. Kanatuumo Dopoweeako ira i Ue ponangia anu langkai.

13Rangkuomo tempo sumowi, hawe iramo otolu mia inso a tolu pulu petewawa bawaado sorodadu tepohaweakono i Daudi, umpeda Kunepo Adulami, kontongaado asa bawaa sorodadudo to Pelisiti mpekema i Lembono Repaimi. 14I tempo atuu i Daudi kongko a bente pekorahakoa ka sorodadu mpodagaido to Pelisiti mekongko i Beteleme a tempo anu mengkena. 15I Daudi mingki ntu'u mo'inu, ipotae, ”Ba mansa hinao mia anu mowee aku mo'inu uwoi inso a nsumuru umpeda a mpewowa langkai Beteleme!” 16ka i'amba otolu mia mosia atuu mansa mpewinso a mpekemaado to Pelisiti. Mpotambu ira uwoi inso a nsumuru umpeda pewowa langkai Beteleme, mentandeo ka mewawao ndi Daudi. Sine i Daudi nahi behe uminuo, tendeano ipesombaakono gagi pesomba tinawa ndi Ondae i Ue, 17Motae, ”Nahi aku ntu'u weweuo, Oo Ue! Kombake andio reado mia anu melako iramo ka menta'oo penaado?” Onaemo pu'uno nahi behe uminuo. Onaemo anu wineweudo otolu mia mosia atuu.

18I Abisai, uaino i Yoabi anano i Seruya, onaemo petewawado tolu pulu mia atuu. Onaemo anu mo'ioo kansaino mo'ewai tolu etu mia anu mate tinobono. Onae telele neeno kana Otolu Mia Mosia. 19Menteeano onae anu pinelangkai ntu'u i olodo tolu pulu mia atuu. Onae gagi petewawado, sine nahi pengkenaako ira Otolu Mia Mosia.

20Umarino atuu, i Benaya anano i Yoyada inso i Kabeseeli, asa mia anu moroso ntu'u ka langkai wineweuno anu moiko. Onae mompepate orua pongkiari, singa inso i Moabi. Onae horio metii a laro aa ka mepateo asa singa, i asa oleo seru baku. 21Ipepateo mbo'u asa to Masiri anu ondau ka langkai koroino. A ngkaeno to Masiri atuu hinao kansai, sine i'aropiakono tuko. Irontuo kansai inso a ngkaeno to Masiri atuu, ka i'amba mepateakono kansaino onaeno. 22Onaemo anu wineweuno i Benaya anano i Yoyada. Onae telele neeno kana Otolu Mia Mosia 23Onae lalu pinelangkai i olodo tolu pulu mia atuu, sine nahi pengkenaako ira Otolu Mia Mosia. I Daudi motoroo gagi petewawado puu mpodagaino.

24I Asaeli, pepaekompono i Yoabi, tewinso i olodo tolu pulu mia atuu. Tudano: I Elihanani anano i Dodo inso i Beteleme; 25i Sama, to Harodi; i Elika to Harodi; 26i Helesi to Paleti; i Ira anano i Ikesi, to Tekoa; 27i Abieseri, to Anatoti; i Mebunai, to Husa; 28i Salamoni, to Ahohi; i Maharai, to Netopa; 29i Helebi anano i Ba'ana, to Netopa; i Itai anano i Ribai inso i Gibea, to Benami; 30i Benaya, to Piratoni; i Hidai inso i Nahale-Gaasi; 31i Abialibo, to Beti-Araba; i Asamaweti, to Bahurimi; 32i Eliahaba, to Saaliboni; i Yasieni, to Guni; i Yonata; 33i Sama, to Harari; i Ahiami anano i Sarari, to Harari; 34i Elipele anano i Ahasabai, to Maaka; i Eliami anano i Ahitopeli, to Gilo; 35i Heserai, to Karameli; i Paerai, to Arabi; 36i Yigali anano i Natani inso i Soba; i Bani, to Gadi; 37i Seleki, to Amoni; i Naharai, to Beeroti; puu mpowawa parewa peteano i Yoabi anano i Seruya; 38i Ira, to Yeteri; i Garebi, to Yeteri; 39i Uria, to Heti. Luwuno tolu pulu ka opitu mia.

Currently Selected:

2 Samueli 23: XMZ

Highlight

Copy

Compare