2 Samueli 22
22
Penani po'undeno i Daudi
22:1-51
1 #
Pud. 18
I Daudi mepauako pauno penani andio ndi Ondae i Ue i tempono Dopotolaomo i Ue inso a ngkaedo luwuno iwalino ka inso a ngkaeno i Saulu. 2Ipotae,
”Oo Ue, pongku watuku, bente pekorahakoaku ka pongkaduduiku,
3Ue Alaku, torukuno watuku, petaloiaku,
kantaku, tandu tekaduduiku, kota benteku,
polaiaku, puu pongkaduduiku.
Omiumo kumadudui aku inso a pobobarasaia.
4Unde Iramo i Ue, pebooliku.
Onaemo ka kutekadudui inso a iwaliku.
5Menteeano ilimbu akumo bomba matea,
luwuno mowo masolaa i alu akumo,
6iwewesi akumo koloro po'iangado mia mate,
luwuno pesalaa matea ninaa i aroku.
7Tempono ongkue a laro masukaraa, mebooli aku ndi Ondae i Ue,
ndi Ondae Ue Alaku kupebooli.
Ka Dorongeo suaraku inso i raha-Do,
pebooliku mepetulungi Dorongeo.
8Ka i'amba melelu ka reendeomo tolino,
luwuno pentoroano langi mpondidi-ndidi
ka mpelelu, hangano tensila tekuda-Do.
9Ahu membombo inso a enge-Do,
api mesilawi meluarako inso a nganga-Do,
waro api melanga meluarako inso ndi Ondae.
10Dolupio langi, ka Dopetii,
worikidi mo'ia i toto pelengkaru-Do.
11Ondae mesawi a ngkerubi, ka Do'amba menee,
ka tengkita i wawono panino angi.
12Ka Doweweuo wongi mpusu lumimbu Ira gagi laika-Do:
uwoi usa anu wongi-wongi, seru anu mokapa.
13Hangano wantano koliki i aro-Do
waro api gagi melanga.
14Ondae i Ue rurundu inso i langi,
Anu Tedoa Mantande mompoporonge suara-Do.
15Dopotola ira pana, ranta Dosiarawo ira,
Dopotola ira koliki, ranta ka donterawo-rawo.
16Ka i'amba tengkitaomo luwuno totono tahi,
luwuno empehino wawontolino tesungke
hangano pau tekuda-Do i Ue,
hangano pepuurino penaa inso a enge-Do.
17Dotehawe aku inso a mantandeano, umala aku,
padii aku inso a mowo.
18Dopotola aku inso a iwaliku anu moroso,
inso a luwuno mia anu umo'aliaakune,
hangano kupemoroso ira lahi.
19Domentowoki aku a oleo urasa'oku,
sine Ondae i Ue onaemo pehondaaku.
20Dowawa aku meluarako a mpo'ianga malua,
Dokadudui aku, hangano Dopekona aku.
21Ondae i Ue weweu aku menunu saru menteeku.
Mombalo Ira ndi ongkue menunu saru memporino kaeku,
22hangano kutondao mpiha sala-Do i Ue
ka nahi ku'olai inso ndi Ondae Ue Alaku kana mia mosa'o gauno.
23Hangano luwuno songka-Do kutondao,
ka inso a pompakosi-Do nahi kupansia.
24Melelu aku nahina tataano ndi Ondae,
ka kudagaio koroiku kasi kupoweweu anu sala.
25Onaemo ka Dosuloo i Ue ndi ongkue menunu saru menteeku,
menunu saru memporiku a pongkita-Do.
26A mia anu metenunu, Ikongkomi ira,
a mia anu nahina wineweuno mosa'o, Ipehohawa ira,
27a mia anu mempori, Ikadudui ira,
sine a mia anu molengku, Ilelengkupi ira.
28Tongku anu tepokonsii Ikadudui ira,
sine mata-Miu umewaio luwuno mia anu mompelangka-langkai, ka Ipokongkodei ira.
29Hangano Omiumo huluku, Oo Ue,
ka Omiu Ue pansario wongi-wongiku.
30Hangano saru Omiu, mosia aku umaropio mia memosa'o,
saru Ondae Ue Alaku, mosia aku mompelonsoki bente.
31Ondae Ue Ala pelempa-Do tedoa moleo.
Pau-Do i Ue atuu mempori.
Ondae gagi kantado luwuno mia
anu mpepekadudui ndi Ondae.
32Nde isemake Ondae Ue Ala, sangkadio Ondae i Ue,
ka isemake torukuno watu sangkadio Ondae Ue Alato?
33Ondae Ue Ala, Ondaemo anu gagi polaiaku anu moroso
ka weweuo salaku moleo.
34 #
Hab. 3:19
Anu weweuo karuku kana karuno rusa
ka weweu aku mentade a pongku wita.
35Anu paguruo kaeku metea,
ranta tokiaku mokolongkuo pana mala.
36Ipowee aku mbo'u kanta pongkadudui-Miu,
ka moiko-Miu weweu akumo langkai.
37Ipowee aku po'ianga pelempaaku anu malua,
ka wuku laleku moroso mpiha.
38Kulampui ira iwaliku ranta ka kuropu ira,
ka nahi kupewolili ba napi kupingko ira.
39Kupokopingko ira ka kurawo-rawo ira, ranta nahi dompewangu mbo'u,
ka ntebangku ira i totono karuku.
40Ibooakonomo roso mpetea tongaku.
Ipokompetuundu ira i totono pabawaku mia anu mentade umewai aku.
41Iweweuo iwaliku mpolai inso ndi ongkue,
luwuno mia anu umo'aliaakune, kupepate ira.
42Mpebooli ira mpepetulungi, sine nahina anu kumadudui ira,
mpebooli ira ndi Ondae i Ue, sine nahi Dosangki ira.
43Kugili ira motutu ntu'u kana awu wita,
ku'isa ira ka kulolanda ira kana rege a nsala.
44Ka Ipotola aku inso a pengengea tongkuku,
Ipekaria aku gagi petewawado luwuno tongku,
tongku anu nahi kuto'orio gagi ataku.
45Luwuno mia hawe mpetuundu mpesile'i ndi ongkue,
da'iaopo irongeo birido,
mpetuundu ira ndi ongkue.
46Luwuno mia hawe momite ntelusa
ka mpondende ira mpeluarako inso i kota pekorahakoado.
47Ondae i Ue tuwu! Unde-undeomo torukuno watuku,
ka Dopinelangkaimo Ue Ala torukuno watu tekaduduiaku,
48Ondae Ue Ala, moweweu Iramo ponsuloa tiaku,
anu wawa iramo luwuno tongku i totono pabawaku,
49ka anu motola akumo inso a iwaliku.
Ka Itande akumo numangi ira anu mpentade umewai aku.
Ipotola akumo inso a luwuno mia anu mompokonsii.
50 #
Rom. 15:9
Onaemo pu'uno ka kupenaniako penani po'unde-unde ndi Omiu, Oo Ue, i olodo luwuno tongku,
ka aku menaniako penani po'unde-unde tiano nee-Miu.
51Dopoweeakono tekaduduia langkai a mokole anu pinontoro-Do,
ka mopokitao pompehohawa-Do a mia anu inurapi-Do,
ndi Daudi ka a ana'ueno ranta nahina tampulaano.”
Currently Selected:
2 Samueli 22: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
