2 Mokole 9

I Yehu gagi mokoledo to Isaraeli

9:1-15

1Nabi Elisa moboio asa mia inso i olono bawaado nabi ka ipotaeakono, ”Peboo ntongamo, wawaomo pido-pido lana andio ka lakomo i Ramoti-Gileadi. 2Sahawemu i ra'ai, ungkeomo i Yehu anano i Yosapa anano i Nimisi. Rangkuhio, oluakono lumako inso i olodo luwuno petewawa sorodaduno ka wawaomo a bolongko i larono. 3Alaomo pido-pido me'ihi lana atuu, ka u'amba tumawao a wawo uluno ka pepau, ’Kanandiomo pau-Do i Ue: Ku'urapikomo gagi mokoledo to Isaraeli!’ Umarino atuu ungkahiomo tondo, pelulumo, ka pontuturakomo.”

4Ka i'amba mia mongura atuu, asa nabi mongura, lumako i Ramoti-Gileadi. 5Mansano hawe, tengkitaomo luwuno tadulako sorodadu kontongaado pentoro. Ka i'amba motae, ”Mowawa aku pe'oliwi ndi omiu, oo tadulako sorodadu!” Mesikeno i Yehu, ”Ndi sema inso i olomami?” Sangkino, ”Ndi omiu, oo tadulako!” 6Mentade i Yehu kai pewinso a laro raha. Nabi mongura atuu tumawao lana a wawo uluno ka ipotaeaono, ”Kanandiomo pau-Do i Ue, Ue Alado to Isaraeli: Ku'urapikomo gagi mokole a bawaa-Do i Ue, a nto Isaraeli. 7Omue komepate ira somborino i Ahabi, uemu, ranta Aku mombalo ndi Isebeli reado luwuno tetenaa-Ku nabi atuu, onaemo reado luwuno tetenaa-Do i Ue. 8Luwuno somborino i Ahabi ta roopu. Aku mokotampulao inso ndi Ahabi sompo tama anu hinao potorono ke nahina i Isaraeli. 9Aku weweuo somborino i Ahabi mengkena kana somborino i Yerobea anano i Nebati ka somborino i Baesa anano i Ahia. 10I Isebeli ta kumaano dahu i asa ntia wita i Yisire'eli ka nahina mia kumaburuo.” Ka i'amba nabi atuu umungkahio tondo, ka i'amba melulu.

11Mansano meluarako i Yehu tepohaweako ira luwuno pegawaido ueno, asa mia motaeakono, ”Nde luwuno moi-moiko koa? Tembio mia mekombe atuu kai aiwa ndi omiu?” Isangki ira, ”Mia atuu lano imento'orio ka pepauno mondeenomo koa!” 12Sine mpotae ira, ”Gaupimiu! Tutuluomo ndi omami!” Ka i'amba motae, ”Kanandio pinauno ndi ongkue: Kanandiomo pau-Do i Ue: Ku'urapikomo gagi mokole a nto Isaraeli!” 13Pontuturako iramo singge mia me'alao sangkano ka mewileo a toto ngkaruno i Yehu a wawo ensa, ka do'amba mempuurio tawuwua saru mpebooli, ”I Yehu mokole!” 14Kanandiomo i Yehu anano i Yosapa anano i Nimisi tepo'asa umewaio i Yorami. Tempo atuu i Yorami kontongaano medaga-dagai i Ramoti-Gileadi, meronga saru luwuno to Isaraeli umaropio i Hasaeli, mokoledo to Arami. 15Sine mokole Yorami asa-asano mekule i Yisire'eli, ta pinokotompa mobebelano hangano to Arami tempono ipetea umewaio i Hasaeli, mokoledo to Arami. Motae i Yehu, ”Tewala mpe'indu komiumo, si mpo'ineeo maupo isema tola inso i kota kai lako pauo mongkona atuu i Yisire'eli.”

I Yorami ka i Ahasia pinepate

9:16-29

16Ka i'amba i Yehu me'ula a ngkareta ka ilako i Yisire'eli, hangano i Yorami tepombole i ra'ai ka i Ahasia, mokole i Yehuda, aiwa kumitao i Yorami. 17Tempono puu mpodagai anu kontongaano mentade a menara i Yisire'eli, kumitao bawaano i Yehu aiwa, mebooliomo, ”Kukitao asa bawaa.” Motae i Yorami, ”Alaomo asa mia puu mpesawi a ngara, tenaomo tepohaweako ira kai pesikeno: Saru tinoo mesintuwu ke andio?” 18Puu pesawi ngara atuu lumako tepohaweakono i Yehu ka ipotae, ”Kanandiomo pesikenodo mokole: Saru tinoo mesintuwu ke andio?” Sumangki i Yehu, ”Hapake orusuamu saru mesintuwu? Petondamo i bungkuku!” Ka i'amba puu mpodagai mohaweo, ”Mia tinena haweomo ndi ondae, sine nahi pekule.” 19Ondae mokole montena puu mpesawi a ngara anu ko'orua. Sahaweno ndi ondae ipotae, ”Kanandiomo pesikenodo mokole: Saru tinoo moiko ke andio?” Sumangki i Yehu, ”Hapa orusuamu saru mesintuwu? Petondamo i bungkuku!” 20Ka i'amba puu mpodagai mohaweo, ”Onae haweomo ndi ondae, sine nahi pekule! Sine hinao anu me'ula a ngkareta kana i Yehu, ana'ueno i Nimisi, hangano ipe'ulaio kana mia mekombe.”

21Motae i Yorami, Patindaomo kareta! ”Mansado mempatindao mia karetano, i Yorami, mokoledo to Isaraeli ka i Ahasia, mokoledo to Yehuda, singge mia saru karetano meluarako tepohaweakono i Yehu. Dotepohaweakono a lereno i Naboti, to Yisire'eli atuu. 22Mansado kumitao i Yehu, mesikeno i Yorami, Saru tinoo mesintuwu ke andio Yehu?” Sumangki i Yehu, ”Kana'umpe ka ta hina pesintuwu, tempono mia mebebelesuno i Isebeli, inemu, ka mia anu pande sihiri hadio ntu'u!” 23I Yorami ronga mewolili ka ipolai saru mebooli ndi Ahasia, ”Ndio pompopo'oo, Ahasia!” 24Sine i Yehu padiio panano tompaano rosono ka ipanao i Yorami i olono orua oweano. Ana mpana atuu lompahi a huleno, ka i'amba tebangku a laro ngkaretano. 25Motae i Yehu ndi Bidakari, petewawa sorodaduno, ”Tandeo ka petadiakono wata ngkoroino a lereno i Naboti, to Yisire'eli atuu, hangano pewowoloomo tempono topesawi a ngara meronga-ronga tumondao i Ahabi, amano, Ondae i Ue mokomengkaao pohuku andio ndi onae: 26’Menteeano indiawi, Kukitao reano i Naboti ka reado luwuno anano’, pau-Do i Ue, ’ka Aku mombalo ndi omue i lere andio’, kanandio pau-Do i Ue. Onaemo pu'uno tandeo ka petadiakono a lere andio, menunu saru pau-Do i Ue.”

27Kumitao anu gagi atuu, i Ahasia, mokoledo to Yehuda, molai te'aro i Beti-Hagani. I Yehu lumuluo ka ipotae, ”Onae mbo'u panao!” Domempanao a wawo ngkaretano a mporakea lumako i Gesuri umpeda Yibileami. Onae molai lumako i Megido ka mate i ra'ai. 28Luwuno pegawaino wawao a laro ngkareta melako i Yerusale ka mengkaburuo a laro nkaburuno onaeno, i horino uempu'uno i kota Daudi. 29Ia nta'u kohopulu ka asa poparentaano i Yorami, anano i Ahabi, i Ahasia gagi mokole a nto Yehuda.

I Isebeli pinepate

9:30-37

30I Yehu hawe i Yesire'eli. Rumongeo mongkona atuu, i Isebeli rumamba-rambao matano ka rumamba-rambao uluno, ka i'amba mentango inso a pentangoa. 31Tempono ipewinso i Yehu a mpewowa langkai, mebooli i Isebeli, ”Moi-moikoko koa ke Simiri, puu pompepate ueno atuu?” 32Itandeo i Yehu rupano te'aro a pentangoa atuu ka ipotae, ”Isema me'alaako ndi ongkue? Isema?” Hinao orua ke otolu mia pegawai langkanae mengkita te'aro ndi onae. 33Petadiakonomo i totono! Mebooli i Yehu. Dompetadiakono i totono. Asa ntia reano tepidiki a rere ka a ngara; onae linolanda. 34I Yehu mewinso i larono, kai pongkaa ka mo'inu. Ka i'amba motae, ”Orusuomo beine tetotonaa atuu ka imengkaburuomo, hangano onae anano mokole.” 35Ondae melako ira mengkaburuo, sine nahi domehaweo, sangkadio banga uluno, orua karuno ka orua pele ngkaeno. 36#1Mok. 21:23 Ka do'amba mpekule ka mempauakono i Yehu. Ka i'amba motae, ”Onaemo atuu pau-Do i Ue anu pinau-Do molalo tetenaa-Do i Elia, to Tisibe atuu: A asa ntia wita i Yisire'eli dahu ta kumaano bauno i Isebeli. 37Wata ngkoroino i Isebeli ta tetalesako i asa ntia wita i Yisire'eli kana ta'i a wawo lere, ranta nahina mia anu mokompotae: Ndiomo i Isebeli.”

Currently Selected:

2 Mokole 9: XMZ

Highlight

Copy

Compare