2 Mokole 10

I Yehu rumopuo somborino i Ahabi

10:1-17

1I Ahabi hinao pitu pulu mia anano tama i Samaria. I Yehu moburi wunta, ka i'oliwio i Samaria, a mia anu langkai potorono i kota atuu, a luwuno mia memota'u ka a luwuno pinemota'udo anano i Ahabi, ihino, 2”Kanandio-andio, mansano hawe wunta andio ndi omiu, mewowoloo luwuno anano uemiu, omiu dumagai ira, ka hinao mbo'u ndi omiu kareta, ngara ka kota mebente saru parewa petea, 3binikiomo anu lalu moiko ka moleo oroano inso i olodo luwuno anano uemiu. Pontoroomo a wawo ngkadera poparentaano amano, ka i'amba pekorahakonomo somborino uemiu.” 4Sine tedoa ira medoito ka dompotae, ”Kitao, sekonopo orua mokole atuu nahi dopokopekorahako umaropio, kana'umpe kita mokopekorahako?” 5Ka i'amba petewawa langkanae ka petewawa kota atuu, saru mbo'u luwuno mia memota'u ka luwuno pememota'u mpe'oliwi ndi Yehu, ”Omami andio atamiu ka luwuno anu pinaumiu ndi omami kami koa meweweuo. Nahi kami mpopotoro maupo isema gagi mokole. Iweweuomo hapa anu pinemoikomiu.”

6I Yehu moburi wunta anu kompenduano ndi ondae, ”Tewala mpe'alaako komiu ndi ongkue ka rumongeo pinauku, alaomo uludo anano uemiu ka ime'aiwamo tisomo ndi ongkue i Yisire'eli bara'ura tempo kanandio.” Ka pitu pulu anado mokole atuu kongko meronga luwuno mia langkai potorono i kota atuu anu mokolangkai ira. 7Mansano hawe wunta atuu ndi ondae, dome'ala ira anado mokole ka domensumbeleo pitu pulu mia atuu, ka do'amba menaao uludo a ngkarandi ka dome'oliwio ndi Yehu i Yisire'eli. 8Asa mia tinena aiwa pauakono, ”Domewawaomo uludo anado mokole atuu.” Ipotae i Yehu, ”Imenaaomo luwuno gagi orua howu i arono pewowa pewinso a mpewowa langkai hawe mo'oru.” 9Tisomono mo'oru i Yehu meluarako. Onae mentade ka ipotae a luwuno palili, ”Omiu nahi mensala. Ongkuemo anu tepo'asa umewaio ueku ka mepateo; sine isemake anu mepate ira luwu mia andio? 10Imento'oriomo kanandio-andio, nahina maupo te'asa pau anu Dopauomo i Ue mongkona somborino i Ahabi, nahi inihii. Doweweuomo i Ue hapa anu pinau-Do molalo i Elia, tetenaa-Do.” 11#Hos. 1:4Ka i'amba i Yehu mepateo luwu mia anu tebinta inso a nsomborino i Ahabi i Yisire'eli, saru mbo'u luwuno miano anu langkai potorono, luwuno mia pine'ala-alano ka luwuno sando mpesombano, ranta nahina maupo te'asa mia anu tola.

12Ka i'amba i Yehu lumako i Samaria. A nsala umpeda i Beti-Ekedi, po'ianga tepotowoado luwuno puu mpopakambi, 13itepotowoako ira pe'etuno i Ahasia, mokole i Yehuda, ka ipesikeno, ”Isemake omiu?” Mesangki ira, ”Omami anano pe'etuno i Ahasia. Kami me'aiwa tepohaweako ira anado mokole ka luwuno anado ine mokole.” 14Motae i Yehu, ”Rako iramo kongkotuwu!” Domerako iramo kongkotuwu ka domensumbele ira umpeda sumuru Beti-Ekedi, luwuno pato pulu ka orua mia ka nahina maupo te'asa mia anu pino'inee tuwu. 15Mansado melako inso i ra'ai, itepotowoakono i Yonadabi anano i Rekabi anu aiwa tumotowoo. Ipetabeio ka ipotae, ”Nde moleo koa ke aroamu kana aroaku ndi omue?” Sumangki i Yonadabi, ”Humbee!” Motae i Yehu, ”Tewala kanatuu, taangakono kaemu!” Itaangakono kaeno ka i Yehu dumiio mewuatako i horino a laro ngkaretano. 16Motae i Yehu, ”Lakomo perongaakune, ka kitaomo tedoa pe'o'osuku ndi Ondae i Ue.” Ka i'amba i Yehu wawao a laro ngkaretano. 17Sahaweno i Samaria, i Yehu mepate ira luwuno mia anu da tebinta inso ndi Ahabi i Samaria. Iropuo ira luwu, menunu saru pau anu pinau-Do i Ue ndi Elia.

I Yehu mokotampulao pesombaa a Ba'ala

10:18-36

18I Yehu pumpu ira luwuno palili, ka i'amba motaeako ira, ”I Ahabi moluwe mesomba ndi Ba'ala, sine i Yehu ta laluaopo metenunu mesomba ndi onae. 19Kanandio-andio, poboi iramo luwuno nabi Ba'ala mpe'aro ndi ongkue, luwuno anu pesombaio ka luwuno sando mpesombano, si hina maupo te'asa mia nahi hawe, hangano aku mompesombaako pesomba anu langkai ndi Ba'ala. Isema anu nahi hawe nahi ta tuwu.” Iweweuo i Yehu andio, gagi akalano ta mepate ira luwu anu mpesombaio i Ba'ala. 20Motae mbo'u i Yehu, ”Impesusuaomo tepumpua langkai ndi i Ba'ala!” Onaemo ka domempaleleo. 21I Yehu montena mia lumako a luwuno Isaraeli. Ka i'amba luwuno anu mpesomba ndi Ba'ala mehawe, nahina maupo te'asa mia anu nahi hawe. Mpewinso ira a raha Ba'ala, ranta raha atuu pasopee. 22Ka i'amba i Yehu motaeakono puu mpodagai bolongko ponaapa sangka, ”Luarakonomo sangka tiano sompo mia anu mesomba ndi Ba'ala!” Ka i'amba lumuarakono sangka tiado.

23Umarino atuu i Yehu mewinso meronga saru i Yonadabi anano i Rekabi a raha Ba'ala ka ipotae a luwuno anu mpesombaio Ba'ala, ”Imemparesaomo, ka imengkitaomo, kasihina i olomiu i ndi'ai maupo te'asa mia tetenaa-Do i Ue, sangkadio luwuno anu mpesombaio Ba'ala.” 24Ka do'amba mpewinso mpopesombaako pesomba sinumbele ka pesomba tinunu. Kanatuumo i Yesu umariomo numaa ira halo pulu mia i bungkuno ka ipotae, ”Isema anu mompo'inee asa mia tola inso a luwudo mia anu kupeweengakono a ngkaemiu, penaanomo euno penaano mia atuu.” 25Nahi tehine mansano umari mompesombaako pesomba tinunu, i Yehu motaeako ira luwuno puu mpodagai ka luwuno petewawa sorodadu, ”Impewinsomo, impepate iramo, maupo te'asa mia si hina tola!” Mpewinso iramo mepateako ira mata mponai luwuno mia atuu. Luwuno puu podagai ka luwuno petewawa sorodadu atuu mentadio luwuno wata ngkoroido, ka do'amba melako a bolongko i larono raha Ba'ala. 26Domeluarakono luwuno tuguno raha Ba'ala ka do'amba mentunuo. 27Ka do'amba mpobangkuo tuguno Ba'ala ka raha Ba'ala. Dompokogagio po'ianga pontadia ta'i hawe oleo andio. 28Kanandiomo iropuo i Yehu Ba'ala inso i Isaraeli. 29#1Mok. 12:28-30Butumo koa, i Yehu nahi bintao luwuno halano i Yerobea anano i Nebati, onaemo hala mesombaia ira tinaha anano nsapi wulaa anu i Beteli ka anu i Dani, anu poko'ariano to Isaraeli mpoweweu mbo'u hala.

30Mepau Iramo i Ue ndi Yehu, ”Hangano moikoomo uweweuo hapa anu mentee a pongkita-Ku, ka uweweuomo a nsomborino i Ahabi kona ntu'u kana anu ineheno aroa-Ku, ranta luwuno anamu ira mpentoro a ngkadera poparentaa i Isaraeli hawe a inulemu ko'opaa.” 31Sine i Yehu nahi tuwu mpiha montonda songka-Do i Ue, Ue Alado to Isaraeli saru tompaano aroano. Nahi bintao luwuno halano i Yerobea anu poko'ariano to Isaraeli mpoweweu mbo'u hala. 32I tempo atuu Ondae i Ue mompu'u mokokodeio wita Isaraeli. I Hasaeli numangi ira a luwuno wita Isaraeli, 33Inso a ngkoro Yarade te'aro i sabaano oleo: luwuno wita Gileadi, witado to Gadi, to Rube, ka to Manase i sabaano oleo, inso i Aro'eri i wiwi ngkorono mo'are Aranoni, Gileadi hawe i Basani. 34Teweweuno i Yehu anu susua, luwuno anu wineweuno ka luwuno mosiano, kombake luwuno atuu teburi a wunta tutuludo luwuno mokole i Isaraeli? 35I Yehu mate ka kinaburu i Samaria. Ka i'amba i Yoahasi, anano gagi mokole umeuo. 36I Yehu moparenta a nto Isaraeli i Samaria rua pulu ka oalu nta'u tehineno.

Currently Selected:

2 Mokole 10: XMZ

Highlight

Copy

Compare