2 Mokole 21

I Manase mokole i Yehuda anu mosa'o gauno

21:1-18

(2Taw. 33:1-20)

1Tinuwuno i Manase hopulu ka orua nta'u tempono igagi mokole ka lima pulu ka olima nta'u tehineno ipoparenta i Yerusale. Neeno ineno i Hepisiba. 2#Yer. 15:4Onae moweweu hapa anu mosa'o a pongkita-Do i Ue, kana poweweudo anu mokoburu luwuno tongku anu Dosaari iramo i Ue inso i arodo to Isaraeli. 3Onae wali wangu ira pongku wita pesombaa anu umariomo iropu ira i Hisikia, amano. Iwangu ira meda pontunua pesomba ndi Ba'ala, moweweu tinaha Asera kana anu wineweuno i Ahabi, mokoledo to Isaraeli ka menggolontu mesomba a ihino langi ka mesomba ndi onae. 4#2Sam. 7:13Iwanguo luwuno meda pontunua pesomba a raha-Do i Ue, kahinaano mepau Iramo i Ue, ”Aku weweuo nee-Ku mo'ia i Yerusale!” 5Iwangu ira mbo'u meda pontunua pesomba tiado ihino langi a orua kintalano raha-Do i Ue. 6Tendeano, ipesombaakono anano a laro api, mongkita anu nahi manasa ta gagi, mompau anu nahi manasa ta gagi, tepohaweako ira puu pompoboi onitu ka puu pompoboi penaa mompau anu nahi manasa ta gagi. Hadio wineweuno anu mosa'o a pongkita-Do i Ue, ranta ka ipokotesingkao tekuda-Do. 7#1Mok. 9:3-5; 2Taw. 7:12-18Inaao mbo'u tinaha Asera anu umari wineweuno a laro raha-Do Ue Ala, maupo mongkona raha atuu mepau Iramo i Ue ndi Daudi ka ndi Salomo, anano, ”A laro raha andio ka i Yerusale anu Kubinikiomo inso i olono sukudo to Isaraeli, Aku weweuo nee-Ku mo'ia ranta nahina tampulaano! 8Nahi Aku mo'ineeo Isaraeli winawa mbo'u meluarako inso i wita anu Kuweeako iramo uempu'udo, polo ka dompoweweu mpiha mengkena kana anu Kuparentaako iramo ka mpekariao luwuno songka anu iparentaako ira tetenaa-Ku i Musa ndi ondae.” 9Sine nahi dobehe mpomperorongeako. I Manase sumosaelo ira ranta ka dompoweweu anu mosa'o laluaopo sekono luwuno tongku anu Doropu iramo i Ue inso i arodo to Isaraeli.

10Ka i'amba Ondae i Ue mepau molalo luwuno tetenaa-Do, luwuno nabi, 11”I Manase mokole i Yehuda moweweuomo luwuno wineweu mokoburu andio, moweweu mosa'o laluaopo sekono luwuno anu wineweudo to Amori anu mese'elungio. Hangano luwuno lahumoano poko'ariano iweweu iramo to Yehuda mpoweweu mbo'u hala. 12Hangano atuu, kanandiomo pau-Do i Ue, Ue Alado to Isaraeli, Menteeano Aku mompotiiakono masolaa i Yerusale ka i Yehuda, ranta isemamo koa anu rumongeo ta ngingii birino. 13Aku padindio koloro posongka i Yerusale kana i Samaria ka koloro pompokoleo kana a nsomborino i Ahabi. Aku pahihio Yerusale kana molodui sempe, lumoduio ka i'amba waliteo. 14Aku mo'ineeki ira toreano tia pusaka-Ku ka meweengako ira a ngkaedo luwuno iwalido. Ira megagi pomurua ka rontuado luwuno iwalido, 15hangano mpoweweu iramo anu mosa'o a pongkita-Ku ka mokotesingkao tekuda Aku, mompu'u dompeluarako uempu'udo hawe oleo andio.”

16Laanopo mbo'u i Manase mompepate mia anu nahina salano, hadio ntu'u ranta buke Yerusale inso i tompano hawe i tompano, napi tewinso luwuno halano anu poko'ariano to Yehuda mpoweweu ira mbo'u hala hangano mpoweweu anu mosa'o a pongkita-Do i Ue.

17Anu susua inso a nteweweuno i Manase, luwuno anu wineweuno ka luwuno hala anu wineweuno, kombake luwuno atuu teburi a wunta tutuludo mokole i Yehuda? 18Ka i'amba i Manase mate. Onae kinaburu a lere bunga langkanaeno, a lere bunga Usa. Ka i'amba i Amoni, anano gagi mokole umeuo.

I Amoni mokole i Yehuda

21:19-26

(2Taw. 33:21-25)

19Tinuwuno i Amoni rua pulu ka orua nta'u tempono igagi mokole ka orua nta'u tehineno ipoparenta i Yerusale. Neeno ineno i Mesulemeti anano i Haruni, inso i Yotiba. 20Onae moweweu hapa anu mosa'o a pongkita-Do i Ue kana anu wineweuno i Manase, amano. 21Itondao luwuno sala ntumuwu anu lineluno amano. Ipesombai ira lahumoa anu pinesombaino amano ka menggolontu mesombai ira. 22Ipebungkui Ira i Ue, Ue Alado uempu'uno ka nahi tondao sala-Do i Ue. 23Luwuno pegawaino i Amoni ntepo'asa umewaio ka mpepateo mokole a langkanaeno. 24Sine, palili i wita atuu mpepate ira luwuno mia anu ntepo'asa umewaio mokole Amoni ka mpotoroo i Yosia, anano gagi mokole umeuo.

25Anu susuano inso a nteweweuno i Amoni, hapa anu wineweuno, kombake luwuno atuu teburi a wunta tutuludo mokole i Yehuda? 26Ka i'amba kinaburu a laro ngkaburuno a lere bunga Usa. Ka i'amba i Yosia, anano gagi mokole umeuo.

Currently Selected:

2 Mokole 21: XMZ

Highlight

Copy

Compare