2 Mokole 20

I Hisikia mahaki ka pinokotompa

20:1-11

(2Taw. 32:24-26; Yes. 38:1-22)

1A luwuno oleo atuu i Hisikia mahaki ka ilawupo imate. Ka i'amba i nabi Yesaya anano i Amosi aiwa ka ipotaeakono, ”Kanandiomo pau-Do i Ue: Pobintamo pe'oliwimu a nsomborimu, hangano omue komate, nami kotompa mbo'u.” 2I Hisikia wolilio rupano me'aro a rere ka ipekakai ndi Ondae i Ue, 3”Oo Ue, po'ineomo Irambeo nine tuwu akumo metenunu i aro-Miu ka moleo aroa; moweweu akumo hapa anu moiko a pongkita-Miu.” Ka i'amba i Hisikia mengese mongkoko'undu. 4Se'eluno napi peluarako i Yesaya inso a kintala i tongano, haweomo pau-Do i Ue ndi onae, 5”Pekulemo ka pauakono i Hisikia, mokoledo bawaa-Ku: Kanandiomo pau-Do i Ue, Ue Alano i Daudi, ama mpu'umu: Kurongeomo pekakaimu ka Kukitaomo uwoi matamu. Menteeano Aku koa mokotompako. A oleo ko'otolu omue kolumako a raha-Do i Ue. 6Aku mokomelaio tinuwumu hopulu ka olima nta'u mbo'u. Aku koa motolako ka kota andio inso a ngkaeno mokoledo to Asuri ka walao kota andio hangano Ongkue ka hangano i Daudi, tetenaa-Ku.” 7Ka i'amba motae i Yesaya, ”Alaomo kukisi ara!” Ka do'amba me'alao mia ka menaao a ngkambano atuu, ka onae tompaomo. 8Se'eluno atuu i Hisikia mepauomo ndi Yesaya, ”Hapake tondonino nine Ondae i Ue Ira mokotompa aku ka aku koa lumako a raha-Do i Ue a oleo anu ko'otolu?” 9Sumangki i Yesaya, ”Ndiomo anu ta gagi petondoni ndi omue inso ndi Ondae i Ue nine Ondae i Ue Ira weweuo hapa anu umariomo dinandi-Do; Nde eo-eo atuu melempa hopulu laampa'a ke monsuka hopulu laampa'a?” 10Motae i Hisikia, ”Moruana koa eo-eo atuu ta me'ondauako hopulu laampa'a! Posuleno, asalakono eo-eo atuu mosuka hopulu laampa'a i bungkuno.” 11Mebooliomo i nabi Yesaya ndi Ondae i Ue, ka i'amba Ondae i Ue weweuo eo-eo atuu mosuka hopulu laampa'a i bungkuno inso a olono anu umariomo ipelempario a pontisono mata oleo wineweuno i Ahasi.

I Hisikia ka luwuno tinena inso i Babeli

20:12-21

(2Taw. 32:27-33; Yes. 39:1-8)

12I tempo atuu i Merodaki-Baladani anano i Baladani, mokole i Babeli, montena mia mowawa wunta ka pompowee ndi Hisikia, hangano irongeo i Hisikia mahaki. 13Mawongko aroano i Hisikia domehawe. Ipopokitaako ira luwuno raha langkai ponaapa arataano, wulaa ka salaka, rampa-rampa ka lana anu hadio olino, raha langkai ponaapa parewa mpeteano ka luwuno anu hina a laro mponaapa arataano. Nahina sangka anu nahi popokitao i Hisikia ndi ondae, moiko i langkanae maupo a luwuno wita pinabawaino. 14Ka i'amba haweomo i nabi Yesaya ndi mokole Hisikia ka ipesikeno ndi onae, ”Hapamo ke anu pinaudo mia andiodo? Isuake dome'inso?” Sumangki i Hisikia, ”Ondae me'aiwa inso i wita anu olai, inso i Babeli!” 15Isikenoo mbo'u, ”Hapamo anu kinitado a langkanaemu?” Sumangki i Hisikia, ”Luwuno anu hina a langkanaeku domengkitaomo. Nahina anu nahi kupopokitaako ira a mponaapa arataaku.” 16Ka i'amba motae i Yesaya ndi Hisikia, ”Rongeomo pau-Do i Ue! 17#2Mok. 24:13-15; 2Taw. 36:10; Dan. 1:1-7Menteeano, ta hawe tempono, luwuno anu hina a langkanaemu ka anu ninaado uempu'umu hawe oleo andio ta winawa i Babeli. Nahina anu ta tebinta, kanandiomo pau-Do i Ue. 18Asa ntia inso a inulemu anu ta hinawemu, ta inala gagi pegawai a langkanaeno mokole i Babeli.” 19Sumangki i Hisikia ndi Yesaya, ”Moiko ntu'u pau-Do i Ue anu pinaumu atuu!” Sine pinewowolono, ”Poolo ka ihina manangai ka rodoa asa ntinuwuku!” 20Anu susua inso a nteweweuno i Hisikia, luwuno mosiano ka kana'umpe ipoweweu limbo ka pangkorono uwoi ka mowaao uwoi a laro ngkota, kombake luwuno atuu teburi a wunta tutuludo mokole i Yehuda? 21I Hisikia mate. Ka i'amba i Manase anano gagi mokole umeuo.

Currently Selected:

2 Mokole 20: XMZ

Highlight

Copy

Compare