2 Mokole 18

I Hisikia mokole i Yehuda

18:1-12

(2Taw. 29:1-2)

1Ia ta'u ko'otolu poparentaano i Hosea anano i Ela, mokole i Isaraeli, i Hisikia anano i Ahasi mokole i Yehuda gagi mokole. 2Tinuwuno rua pulu ka olima nta'u tempono igagi mokole ka rua pulu ka osio nta'u tehineno ipoparenta i Yerusale. Neeno ineno i Abi anano i Sakaria. 3Onae moweweu hapa anu mentee a pongkita-Do i Ue, mengkena kana anu wineweuno i Daudi, ama mpu'uno. 4#Pod. 21:9Ipokotampulao luwuno pongku wita pesombaa, luwuno tugu ipuro-puroo ka luwuno karuno pelahumoaa ituehio, saru ule mala wineweuno i Musa iperawo-rawoo, hangano hawe i tempo atuu to Isaraeli da mpotunu pesomba tiano ule anu pinau Nehusitani atuu. 5Onae mompe'ala-ala ndi Ondae i Ue, Ue Alado to Isaraeli, ka i olodo luwuno mokole i Yehuda, moiko anu umarino onae maupo anu se'eluno, nami hina mbo'u anu mengkena kana onae. 6Onae me'ini moroso ndi Ondae i Ue. Onae nahi pebungkui Ira i Ue, tendeano me'ini a luwuno parenta anu Dopohaweomo ndi Musa. 7Ondae i Ue kumongkomio, maupo isua ilako mehasili. Onae umewaio mokoledo to Asuri ka nami petenunu mbo'u ndi onae. 8Inangi ira mbo'u to Pelisiti hawe i Gasa ka luwuno witano, mompu'u inso a ngkota hinao menara podagaia ranta a ngkota mebente.

9Ia ta'u ko'opaa poparentaano mokole Hisikia, onaemo ta'u ko'opitu poparentaano i Hosea anano i Ela, mokole i Isaraeli, lumakoomo i Salamaneseri, mokoledo to Asuri sumapoio Samaria ka kumaduo. 10Kota atuu pinongko'ala umarino lalo otolu nta'u. Kanandiomo ipinongko'ala Samaria ia ta'u ko'onoo poparentaano i Hisikia, onaemo ta'u ko'osio poparentaano i Hosea, mokole i Isaraeli. 11Mokoledo to Asuri wawa ira to Isaraeli a pontadia i Asuri ka numaa ira i Halahi, a wiwi ngkoro Habori i wita Gosani ka a luwuno kotado to Madai. 12Kai gagi kanatuu hangano nahi domperorongeakono pau-Do i Ue, Ue Alado ka melimpaio pedandia-Do, luwuno anu iparentaako ira i Musa, tetenaa-Do i Ue. Nahi domebehe mperorongeakono ka nahi domeweweuo.

I Sanaheri, mokoledo to Asuri kumaduo Yerusale

18:13-37

(2Taw. 32:1-19; Yes. 36:1-22)

13Ia ta'u kohopulu ka opaa poparentaano mokole Hisikia, i Sanaheri mokoledo to Asuri lumako sumapoio luwuno kota mebente i wita Yehuda, ka i'amba mongko'alao. 14I Hisikia mokole i Yehuda montena mia ndi mokoledo to Asuri i Lakisi, saru pe'oliwi, ”Salaomo wineweuku. Posukamo inso ndi ongkue. Maupo hapa ipopotembiakune aku umihiio.” Ka i'amba mokoledo to Asuri mopotembiakono i Hisikia, mokole i Yehuda, tolu etu talenta salaka ka tolu pulu talenta wulaa. 15I Hisikia meweengakono luwuno salaka anu kongko a laro raha-Do i Ue ka anu pinekaria a langkanaedo mokole. 16I tempo atuu i Hisikia bolongko wulaa inso a luwuno pewowa ka a luwuno arono pewowano raha-Do i Ue, anu umariomo i'apiio i Hisikia, mokoledo to Yehuda. Luwuno ipeweengakono ndi mokoledo to Asuri.

17Umarino atuu mokoledo to Asuri tumena ira tadulako sorodadu, i rabi-sarisi ka i rabi-sakehi inso i Lakisi lumako ndi mokole Hisikia i Yerusale, sorodadu anu hadio tumonda ira. Melako ira ka mehawe i Yerusale. Mansado melako ka mehawe i tu'ai, mpo'ala ira po'ianga umpeda pangkorono limbo i wawono a nsala langkai a Pada Penatu. 18Ondae mebo-boolio mokole. Ka i'amba i Eliakimi anano i Hilikia, petewawa a langkanae, meluarako tepohaweako ira, ipokowalio i Sebina puu mpoburi a poparentaa saru i Yoahi anano i Asapi, puu pompekaria arataano poparentaa. 19Motae i rabi-sakehi atuu ndi ondae, ”Pohaweakonomo i Hisikia: Kanandiomo paudo mokole pinelangkai, mokoledo to Asuri: Pompe'ala-ala hapa anu ininimu andio? 20Potaemu butu pauno wiwimokoa tamo gagi pe'akala ka roso mpetea! Kanandio-andio, isema anu pinerorohimu kau pe'ewa ndi ongkue? 21Oo, momperorohiko a nto Masiri, tuko balo anu tepudu atuu, anu ta dumuhuo kai lompahi kaeno mia anu metumbo ndi onae. Kanatuumo teweweuno i Pirao mokole i Masiri, a luwuno mia anu momperorohi ndi onae. 22Ke bara'ura komotae ndi ongkue: Mpoperorohi kami ndi Ondae i Ue, Ue Alamami. Kombake Ondae atuu anu luwuno pongku wita pesombaa ndi Ondae ka luwuno meda mpontunua pesomba ndi Ondae ipoko'olaiomo i Hisikia? Kombake ipotaeako ira to Yehuda ka Yerusale: I arono meda pontunua pesomba anu i Yerusalemo andio asalakono impenggolontu mpesomba! 23Kanandio-andio, peta'oako iramo ueku, mokoledo to Asuri: Aku koa moweeakomu rua nsowu ngara poolo inso ndi omue upolio meweengako ira mia anu mokompesawikio. 24Kana'umpemo komonsaari asa mia petewawa sorodadu maupo anu lalu kodei inso i olono atado ueku? Kahinaano momperorohiko a nto Masiri komohawe kareta ka mia mpengara! 25Ka mbo'u, nde aku aiwa umewaio wita andio ka rumopuo ba nahi saru Ondae i Ue? Ondae isa'a i Ue mepau Iramo ndi ongkue: Lakomo sapoio wita atuu ka ropuomo atuu!” 26Ka i'amba motaeomo i Eliakimi anano i Hilikia, i Sebina ka i Yoahi ndi rabi-sakehi atuu, ”Pepaumo a mpaudo to Arami ndi omami atamiu andio, hangano kimento'orio. Sine siimo ipepauakami a mpau Yehuda ira merongeo palili anu mekongko a wawo rere watu.” 27Sine motae i rabi-sakehi atuu, ”Nde dotena aku ueku pauo luwuno pau andio butu ndi ondae uemiu ka ndi omiumokoa? Kombake kutinena mbo'u a luwuno mia anu mpentoro a wawo rere watu, anu mpongkaa ta'ido ka mpo'inu uwoi emedo ondaedo saru omiu?” 28Ka i'amba i rabi-sakehi mbo'u atuu mentade ka mebooli meroku a mpau Yehuda, ipotae. ”Imerongeomo paudo mokole langkai, mokoledo to Asuri! 29Kanandiomo paudo mokole: Siimo ipopandeikomiu i Hisikia, hangano onae nahi ta polio motola komiu inso a ngkaeku! 30Si mpo'ineeo i Hisikia umoluakomiu pomperorohi ndi Ondae i Ue ka ipotae: Ondae i Ue manasa Ira motola kita. Kota andio nahi ta pineweengako a ngkaeno mokoledo to Asuri. 31Si merongeo i Hisikia, hangano kanandiomo paudo mokoledo to Asuri: Poweweumo pedandia sintuwu saru ongkue ka peluarakomo tepohaweakune, ka sompo mia inso i olomiu ta mongkaa inso a ngkeu anggorono ka keu arasino saru mo'inu inso a nsumuruno, 32ranta ka kuhawe ka wawa komiu a asa wita kana witamiu, wita hinao gandu ka uwoi anggoro, wita hinao lere anggoro ka roti, wita hinao keu saitu, hinao lana ka siu hoani, ranta kai mentuwu nahi memate. Si merongeo i Hisikia, hangano ipopandei komiu ka ipotae: Ondae i Ue Ira motola kita! 33Horio ke luwuno pinesombaido susua luwuno tongku singge motolao witano inso a ngkaeno mokoledo to Asuri? 34Isua iramo pinesombaido susua i wita Hamati ka Aripadi? Isua iramo pinesombaido susua i wita Separawaimi, Hena ka Iwa? Nde dompotolaomo ke Samaria inso a ngkaeku? 35Isemake i olodo luwuno pinesombaido susua a luwuno wita atuu anu motolaomo witado inso a ngkaeku, ranta Dopolio i Ue motolao Yerusale inso a ngkaeku?” 36Sine, palili butu komino ka nahi domesangkio maupo te'asa mpali pau, hangano hinao parentado mokole, anu motae, ”Si mesangkio!” 37Ka i'amba lumakoomo i Eliakimi anano i Hilikia, petewawa langkanae, ka i Sebana, puu mpoburi a poparentaa, ka i Yoahi anano i Asapi, puu pompekaria arataa a poparentaa, mpe'aro ira ndi Hisikia, saru sangkano anu bineri, ka i'amba pauako ira mokole pauno i rabi-sakehi atuu.

Currently Selected:

2 Mokole 18: XMZ

Highlight

Copy

Compare