2 Mokole 17

I Hosea mokole i Isaraeli

17:1-6

1Ia ta'u kohopulu ka orua poparentaano i Ahasi mokole i Yehuda, i Hosea anano i Ela gagi mokoledo to Isaraeli i Samaria. Onae moparenta osio nta'u tehineno. 2Onae moweweu anu mosa'o a pongkita-Do i Ue, sine komba kana luwuno mokole i Isaraeli anu mese'elungio. 3I Salamaneseri, mokoledo to Asuri lumako umewaio. I Hosea gagi atano ka mo'owahi peki'ue ndi onae. 4Sine mokoledo to Asuri mohawe tepo'asaa umewa ndi Hosea anu tumena iramo mia melako ndi So, mokoledo to Masiri, ka nami pompesombaako mbo'u peki'ue ndi mokoledo to Asuri, kana wineweudo sompo ta'u. Onaemo pu'uno mokoledo to Asuri rumakoo ka itorungkuo. 5Ka i'amba mokoledo to Asuri sumapoio luwuno wita atuu. Onae lumako i Samaria ka ikaduo otolu nta'u tehineno. 6Ia ta'u ko'osio poparentaano i Hosea, mokoledo to Asuri mongko'alao Samaria ka wawa ira to Isaraeli a pontadia i Asuri. Ipoweeako ira po'ianga i Halahi i wiwi ngkoro Habori i Gosani, ka a luwuno kotado to Madai.

Tedontano poparentaa Isaraeli

17:7-23

7Kai gagi kanatuu, hangano to Isaraeli ntehala iramo ndi Ondae i Ue, Ue Alado anu tumaate iramo mpeluarako inso i wita Masiri, inso a mpabawano i Pirao. Mpesomba iramo a luwuno pinesombai susua, 8ka tuwu montonda pompakosido luwuno tongku anu Dosaari iramo i Ue inso i arodo to Isaraeli, ka montonda pompakosi anu domeweweuomo luwuno mokole i Isaraeli. 9To Isaraeli mpoweweu luwuakoano anu nahi pototo ndi Ondae i Ue, Ue Alado. Domewangu ira pongku wita pesombaa a luwuno kotado, mompu'u inso a ngkota anu hinao menara podagaia ranta a ngkota mebente. 10#1Mok. 14:23Domewangu ira tugu lahumoa ka luwuno karuno pelahumoaa i wawono sompo pongku wita anu mantande ka i totono sompo keu anu marombo; 11I ra'ai i wawono sompo pongku wita atuu mpontunu ira pesomba mengkena kana luwuno tongku anu Doliahako iramo i Ue inso i arodo. Mpoweweu ira luwuakoano anu mosa'o ranta mokotesingkao tekuda-Do i Ue. 12Mpesomba ira a luwuno lahumoa, maupo Dopepaumo i Ue ndi ondae, ”Si mpoweweu kanatuu!” 13Dopopoto'oriako Iramo i Ue to Isaraeli ka to Yehuda molalo luwuno nabi ka luwuno puu mpongkita, ”Impepokulemo inso a luwuno salamiu anu mosa'o ka impekariaomo luwuno parenta ka pompakosi-Ku, menunu saru luwuno songka anu Kuparentaako iramo uempu'umiu ka anu Kupohaweako iramo molalo luwuno tetenaa-Ku, luwuno nabi.” 14Sine nahi dobehe pomperorongeako, mpe'ulu watu ira kana uempu'udo anu nahi dompe'ala-ala Ira i Ue, Ue Alado. 15Nahi domentarimao pompakosi ka pedandia-Do anu Dowutuomo saru uempu'udo, saru luwuno atora-Do anu Dopopoto'oriako iramo. Mpetonda ira a anu pinesombai susua anu nahina pengkonaano; mpelelu ira nahina pengkonaano tumondao luwuno tongku petengi-tengido, maupo Doparenta iramo i Ue kasi dompoweweu kanatuu. 16#1Mok. 12:28Dompebungkuio luwuno parenta-Do i Ue, Ue Alado, ka mpoweweu ira orua ana nsapi tinawa. Mpoweweu ira mbo'u tinaha Asera ka mpenggolontu mpesomba a luwuno sorodadu langi saru mpesomba ndi Ba'ala. 17#Win. 28:20Dompesombaako ira anado gagi pesomba a laro api. Mpoparesa ira ura ke rugino mia ka mpopau ira anu ta gagi, saru me'asao koroido mpoweweu anu mosa'o a pongkita-Do i Ue, ranta mokotesingkao tekuda-Do i Ue. 18Onaemo pu'uno Ondae i Ue tedoa Ira ntu'u tekuda a nto Isaraeli, ka Doropu ira inso i aro-Do. Nahina torea sangkadio butu suku Yehuda. 19To Yehuda mbo'u nahi dompekariao parenta-Do i Ue, Ue Alado. Mentuwu ira montonda luwuno anu wela wineweudo to Isaraeli. 20Hangano kanatuu, Ondae i Ue nahi Dotarimao luwuno inuledo to Isaraeli; Dopokomarasai ira ka meweengako ira a ngkaedo puu mporontu, ranta Dotadi ira inso i aro-Do. 21Tempono Doponsia ira to Isaraeli inso a nsomborino i Daudi, dompotoroo i Yerobea anano i Nebati gagi mokole, sine i Yerobea weweu ira to Isaraeli mepansia, olaiako Ira i Ue ka poko'ariano mpoweweu ira hala langkai. 22To Isaraeli mentuwu montonda luwuno hala anu wineweuno i Yerobea; nahi dome'olaiakono, 23ranta ka Doropu ira i Ue to Isaraeli inso i aro-Do kana anu Dopauomo molalo luwuno tetenaa-Do, luwuno nabi. To Isaraeli mewinawa inso i witado a pontadia i Asuri. Kanandiomo hawe oleo andio.

Pesaloano pompe'ala-alado tongku i Samaria

17:24-41

24Mokoledo to Asuri mowawa mia inso i Babeli, i Kuta, i Awa, i Hamati ka i Separawaimi, ka i'amba kuweeako ira po'ianga a luwuno kota Samaria umeu ira to Isaraeli. Luwuno mia atuudo mpetorokio Samaria ka mpo'ia a luwuno kotano. 25Amba-ambano tempono dompo'ia i ra'ai nahi domedoitoako Ira i Ue. Onaemo pu'uno Dopotola ira i Ue singa i tonga-tongado anu mompepate ba opia mia i olodo. 26Ka do'amba mempauakono mokoledo to Asuri, ”Luwuno tongku anu winawamiu a laro pontadia ka inaa ira a luwuno kotano Samaria nahi dompe'ala-alao songka-Do Ue Alano wita atuu. Gagi mompotola Ira singa i tonga-tongado anu mepate ira, hangano nahi dompe'ala-alao songka-Do Ue Alano wita atuu.” 27Ka i'amba mokoledo to Asuri meparenta, ”Tenaomo lumako raane asa mia i olodo sando mpesomba anu imewawaomo inso i ra'ai a pontadia. Po'ineeomo ilako mo'ia mpiha i ra'ai ka paguruako ira songka-Do Ue Alano wita atuu!” 28Asa mia i olodo sando mpesomba anu domewawaomo inso i Samaria a laro pontadia lumako mo'ia mpiha i Beteli. Ipaguruako ira kana'umpe asalakono ba dompesomba ndi Ondae i Ue. 29Sine sompo tongku atuu mpoweweu iramo pesombaado susua ka domenaao a raha mpelahumoaado, anu wineweudo to Samaria. Sompo tongku mpoweweu kanandio i luwuno kota anu dompo'iangario: 30To Babeli mpoweweu tinaha Sukoti-Benoti, to Kuta mpoweweu tinaha Nerigali, to Hamati mpoweweu tinaha Asima, 31ka to Awa mpoweweu tinaha Nibahasi ka Tarataki. To Separawaimi mpotunu anado gagi pesomba ndi Adarameleki ka Anameleki, luwuno pesombaa susua i Separawaimi. 32Mpesomba ira ndi Ondae i Ue, sine mpopotoro ira mbo'u sando mpesomba a raha pelahumoaa. Sando mpesombamo andiodo anu mpoweweuako ira pesomba a raha pelahumoaa atuu. 33Mpesomba ira ndi Ondae i Ue, sine mpesomba ira mpiha a luwuno pinesombaido susua menunu kana anu wela wineweudo luwuno tongku insoado, inso isua domewinawa a laro pontadia. 34#Teg. 32:28; 35:10Hawe oleo andio mpenunu ira kana anu ela wineweudo i ndi'ipua.

Nahi dompesomba ndi Ondae i Ue ka nahi dompoweweu menunu saru pompakosi, atora, songka ka parenta anu pinakosi-Do i Ue tiado luwuno anano i Yako anu Doneeakono Isaraeli. 35#Pel. 20:5; Win. 5:9Ondae i Ue moweweu pedandia saru ondae ka moweeako ira parenta, ”Siimo impesomba a pinesombai susua, siimo impenggolontu mpesombaio, siimo impesomba ke mpopesombaako pesomba ndi onae. 36#Win. 6:13Sine asalakono impesombamo ndi Ondae i Ue, anu tumaateakomiu roso langkai ka kae anu tetande inso i wita Masiri. Asalakono impenggolontu mpesombai Ira ka mpopesombaako pesomba ndi Ondae. 37Omiu asalakono mpe'ini a luwuno pompakosi, atora ka songka ka parenta anu Doburiakomiumo ka imeweweuo mpiha ka siimo impesomba a luwuno anu pinesombai susua. 38Si mengkolupeo pedandia anu Kuweweuomo saru omiu ka siimo impesomba a anu pinesombai susua. 39Butu ndi Ondaemo i Ue, Ue Alamiu asalakono impesomba, manasa Ira motola komiu inso a ngkaedo luwuno iwalimiu.” 40Sine nahi dobehe mperorongeakono, tendeano mpoweweu ira kana anu wineweudo i ndi'ipua.

41Kanandiomo luwuno tongku andio mpesomba ndi Ondae i Ue, sine mpesomba ira mbo'u a luwuno lahumoado; moiko luwuno anado maupo luwuno ana'uedo moweweu kana anu wineweudo uempu'udo hawe oleo andio.

Currently Selected:

2 Mokole 17: XMZ

Highlight

Copy

Compare