2 Mokole 15

I Asaria mokole i Yehuda

15:1-7

(2Taw. 26:3-5; 16–23)

1Ia ta'u korua pulu ka opitu poparentaano i Yerobea, mokole i Isaraeli, i Asaria anano i Amasia mokole i Yehuda gagi mokole. 2Tinuwuno hopulu ka onoo nta'u tempono igagi mokole ka lima pulu ka orua nta'u tehineno ipoparenta i Yerusale. Neeno ineno i Yekolia, inso i Yerusale. 3Onae moweweu hapa anu mentee a pongkita-Do i Ue, mengkena kana anu wineweuno i Amasia, amano. 4Butu koa luwuno pongku wita pesombaa nahi pokotampulao. Mia da mpopesombaako pesomba ka mpotunu dupa a luwuno pongku wita atuu. 5Ondae i Ue moweako ira mokole pohuku, ranta ka domarasaiako haki ngkuli anu mongkokongiri hawe oleo mateado ka mo'ia ira i asa raha peliahakoa. I Yotami anano mokole, kumapalaio langkanae ka molempao poparentaa a mpalili i wita atuu.

6Anu susuano inso a nteweweuno i Asaria ka luwuno anu wineweuno, kombake luwuno atuu teburi a wunta tutuludo mokole i Yehuda? 7#Yes. 6:1; 7:1I Asaria mate ka ikinaburu i horino uempu'uno i kota Daudi. Ka i'amba i Yotami anano, gagi mokole umeuo.

I Sakaria mokole i Isaraeli

15:8-12

8Ia ta'u kotolu pulu ka oalu poparentaano i Asaria, mokole i Yehuda, i Sakaria anano i Yerobea gagi mokole a nto Isaraeli i Samaria. Onae moparenta onoo wula tehineno. 9Onae moweweu hapa anu mosa'o a pongkita-Do i Ue kana anu domeweweuomo uempu'uno. Nahi bintao luwuno halano i Yerobea anano i nebati, anu poko'ariano to Isaraeli mpoweweu mbo'u hala. 10I Salumi anano i Yabesi tepo'asa umewaio. Isapoio ka ipepateo i Yibileami, ka i'amba gagi mokole umeuo.

11Anu susuano inso a nteweweuno i Sakaria, menteeano teburi a wunta tutuludo mokole i Isaraeli. 12#2Mok. 10:30Kanandiomo pau-Do i Ue anu pinohawe ndi Yehu, ”Luwuno anamu hawe a inule anu ko'opaa ira mpentoro a ngkadera poparentaa i Isaraeli,” ka gagiomo kanandio.

I Salumi mokole i Isaraeli

15:13-16

13I Salumi anano i Yabesi gagi mokole a nta'u anu kotolu pulu ka osio poparentaano i Usia, mokole i Yehuda. Onae moparenta i Samaria asa wula tehineno. 14Umarino atuu i Menahemi anano i Gadi melungka inso i kota Tiresa, ka i'amba hawe i Samaria. Isapoio i Salumi anano i Yabesi i Samaria ka ipepateo, ka i'amba gagi mokole umeuo.

15Anu susuano inso a nteweweuno i Salumi ka tepo'asaa umewa anu wineweuno, menteeano teburi a wunta tutuludo mokole i Isaraeli. 16Ia tempo atuu mompu'u inso i kota Tiresa, i Menahemi sumapoio kota Tiresa ka luwuno mia anu kongko i larono saru witano, hangano kota atuu nahi inungkahiako. Iropuo kota atuu ka ibonsio luwuno beine anu mentia.

I Menahemi mokole i Isaraeli

15:17-22

17Ia ta'u kotolu pulu ka osio poparentaano i Asaria mokole i Yehuda, i Menahemi anano i Gadi gagi mokoledo to Isaraeli. Onae moparenta i Samaria hopulu nta'u tehineno. 18Onae moweweu hapa anu mosa'o a pongkita-Do i Ue. Nahi bintao luwuno halano i Yerobea anano i Nebati, anu poko'ariano to Isaraeli mpoweweu mbo'u hala. 19I Puli mokole i Asuri, hawe sumapoio wita atuu. Ka i'amba i Menahemi moweeakono i Puli asa nsowu talenta salaka, kai pokowalio mokorosoo poparentaa atuu a ngkaeno. 20I Menahemi mopotembiako ira doi andio a nto Isaraeli, a luwuno mia anu mompoli ka anu pinelangkai, sompo mia lima pulu sikala salaka anu ta wineeako ndi mokole i Asuri. Ka i'amba mokole i Asuri mekule ka nahi po'ia i ra'ai, i wita atuu.

21Anu susuano inso a nteweweuno i Menahemi ka luwuno anu wineweuno, kombake luwuno atuu teburi a wunta tutuludo mokole i Isaraeli? 22I Menahemi mate. Ka i'amba i Pekahiya, anano gagi mokole umeuo.

I Pekahiya mokole i Isaraeli

15:23-26

23Ia ta'u kolima pulu poparentaano i Asaria, mokole i Yehuda, i Pekahia anano i Menahemi, gagi mokoledo to Isaraeli i Samaria. Onae moparenta orua nta'u tehineno. 24Onae moweweu anu mosa'o a pongkita-Do i Ue. Nahi bintao luwuno halano i Yerobea anano i Nebati anu poko'ariano to Isaraeli mpoweweu mbo'u hala. 25Ka i'amba i Pekahi anano i Remalia, petewawa sorodaduno tepo'asa umewaio. I Samaria a benteno langkanaedo mokole, i Pekahi saru lima pulu mia inso a inuleno i Gileadi mepateo i Pekahia, i Arigo ka i Arie. Kanandiomo i Pekahi mepateo i Pekahia ka i'amba gagi mokole umeuo.

26Anu susuano inso a nteweweuno i Pekahia ka luwuno anu wineweuno, menteeano teburi a wunta tutuludo mokole i Isaraeli.

I Pekahi mokole i Isaraeli

15:27-31

27Ia ta'u kolima pulu ka orua poparentaano i Asaria mokole i Yehuda, I Pekahi anano i Remalia gagi mokoledo to Isaraeli i Samaria. Onae moparenta rua pulu nta'u tehineno. 28Onae moweweu hapa anu mosa'o a pongkita-Do i Ue. Onae nahi bintao luwuno halano i Yerobea anano i Nebati, anu poko'ariano to Isaraeli mpoweweu mbo'u hala. 29I tempo poparentaano i Pekahi mokole i Isaraeli, haweomo i Tigalati-Pileseri mokole i Asuri mongko'alao Iyoni, Abeli-Beti-Ma'aka, Yanoahi, Kedesi ka Hasori, Gileadi ka Galilea saru luwuno wita Napatali. Ka i'amba wawa ira palilino a pontadia i Asuri. 30I Hosea anano i Ela moweweu tepo'asaa umewaio i Pehahi anano i Remalia. I Hosea mepateo, ka i'amba gagi mokole umeuo ia ta'u korua pulu poparentaano i Yotami anano i Usia.

31Anu susuano inso a nteweweuno i Pekahi ka luwuno anu wineweuno, menteeano teburi a wunta tutuludo mokole i Isaraeli.

I Yotami mokole i Yehuda

15:32-38

32Ia ta'u ko'orua poparentaano i Pekahi anano i Remalia mokole i Isaraeli, i Yotami anano i Usia mokole i Yehuda gagi mokole. 33Tinuwuno rua pulu ka olima nta'u tempono igagi mokole ka onae moparenta i Yerusale hopulu ka onoo nta'u tehineno. Neeno ineno i Yerusa, anano i Sadoki. 34Onae moweweu hapa anu mentee a pongkita-Do i Ue, mengkena kana anu wineweuno i Usia, amano. 35Butu koa luwuno pongku wita pesombaa nahi pokotampulao. Tongku atuu da mpopesombaako pesomba ka mpontunu dupa a luwuno pongku wita atuu. Iwanguo Pewowa Langkai Mantande a raha-Do i Ue.

36Anu susuano inso a nteweweuno i Yotami ka anu wineweuno, kombake luwuno teburi a wunta tutuludo mokole i Yehuda? 37I tempo atuu Ondae i Ue mompu'u tumenao i Resini mokoledo to Arami ka i Pekahi anano i Remalia umewaio Yehuda. 38Ka i'amba i Yotami mate. Onae kinaburu saru uempu'uno i kota Daudi, ama mpu'uno. Ka i'amba i Ahasi, anano gagi mokole umeuo.

Currently Selected:

2 Mokole 15: XMZ

Highlight

Copy

Compare