2 Mokole 14

I Amasia mokole i Yehuda

14:1-22

(2Taw. 25:1–26:2)

1Ia ta'u ko'orua poparentaano i Yoasi anano i Yoahasi, mokole i Isaraeli, i Amasia anano i Yoasi, mokole i Yehuda, gagi mokole. 2Tinuwuno rua pulu ka olima nta'u tempono igagi mokole ka rua pulu ka osio nta'u tehineno ipoparenta i Yerusale. Neeno ineno i Yoadani, inso i Yerusale. 3Onae moweweu hapa anu mentee a pongkita-Do i Ue, butumo koa nahi kana i Daudi, ama mpu'uno. Wineweuno mengkena kana anu wineweuno i Yoasi, amano. 4Butu koa luwuno pongku wita pesombaa nahi pokotampulao. Mia da mpopesombaako pesomba ka mpotunu dupa a luwuno pongku wita atuu. 5Mansano poparentaa atuu morosoomo a ngkaeno, ipepate ira atano anu umari mepateo mokole, onaemo amano. 6#Pod. 24:16Sine luwuno anado puu mpopepate atuu nahi huku mate ira, kana anu teburi a wunta songka Taurano i Musa, kana peparenta-Do i Ue, ”Si mehuku mateo ama hangano anano, ka anano mbo'u si hinuku mate hangano amano, tendeano sompo mia asalakono hinuku mate hangano halano onaeno.”

7I Amasia numangi ira hopulu nsowu to Edomi i Lembono Asini, ka ipongko'alao kota Sela a laro mpeteaa atuu. Ka i'amba kota atuu nineeako Yokete'eli hawe oleo andio.

8I tempo atuu i Amasia montena mia lumako ndi Yoasi anano i Yoahasi anano i Yehu, mokole i Isaraeli, saru pe'oliwi, ”Aropi akumo tepopo'aro!” 9Sine i Yoasi, mokole i Isaraeli montena mia lumako ndi Amasia, mokole i Yehuda, saru pe'oliwi, ”Laro rui i Libano me'oliwi a ngkeu arasi i Libano, unino: Peweengakonomo anamu beine a anaku tama gagi kombiano. Sine kondehora mo'ila anu kongko i Libano telalo ka lumandao laro rui atuu. 10Omue lano unangiomo Edomi, onaemo kau pompelangka-langkai. Po'undeakonomo ponangimu ka po'iamo i rahamu. Tembio kau po'ungke-ungkeako masolaa, ranta kau tedonta ka Yehuda tedonta mbo'u saru omue?” 11Sine i Amasia nahi pomperorongeako, ranta i Yoasi, mokole i Isaraeli lumako umaropio i Amasia, mokole i Yehuda i Beti-Semesi anu tewinso wita Yehuda. 12Yehuda tenangi a nto Isaraeli ka sompo to Yehuda molai a ngkemano. 13I Yoasi, mokole i Isaraeli rumakoo i Amasia anano i Yoasi anano i Ahasia, mokole i Yehuda i Beti-Semesi. Ka i'amba i Yoasi lumako i Yerusale ka rumongkao bente Yerusale mompu'u inso a Mpewowa Langkai Eparai hawe a Mpewowa Langkai Siuno, pato etu hiku ondauno. 14I'alao luwu wulaa ka salaka, luwuno parewa anu hinawe a laro raha-Do i Ue ka a mponaapa arataa a langkanaedo mokole, saru luwuno mia tinawa. Ka i'amba mekule i Samaria.

15Anu susuano inso a nteweweuno i Yoasi, hapa anu wineweuno, mosiano ka kana'umpe ipetea umewaio i Amasia, mokole i Yehuda, kombake luwuno atuu teburi a wunta tutuludo mokole i Isaraeli? 16I Yoasi mate ka ikinaburu i Samaria saru luwuno mokole i Isaraeli. Ka i'amba i Yerobea, anano gagi mokole umeuo. 17I Amasia anano i Yoasi, mokole i Yehuda, da tuwu hopulu ka olima nta'u mbo'u umarino mate i Yoasi anano i Yoahasi, mokole i Isaraeli.

18Anu susuano inso a nteweweuno i Amasia, kombake luwuno atuu teburi a wunta tutuludo mokole i Yehuda? 19Mia ntepo'asa umewaio i Yerusale ka ipolai lumako i Lakisi. Sine mpotena ira mia meluluo lumako i Lakisi ka onae pinepate i ra'ai. 20Onae winawaako ngara ka ikinaburu i Yerusale i horino uempu'uno i kota Daudi. 21Ka i'amba luwuno palili i Yehuda me'alao i Asaria anu tinuwuno hopulu ka onoo nta'u ka mpotoroo gagi mokole umeuo i Amasia, amano. 22Onae wali wanguo kota Elati ka ipokuleo ndi Yehuda, umarino mate i Amasia.

I Yerobea ana ntamano i Yoasi, mokole i Isaraeli

14:23-29

23Ia ta'u kohopulu ka olima poparentaano i Amasia ana ntamano i Yoasi, mokole i Yehuda, i Yerobea ana ntamano i Yoasi, mokole i Isaraeli, gagi mokole i Samaria. Onae moparenta pato pulu ka asa nta'u tehineno. 24Onae moweweu hapa anu mosa'o a pongkita-Do i Ue. Nahi bintao luwuno halano i Yerobea anano i Nebati anu poko'ariano to Isaraeli mpoweweu mbo'u hala. 25#Yun. 1:1Onae wali umalao witado to Isaraeli, mompu'u inso a nsala mewinso i Hamati hawe a ntahi Araba menunu saru pau-Do i Ue, Ue Alado to Isaraeli anu pinohaweomo molalo tetenaa-Do i nabi Yunu anano i Amitai, nabi inso i Gati-Heperi. 26Dokitaomo i Ue tedoa mopa'ino tebobarasaido to isaraeli, pingkoomo luwu moiko anu tetanggo ke anu tola ka nahina anu tumulungi ira to Isaraeli. 27Sine Ondae i Ue nahi Dopepau nine Ira pahihio neeno Isaraeli inso i tolino; gagi Dokadudui ira molalo i Yerobea anano i Yoasi.

28Anu susuano inso a nteweweuno i Yerobea, luwuno anu wineweuno ka mosiano, kana'umpe ipetea ka kana'umpe wali i'alaako ira to Isaraeli Damasi ka Hamati-Yehuda, kombake luwuno atuu teburi a wunta tutuludo luwuno mokole i Isaraeli? 29I Yerobea mohawe pompehohawa saru mia motau nse'eluno, luwuno mokoledo to Isaraeli. Ka i'amba i Sakaria, anano, gagi mokole umeuo.

Currently Selected:

2 Mokole 14: XMZ

Highlight

Copy

Compare