2 KORINTI 11
11
1Tedoa moiko, tewala mensabara komiu a benge-bengeku anu kodei atuu. Lano mensabara komiu ndi ongkue! 2Hangano kumosiriakomiu mosiri-Do i Ue. Hangano kupoposamborakomiumo a asa tama ka iwawa komiu kana ana beine moondo mempori ndi Ondae i Kerisituu. 3#Teg. 3:1-5, 13 Sine doito aku, ba mansa pinokontesaa pinewowolomiu inso a mpetenunumiu ntu'u ndi Ondae i Kerisituu, mengkena kana i Hawa pinopandeiako pe'akalano ule atuu. 4Hangano butu komiu mensabara, tewala hinao mia hawe mompalele i Yesu anu susua sekonopo anu kimempaleleomo, ke moweeakomiu penaa anu susua sekonopo anu imentarimaomo ke Lele Mawongkoa anu susua sekonopo anu imentarimaomo. 5Sine montonda pohaweku maupo tedei nahina makuraku sekonopo luwuno tinena anu nahina pengkenado atuu. 6Tewala nahi kuponto'ori lahi mepau komba kanatuu mongkona a ponto'ori; hangano impokomengkaaomo ndi omiu a luwuno tempo ka a laro luwuakoano.
I Paulu nahi perioo koroino
11:7-33
7Nde salake poweweuku, tewala me'urumako aku ka imempinelangkai, hangano kupaleleo ndi omiu, Lele Mawongkoa-Do Ue Ala nahi kupo'ema tambo? 8Luwuno bawaa susua kurontu iramo hangano montarima akumo tiangino tambo inso ndi ondae, ka kupokompekakaakomiu! 9#Plp. 4:15-18 Ka tempono ongkue a laro makuraa i tonga-tongamiu, nahina maupo te'asa mia pinokomasusaku, hangano hapa anu makura ndi ongkue, dompokosompoo pepaekompo anu mehawe inso i Makedonia. A luwuakoano kutangkoroo koroiku, ka si kupokonsusa komiu, ka aku koa mpiha moweweu kanandio. 10Hangano mentee-Do i Kerisituu i laroku, kupokomanasao, nine mawongkoku atuu nahina ta benteio maupo isema i luwuno wita Akaya. 11Tembio ka naahi? Hangano nahi kupehohawa komiuke? Ondae Ue Ala tumo'orio.
12Sine hapa anu wineweuku, aku weweuo mpiha ka dompenaa-naa anu mpo'ungke sala ka dompotae, nine ondae pengkena saru omami a laro mongkona anu pinokomawongkoako. 13Hangano mia atuudo tinena anu mpegaupi, anu mpo'angga pompopo'oo, anu mpo'onde-onde kana tinena-Do i Kerisituu. 14Mongkona atuu siimo ikinohali-haliako, hangano maupo i Mosa'o mo'onde-onde kana mala'eka Mewine. 15Gaagi komba ndio aasa anu kinohali-haliako, tewala puu pompekakaakono mpo'onde-onde kana puu pompekakaako menteea. Tampulaado ta menunu saru wineweudo.
16Kuwalio mbo'u: si hina mia anu motaeakune benge-benge. Ka tewala mpotae komiu koa mbo'u kanatuu, imentarima akumo kana mia benge-benge ka imoiko kumawongko tedei. 17Hapa anu pinauku, kupauo komba kana asa mia anu mepau montonda pau-Do i Ue, tendeano kana asa mia benge-benge anu hinao pompe'ala-alano, nine moiko imawongko. 18Hangano hadio mia anu mawongko montonda tolino, ongkue mbo'u mingki mawongko. 19Nde inehemiu mensabara a mia benge-benge, hangano mempande komiu ntu'u mposongka: 20hangano mensabara komiu, ba dompe'ata komiu mia, ba dome'alao mia anu komba tiado inso ndi omiu, ba domempabawai komiu mia, ba dompompelangka-langkaiakomiu, ba domempede komiu mia. 21Saru tedoa mokoko'ii asalakono kumangakuakono, nine mongkona anu kanatuu memolema kami lahi.
Sine tewala mia susua memosia pompelangka-langkaiako hapamo koa, ka ongkue mbo'u – kupepau a laro benge-benge – mosia aku koa! 22Nde to Ibarani irake? Ongkue mbo'u to Ibarani! Nde to Isaraeli irake? Ongkue mbo'u to Isaraeli. Nde inuleno i Burahimake ondae? Ongkue mbo'u inuleno i Burahima! 23#Tin. 16:23 Nde puu pompekakaako-Do i Kerisituu ondae atuuke? – mepau aku kana mia mekombe – lalua akupo mbo'u! Hadioopo pe'iseiku; mararuopo a laro torungku; sinepi komba da sa'uno; mararu ilawu mate. 24#Win. 25:3 Pelima domebobarasai aku to Yahudi, sompo dompesepi pato pulu inonini aasa ponsepi, 25#Tin. 14:19; 16:22 pentolu kusinepi, pohona kuwinunoako watu, pentolu mompembasai kapala toondu, asa oleo asa wongi kukolonto-lonto a ntonga ntahi. 26#Tin. 9:23; 14:5 A pelempaaku mararu ipokodoito aku mongkokongirino moowo ka mongkokongirino anu mperontu, mongkokongiria inso a to Yahudi ka inso anu komba to Yahudi; mongkokongiria a ngkota, mongkokongiria i pada one, mongkokongiria a ntonga ntahi, ka mongkokongiria inso a mpepaekompo anu mpo'onde-onde. 27Hadio pe'iseiku ka mo'angga mobea; mararu nahi kupoturi; mokoninggo aku ka mokoranga; mararu kupuasa, mokoseo ka nahi kupesangka, 28ka, hadio anu susuano mbo'u nami kupauo, anggaaku sompo oleo, onaemo mekakaako ira luwuno bawaa. 29Tewala hinao mia mompemolema, nde nahi aku tetondake mompemolema? Tewala hinao mia tetidu, nde nahi ta masusake aroaku hangano masusaa?
30Tewala asalakono aku mawongko, ka aku mawongko a molemaku. 31Ondae Ue Ala, Ama-Do i Yesu, Ueto, anu inunde-unde ranta nahina tampulaano, tumo'orio, nine nahi kupegaupi. 32#Tin. 9:23-25 I Damasi petewawa i witado mokole Aretasi metena dumagaio kotado to Damasi ka domerako aku. 33Sine ongkue pinotii inso a aasa pentangoa a laro aasa pinda'a hawe i bungkuno rere watuno kota ka kanandiomo kutola inso a ngkaeno.
Currently Selected:
2 KORINTI 11: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
