2 KORINTI 10
10
Mate tuwuno i Paulu
10:1-11
1Ongkue, i Paulu, asa mia anu nahi sapa tewala tepo'aroakomiu, sine mosia ndi omiu tewala tepo'olai, kupopoto'oriakomiu a nee-Do i Kerisituu anu mauru ka me'aroa. 2Ku'emao ndi omiu: si medadai aku ka kupopokitao mosiaku tewala tepo'umpeda, kana tinooku tekudaako ira mia anu potaedo, nine mentuwu kami montonda tuwu ntolino. 3Lano da mentuwu kami i wawontolino, sine komba kimpo'angga montonda tuwu ntolino, 4hangano parewa mpeteamami a laro mpeteahako komba parewa mpetea ntolino, tendeano parewa mpetea anu pinokorosoako pabawa-Do Ue Ala, anu polio humoao luwuno bente. 5Kimengkale-kaleo sompo pe'akalano mia ka mobangkuo sompo bente anu winanguno pompelangka-langkaino mia anu umewaio ponto'ori mongkona Ondae Ue Ala. Kimempabawaio luwuno pinewowolo ka mokompetuunduo ndi Ondae i Kerisituu, 6ka mpepatinda kami koa mbo'u mehukuo sompo pe'ewaa, tewala mpetonda komiumo ntu'u.
7Imengkitaomo anu mengkaa i arono matamiu! Tewala hinao asa mia anu memanasao, nine onae mia-Do i Kerisituu, asalakono ka ipompewowolo i laro aroano, nine omami mbo'u mia-Do i Kerisituu mengkena kana onae. 8Tendeano, tewala laalo tedei kumawongkoakono pabawa, anu Dowee kami i Ue ka kimpowangu ka komba ka kimengkale-kale komiu, ka i larono mongkona atuu nahi aku mohawe mokoko'ii. 9Sine nahi kubehe tengkita kana kupokodoitoakomiu luwuno wuntaku. 10Hangano, dompotae mia, luwuno wuntano lano manasa ka me'ihi, sine tewala tepo'aro rupa onae telusa ka luwuno pinauno nahina pengkonaano. 11Sine moikoano mia anu mpotae kanandio ka domempokonto'orio, nine wineweumami, tewala ntepo'aro rupa, mengkena kana pinaumami a laro wuntamami, tewala nahi tontepo'aro rupa.
Pohaweno i Paulu mongkona koroino
10:12–11:6
12Lano nahi kimensapa me'alu doao koroimami ke mpengkenaako ira mia mehano anu me'unde-undeo koroido ondaedo. Ondae mesongkaakono posongkado ondaedo koroido ka mpongkenao koroido saru koroido ondaedo! Tedoa iramo mebenge-benge! 13Sine omami nahi kimebehe memawongko komba da sa'uno, tendeano a luwuno koa mpiha tidano anggaa anu Dopakosiakami Ue Ala, anu tepalele hawe koa mbo'u ndi omiu. 14Hangano a pompalelea Lele Mawongkoa mongkona Ondae i Kerisituu mehawe kamimo ndi omiu, ranta nahi kimelaloo tidano po'anggaamami, kana napi kimehawe ndi omiu. 15Nahi kimpehamba-hambaako anggaa anu wineweudo mia susua i wita mpo'anggaa anu nahi kimempinakosiako. Sine kimperorohio, nine tewala pompe'ala-alamiu koteti-tetiangino, kami mpohawe pompelangkai lalu langkai mbo'u i olomiu, tewala pinongkenaako saru wita po'anggaa anu kimempinakosiako. 16Oo, mentuwu kami, ka kimpokopaleleo Lele Mawongkoa a luwuno wita anu lalu olai sekonopo witamiu ka nahi kimemawongkoakono luwuno hasilino anu hinawedo mia susua i wita po'anggaa anu domempinakosiako.
17 #
Yer. 9:24
”Sine ba isema mawongko, ka imawongkomo ndi Ondae i Ue.” 18Hangano komba mia anu umunde-undeo koroino anu monangi, tendeano mia anu inunde-unde-Do i Ue.
Currently Selected:
2 KORINTI 10: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
