1 TESALONIKA 2
2
Pompekakaakono i Paulu i Tesalonika
2:1-12
1Omiu isa'a lano imento'orio, pepaekompo luwu-luwu, nine hawemami i olomiu komba nahina tuduno. 2#Tin. 16:19-24; 17:1-9 Sine maupo se'eluno omami, kana imento'orio, mebinobarasai kamimo ka mempinokongkodei i Pilipi, sine hangano pontulungi-Do Ue Alato, memosia kami mempaleleo ndi omiu Lele Mawongkoa inso ndi Ondae Ue Ala a laro mperokuhi anu mobea. 3Hangano pompatudumami komba inso a pompokobulalingo ke inso a ntinoo anu nahi mentee ka komba tinondaako mbo'u pompopo'oo. 4Tendeano, hangano Dopetekona kamimo Ue Ala ka kimempine'ala-alaako Lele Mawongkoa, onaemo pu'uno ka kimpepau, komba mokomawongko ira mia, tendeano mokomawongko Ira Ue Ala anu umara-arahakono aroato. 5Hangano nahi kimehori mpo'o'ahiti – mongkona atuu imento'orio – ka komba hori hina tinoomami medokoli anu tewuni – Ondae Ue Ala sakosii – 6komba hori kami mbo'u mpo'ungke po'unde-unde inso a mia, moiko inso ndi omiu, maupo inso a luwuno mia susua, maupo kimpokompoweweu kanatuu kana tinena-Do i Kerisituu. 7Sine mpe'aroa kami i olomiu, mengkena kana aasa ine monte'ia ka mekariao anano. 8Kanatuumo omami, a pompehohawa anu langkai ndi omiu, komba butu inehemami mpontiaakomiu Lele Mawongkoa inso ndi Ondae Ue Ala, sine tuwumami mbo'u, hangano kimpehohawa komiumo. 9Hangano da impewowoloo, pepaekompo luwu-luwu, peteahakomami ka pe'iseimami. Mpo'angga kami meene wongi, ka si gagi pokonsusano isemamo koa i olomiu, kimempaleleo ndi omiu Lele Mawongkoa inso ndi Ondae Ue Ala. 10Omiumo sakosii, kanatuukoa mbo'u Ondae Ue Ala, ba kana'umpe memporino, moleono ka nahina tataano kimpelelu i olomiu, anu mpompe'ala-ala. 11Imento'orio, ba kana'ume omami, kana ama a luwuno anano, kimempatudu komiumo ka mpokorosoo aroamiu nte'o'asa mia, 12ka kime'emao ntu'u, ka imentuwu menunu saru po'ehe-Do Ue Ala, anu moboi komiu a Poparentaa ka maramba-Do.
Po'unde a bawaa
2:13-20
13Ka onaemo pu'uno nahi otu-otu kime'une-unde Ira mbo'u Ue Ala, hangano imentarimaomo pau-Do Ue Ala anu pinalelemami atuu, komba kana paudo mia, sine – ka lano mentee ntu'u kanandio – kana pau-Do Ue Ala, anu mo'angga koa mbo'u i laromiu anu mpompe'ala-ala. 14#Tin. 17:5 Hangano omiu, pepaekompo luwu-luwu, gagi komiumo mentonda ira bawaa-Do Ue Ala i Yudea, luwuno bawaa ndi Ondae i Kerisituu Yesu, hangano memarasai komiumo mbo'u inso a mpe'asa tongkumiu luwuakoano anu pinemarasaido inso a nto Yahudi. 15#Tin. 9:23, 29; 13:45, 50; 14:2, 5, 19; 17:5; 13; 18:12 Tamoako to Yahudi atuudo dompepate Iramo Ue Yesu ka luwuno nabi ka domeweweu nsa'o kamimo. Hapa anu pinemoiko-Do Ue Ala nahi domperioo ka luwuno mia dompe'iwaliako ira, 16hangano inehedo mentombolei kami mempaleleo pau-Do i Ue tekaduduiado tongku susua. Kanandiomo nahi dompenaa-naa mpontiangi halado hawe ka isompo porokono ka kanandio-andio i'alu iramo luwuno pontekudaako. 17Sine omami, pepaekompo luwu-luwu, anu teponsia sarai inso ndi omiu, olai a mata, sine komba olai i laro aroa, mentee ntu'u, saru tekewoi anu langkai, mperokuhi kamimo ka kime'aiwa ntepohaweakomiu. 18Hangano mpontoo kamimo me'aiwa ndi omiu – ongkue, i Paulu, tendeano komba butu pohona –, sine itombolei kami i Mosa'o. 19Hangano isemake pomperorohiamami ke mawongkoamami ke ramba-ramba ulu pino'undeakomami i aro-Do i Yesu, Ueto, a tempo hawea-Do, tewala komba omiu? 20Mentee ntu'u, omiumo marambamami ka mawongkomami.
Currently Selected:
1 TESALONIKA 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
